তলাবন্ধৰ সময়ত গৃহাভিমুখী শ্ৰমিকসকলক সহায়ৰ বাবে আগবাঢ়ি আহিছে অন্ধ্ৰআৰক্ষী । ৰাষ্ট্ৰীয় ঘাইপথেৰে খোজকাঢ়ি ঘৰলৈ বুলি আগবঢ়া শ্ৰমিক সকলৰ কষ্ট হ্ৰাস কৰাৰ উদ্দেশ্য অন্ধ্ৰ প্ৰদেশৰ আৰক্ষী সঞ্চালক প্ৰধান ডি তিৰুমাল ৰাওৱে গ্ৰহণ কৰিছে কেতবোৰ প্ৰশংসনীয় পদক্ষেপ । তপ্ত ৰাজপথেৰে খালী ভৰিৰে খোজকঢ়া শ্ৰমিকসকল অন্ধ্ৰ আৰক্ষীয়ে প্ৰদান কৰা ছেণ্ডেলক লৈ ইতিমধ্যে বাতৰি প্ৰকাশ পাইছে । উল্লেখ্য যে মাৰ্চত আৰম্ভ হোৱা তলাবন্ধই বৰ্তমান চতুৰ্থ পৰ্যায়ত প্ৰৱেশ কৰিছে । এই পৰিস্থিতিত দেশৰ বিভিন্ন প্ৰান্তৰ পৰা নিজ নিজ ঘৰলৈ বুলি হেজাৰ হেজাৰ প্ৰৱাসী শ্রমিকে খোজকাঢ়িয়ে ৰাওনা হৈছে ।
সূৰ্যৰ উত্তাপ তথা বৰষুণকো আওকাণ কৰি শ্ৰমিকসকলে অবিৰামভাৱে আগবাঢ়িছে ঘৰলৈ বুলি । প্ৰৱাসী শ্ৰমিক সকলে নিজ ঘৰত উপস্থিত হ’ব পৰাকৈ ৰেলৰ ব্যৱস্থা কৰা হৈছে যদিও ৰেলৰ ব্যৱস্থা এতিয়াও পৰ্যাপ্ত হৈ উঠা নাই । ফলত বহু শ্রমিকে ৰেলৰ অপেক্ষাত নাথাকি খোজকাঢ়িয়ে ঘৰলৈ বুলি আগবাঢ়িছে । দক্ষিণ ভাৰতৰ প্ৰতিখন ৰাজ্যতে পাৰাস্তম্ভ এতিয়া যথেষ্ট বৃদ্ধি পাইছে । কিন্তু ঘৰলৈ উভতিবলৈ উদগ্ৰীৱ হৈ থকা শ্ৰমিক সকলে এনে উষ্ণতাকো নেওচা দি আগবাঢ়িছে তপ্ত ৰাজপথেৰে । যাত্ৰা পথত শ্ৰমিক সকলে সন্মুখীন হোৱা অসুবিধাবিলাক দূৰ কৰিবলৈ সেয়েহে সিদ্ধান্ত লয় অন্ধ্ৰ আৰক্ষীয়ে । প্ৰবাসী শ্ৰমিক সকলে যাতে ক্ষুধাতুৰ হৈ থাকিবলগীয়া নহয় সেই কথা নিশ্চিত কৰিবলৈ আগবাঢ়ি আহিছে স্বয়ং আৰক্ষী সঞ্চালকপ্ৰধান ।
যাত্ৰাপথত শ্ৰমিকক খাদ্য আৰু পানীৰো ব্যৱস্থা কৰা হৈছে । খাদ্য আৰু পানীৰ বাবে পথৰ কাষে কাষে সাজি উলিওৱা হৈছে বিশেষ ‘ষ্টল’, কিন্ত আৰক্ষীৰ চকুত পৰে খালী ভৰিৰে খোজকাঢ়িবলৈ বাধ্য হোৱা শ্ৰমিক সকলক । অধিক সংখ্যক শ্ৰমিকৰে ভৰিত নাছিল জোতা অথবা ছেণ্ডেল । এই কথা দৃষ্টিলৈ অহাৰ পাছতে আৰক্ষী সঞ্চালকপ্ৰধানে শ্ৰমিক সকলক ছেণ্ডেল দিয়াৰ সিদ্ধান্ত লয় ।শ্ৰমিকসকলক ছেণ্ডেল দিব পৰাকৈ আৰক্ষীয়ে কথা পাতে কিছু সংখ্যক স্বেচ্ছাসেৱী সংস্থাৰে । শ্ৰমিক সকলক সহায়ৰ বাবে স্বেচ্ছাসেৱী সংস্থা আগবাঢ়ি অহাত আৰক্ষীয়েও লাভ কৰে সকাহ । ফলত খাদ্য-পানীৰ লগতে শ্ৰমিক সকলক আৰক্ষীয়ে আগবঢ়ায় বিনামূলীয়াকৈ এযোৰ ছেণ্ডেল । অন্ধ্ৰ আৰক্ষীয়ে শ্ৰমিক সকলক সহায় কৰিব পৰাকৈ ৰাষ্ট্ৰীয় ঘাইপথত ৭৯টা ‘ফুড কাউণ্টাৰ ‘ব্যৱস্থা কৰিছে । তদুপৰি শ্ৰমিক সকলক সকলো ধৰণৰ সহায় কৰাৰো আশ্বাস দিছে অন্ধ্ৰ আৰক্ষীয়ে।
