‘কেব’ৰ বিৰুদ্ধে প্ৰথম গীত মইয়ে লিখিছিলো
২০২১ৰ এইবাৰৰ বিধানসভা নিৰ্বাচন সুকীয়া হ’ব । জাতীয়তাবাদ আহিব নে, ‘কা’ৰ যি বতাহ বলি আছে সি কি ৰূপ ধাৰণ কৰিব সেইটো উল্লেখযোগ্য হ’ব । চলচ্চিত্ৰ জগতৰ কথা ক’বলৈ গ’লে এতিয়াটো চিনেমা হল, থিয়েটাৰ বন্ধ হৈয়ে আছে সেয়েহে বহুকেইখন চিনেমা মুক্তি দিব পৰা নাই । সেইবোৰৰ পৰা কেনেকৈ পৰিত্ৰাণ হ’ব পাৰি সেইটো লক্ষ্যণীয় হ’ব । কৰ’না অতিমাৰীৰ ফলত বহুতো লোক নিবনুৱাও হ’ল । যিবোৰ যুৱক-যুৱতী অসমৰ বাহিৰত আছিল তেওঁলোকো এতিয়া অসমত ঘূৰি আহিছে । সেইসকল যুৱক-যুৱতীক কেনেদৰে কৰ্মসংস্থাপন দিব পাৰি তাৰ প্ৰতিও লক্ষ্য ৰাখিব লাগিব । এই বৰ্ষটো এই সকলোবোৰ সমস্যা সমাধানৰ এটা বৰ্ষ ।
মই ‘কা’ কেতিয়াও সমৰ্থন নকৰো । ‘কেব’ৰ বিৰুদ্ধে প্ৰথম গীত মইয়ে লিখিছিলো আৰু প্ৰচাৰ কৰিছিলো মাৰ্চ ২০১৮ত । গীতটোৰ নাম আছিল ‘জাগা অসমীয়া জাগা’ । তেতিয়া মানুহে কেবৰ বিষয়ে ভালকৈ জনা নাছিল । মই শিলচৰৰ নেচনেল ইনষ্টিটিউট অৱ টেকন’লজিৰ পৰা এম টেক কৰিছো । তেতিয়া দেখিছিলো যে বৰাক উপত্যকাৰ অঞ্চলবোৰত অসমীয়া ভাষাৰ মহত্বই নাই । তাতে অসমীয়া ভাষাটো লিখিতভাৱেও ব্যৱহাৰ নহয় । যদিও বৰাক উপত্যকাত বহুভাষিক লোক আছে তথাপি অসম হিচাপে অসমীয়া ভাষাৰ যি সন্মান থাকিব লাগে সেইটো সভান্য হ’লেও মোলান হৈছে বুলি মই ভাবো । ‘কেব’খনটো এতিয়া ‘কা’ হ’লেই ইয়াৰ ফলত ভৱিষ্যতে আমাৰ নিজৰ চিনাকিটো হেৰাই যোৱাৰ সম্ভাৱনা আছে ।
অনাগত দিনত ভাল ভাল গীত লিখা আৰু গোৱাৰ পৰিকল্পনা কৰিছো । গীতবোৰ ৰাইজৰ আগত উপস্থাপন কৰাৰ আশা আছে । ৰাইজে যাতে আদৰি লয় । যিহেতু মই এটা চফ্টৱেৰ কোম্পানীত কাম কৰি আছো । সেয়ে তলাবন্ধৰ বাবে বন্ধ হৈ পৰা বহুতো কাম এতিয়া সম্পূৰ্ণ কৰিবলৈ চেষ্টা কৰিম । শেহতীয়াকৈ ‘মৰো মৰো লাগে’ বুলি এটি গীত মুকলি কৰিছো । নতুনকৈ মোৰ আদিবাসী গীত এটা আহি আছে ‘৪৪০ ভল্ট’ বুলি । আগন্তুক মাহৰ শেষৰ ফালে মুক্তি দিয়াৰ পৰিকল্পনা কৰিছো ।
মই অসমবাসীক ক’ব বিচাৰো যে নিজৰ জাতিটোৰ বাবে কাম কৰিব লাগে । সকলোৱে ইজনে সিজনক সহায় কৰিব লাগে । মানুহবোৰ অলপ উদাৰ মনোভাৱৰ হ’ব লাগে । উদাৰ মনোভাৱ থাকিলে পৃথিৱীখনৰ উন্নতি হ’ব । উদাৰ কেৱল মানুহৰ বাবেই নহয় পশু-পক্ষী, জীৱ-জন্তু, গছ-গছনি সকলোৰে বাবে হ’ব লাগে । নৱ প্ৰজন্মই বহুত ভাল ভাল কাম কৰি আছে। তেওঁলোক বহুত আগবাঢ়া হয় । মই ভাবো বহুত উদাৰ মনোভাৱৰো হয় ।
বিগত বৰ্ষটো মোৰ ব্যক্তিগতভাৱে খুব বেছি বেয়া যোৱা নাই । কিন্তু বেয়া লাগিছে যে কৰ’না অতিমাৰীৰ ফলত বহুতো লোকে প্ৰাণ হেৰুৱাইছে । ব্যক্তিগতভাৱে এই কাৰণেই ভাল বুলি ক’ম মোৰ এটা গীত আছিল ‘বহাগ আহিল’ বুলি সেইটো ৰাইজে আদৰি লৈছে । তলাবন্ধৰ সময়ত পঢ়িবলৈ আৰু বহু নজনা কথা শিকিবলৈ সময় পালো ।
মই চফ্টৱেৰ ইঞ্জিনিয়াৰ সেয়েহে মোৰ জীৱিকাত অতিমাৰীয়ে সিমান প্ৰভাৱ পেলোৱা নাছিল । কাৰণ, হাতত এটা লেপটপ হ’লেই মোৰ সকলোবোৰ কাম হৈ যায় । মই ঘৰৰ পৰাই কাম কৰি আছিলো ।
