এনিশাৰ উৎকণ্ঠা, নানা জল্পনা-কল্পনাৰ ওৰ পেলাই অৱশেষত উদ্ধাৰ হ’ল ৰাজ্যসভাৰ প্ৰাক্তন সাংসদ বিশ্বজিৎ দেউৰীৰ নিৰুদ্দিষ্ট পুত্ৰ । পাঁচ জানুৱাৰীত বিয়লি বিদ্যালয়ৰ ছাত্ৰাবাসৰ পৰা নিৰুদ্দেশ হৈছিল প্ৰাক্তন সাংসদজনৰ পুত্ৰ অমিত ৰাজ দৈমাৰী । এই ঘটনাক কেন্দ্ৰ কৰি তীব্ৰ উৎকণ্ঠাৰ সৃষ্টি হয় । আনকি কিশোৰ ছাত্ৰজন ৰাজনৈতিক বিদ্বেষৰ বলি হোৱাৰো আশংকা কৰা হৈছিল । কিন্তু আজি পুৱাৰ ভাগত অমিতক চিৰাং জিলাৰ চাপাগুৰিৰ পৰা উদ্ধাৰ কৰা হয় ।
প্ৰাপ্ত তথ্য অনুসৰি, কোকৰাঝাৰৰ ৰিয়েলিটী পাব্লিক স্কুলৰ দশম শ্ৰেণীৰ অমিতে পাঁচ জানুৱাৰীৰ বিয়লি ছাত্ৰাবাসৰ আন তিনিজন আবাসীৰ সহযোগত দেৱাল পাৰ হৈ পলায়ন কৰিছিল । পলায়ন কৰাৰ সময়ত তেওঁ দিল্লী বা গুৱাহাটীলৈ যাব বুলি সহপাঠীক কৈছিল । নিশা তেওঁ চিৰাং জিলাৰ চাপাগুৰিৰ ডন বস্ক’ কনিষ্ঠ মহাবিদ্যালয়ৰ এজন ছাত্ৰৰ কোঠাত কটাইছিল ।
কালি উক্ত ছাত্ৰজনেই অমিতৰ বিষয়ে দৈমাৰীৰ পৰিয়ালক অৱগত কৰে । এক নম্বৰ চপাগুৰিৰ বাসিন্দা দিগন্ত লাৱাৰীৰ বাসগৃহতে থকা এটি ব্যক্তিগত ছাত্ৰাবাসৰ নিবাসী আৰ্ণল্ডে জনোৱা মতে, পাঁচ জানুৱাৰীৰ সন্ধিয়া তেওঁৰ এগৰাকী বান্ধৱীয়ে ফোন কৰি এজন বন্ধুক নিশাটো কটাবলৈ দিয়াৰ অনুৰোধ জনায় । সেই মৰ্মে আৰ্ণল্ডে অচিনাকি অমিতক নিজৰ কোঠাত নিশা কটোৱাৰ সুবিধা কৰি দিছিল ।
কালি পুৱা প্ৰায় ৮-৩০ বজাত অমিত কোঠাটোৰ পৰা ওলাই যায় । ইয়াৰ কিছু সময়ৰ পাছতে আৰ্ণল্ডক বাগ্সাৰ বাতৰি দেখা পাই আন দুজনমান বন্ধুৰ স’তে অমিতৰ সন্ধানত ওলাই যায়। অৱশেষত আৰ্ণল্ডে চাপাগুৰি বজাৰত অমিতক লগ পোৱাৰ পাছত তেওঁৰ পৰিয়ালক অৱগত কৰে । কিছু সময়ৰ পাছতে দৈমাৰীৰ পৰিয়ালৰ লোকে উক্ত স্থানত উপস্থিত হৈ স্থানীয় আৰক্ষীক অৱগত নকৰাকৈয়ে কিশোৰ ছাত্ৰজনক কোকৰাঝাৰলৈ নিয়ে ।
উল্লেখ্য যে পাঁচ জানুৱাৰীৰ বিয়লি অমিত নিৰুদ্দেশ হোৱাৰ পাছত এই ঘটনাক কেন্দ্ৰ কৰি বিভিন্ন চৰ্চা হৈছিল । অমিতক দুৰ্বিত্তই অপহৰণ কৰাৰ সন্দেহ ঘনীভূত হোৱাৰ লগতে কিশোৰ ছাত্ৰজন ৰাজনৈতিক প্ৰতিহিংসাৰ বলি হোৱাৰো আশংকা কৰা হৈছিল । কিয়নো অমিতৰ পিতৃ এসময়ত বিপিএফ দলৰ অন্যতম শীৰ্ষ নেতাৰূপে পৰিচিত আছিল যদিও শেহতীয়া বিটিচি নিৰ্বাচনৰ পূৰ্বে তেওঁ বিজেপিত যোগদান কৰে ।
ইয়াৰ পাছৰে পৰা প্ৰাক্তন সাংসদ দৈমাৰীৰে বিপিএফৰ প্ৰধান হাগ্ৰামা দৈমাৰীক চোকা ভাষাৰে সমালোচনা কৰি আহিছিল । এনে পৰিপ্ৰেক্ষিতত ছাত্ৰজন নিৰুদ্দেশ হোৱা ঘটনাৰ স’তে আনকি ৰাজনৈতিক ষড়যন্ত্ৰৰ আশংকা কৰিয়ে ৰাজ্যৰ গৃহ বিভাগো তৎপৰ হৈ উঠিছিল। অসম আৰক্ষীৰ অতিৰিক্ত আৰক্ষী সঞ্চালক প্ৰধান জি পি সিঙে ৰোৱা নিশাই কোকৰাঝাৰত বাহৰ পাতি ঘটনাৰ বুজ লৈ পৰিস্থিতি নিৰীক্ষণ কৰিছিল ।
চৰকাৰৰ এক সূত্ৰই জনোৱা মতে, এই ঘটনাই দিছপুৰতো জোকাৰণি তুলিছিল; কিন্তু কালি দৈমাৰীৰ পুত্ৰৰ উদ্ধাৰ আৰু তেওঁ স্বেচ্ছাই পলায়ন কৰা বিষয়টো সদৰী হোৱাৰ লগে লগে সমস্ত জল্পনা-কল্পনাৰ অন্ত পৰে । অৱশ্যে কিশোৰ ছাত্ৰজনে এইদৰে ছাত্ৰাবাসৰ দেৱাল পাৰ হৈ কিয় পাবলগীয়া হ’ল, সেই বিষয়টোও ৰহস্যৰ আৱৰ্ততে ৰ’ল ।