40 vehicles disappeared from Fatashil-Ambari police station:
মহানগৰীত ৰক্ষক এতিয়া ভক্ষক হৈ পৰিছে। এক আজৱ ঘটনাই সকলোকে আচৰিত কৰি তুলিছে ৷ ফটাশিল আমবাৰী থানাত জব্দকৃত বহু বাহন দীৰ্ঘদিন ধৰি থানা চৌহদত পৰিত্যক্ত অৱস্থাত পৰি আছিল ।
কিন্ত শেহতীয়াকৈ পোহৰলৈ আহিছে ৪০ খন বাহন { জব্দকৃত অধিকাংশ বাহনেই মটৰ চাইকেল } হঠাতে নোহোৱা হোৱাৰ কথা ৷ আৰক্ষীৰ তদন্তত পোহৰলৈ অহা অনুসৰি এই বাহন সমূহ কোনো লোকে চুৰি কৰি নি বিক্ৰী কৰিছে ৷ ঘটনা সন্দৰ্ভত এইপর্যন্ত ৩ জন লোকক গ্ৰেপ্তাৰ কৰিছে আৰক্ষীয়ে। ধৃত লোককেইজন পৰেশ দলে, ৰাকেশ গোৱালা, ৰাতুল কাকতি। তিনিও জেৰাত বহু বিস্ফোৰক তথ্য সদৰি কৰিছে ৷ আনহাতে আটকাধীন পৰেশ দলেই প্রায় ৪ লাখ টকাত বিক্ৰী কৰিছিল বাহনসমূহ।
উল্লেখ্য যে,ধৃত তিনিওনে আৰক্ষীৰ জেৰাত সদৰি কৰা মতে যানবাহন চুৰি কৰা কাণ্ডৰে জড়িত আছি স্বয়ং ফটাশিল আমবাৰী থানাৰ যান-বাহন আৰক্ষীৰ ভাৰপ্ৰাপ্ত বিষয়া মিৰজাহান হুছেইন ৷ তৎস্বত্বেও এই পৰ্যন্ত সোধপোছৰ বাবে আটক কৰা নাই যান-বাহন আৰক্ষীৰ ভাৰপ্ৰাপ্ত বিষয়া মিৰজাহানক ৷
ফটাশিল আমবাৰী থানাৰ ভাৰপ্ৰাপ্ত বিষয়া গৰাকীয়ে জানিব দিয়া অনুসৰি, চলিত মাহৰ ২২ আগষ্টত আৰক্ষীয়ে বিশেষ সূত্ৰৰ পমখেদি এখন গাড়ী অসম ভৈয়াম জনজাতি উন্নয়ন নিগমৰ পিছফালে পৰিত্যক্ত অৱস্থাত উদ্ধাৰ হয় এখন বাহন ৷ উল্লেখ্য যে বাহন খন চুৰি হৈছিল ফটাশিল আমবাৰীৰ চাইকেল ফেক্টৰীৰ ওম শান্তি বিবাহ ভৱন চৌহদৰ পৰা ৷ পৰৱৰ্তী সময়ত বাহন খন উদ্ধাৰ কৰি থানা চৌহদত ৰখা হৈছিল ৷
ইতিপূৰ্বে আৰক্ষীয়ে গ্ৰেপ্তাৰ কৰা পৰেশ দলে অসম ভৈয়াম জনজাতি উন্নয়ন নিগমৰে জ্যেষ্ঠ একাউণ্টেণ্ট আছিল ৷ আন দুজন পুৰণা লোহাৰ বিক্ৰেতা ৰাকেশ গোৱালা আৰু ৰাতুল কাকতিক গ্ৰেপ্তাৰ কৰা হয় ক্ৰমে আমবাৰীৰ কে কে পথ আৰু
বীৰুবাৰী শংকৰপুৰৰ পৰা ৷
ইতিমধ্যে আৰক্ষীয়ে তিনিওকে গুৱাহাটী জিলা আদালতত হাজিৰ কৰি চাৰিদিনীয়া জিম্মাত লয়৷ আৰক্ষীৰ মাৰাথন জেৰাত ধৃত পৰেশ দলৈয়ে স্বীকাৰোক্তি দিয়া মতে গাড়ীবোৰ ১৫ জুলাইৰ পৰা একাদিক্ৰমে অলপ অলপকৈ প্ৰায় ৪ লাখ টকাত বিক্ৰী কৰে । বুধবাৰে তিনিওকে জিম্মা শেষ হোৱাত পুনৰ জিলা আদালতত হাজিৰ কৰে। ইয়াৰ পিছতে ন্যায়াধীশে অভিযুক্তক জেললৈ প্ৰেৰণ কৰে।
মনকৰিবলগীয়া যে ফটাশিল আমবাৰী থানাৰ ট্ৰেফিক আই চি মিৰজাহান হুছেইনৰ দায়িত্বত আছিল এই জব্দকৃত বাহন সমূহ । এখন দুখন নহয় ,৪০ খনকৈ বাহন চৌহদৰ পৰা কিদৰে হঠাতে নোহোৱা হ’ল এইয়া এতিয়া লাখটকীয়া প্ৰশ্ন ৷ আনহাতে আটকাধীন পৰেশ দলেই আৰক্ষীৰ জেৰাত আই চি মিৰজাহান হুছেইনৰ নাম উল্লেখ কৰিছে ৷ তাৰ পিছতো কিয় আই চি মিৰজাহানক জেৰা কৰা নহ’ল ? নে আৰক্ষী হোৱাৰ সুবাদতে সাৰি যাব নেকি আই চি মিৰজাহান ৷