ৰাজ্য চৰকাৰৰ মুখত অসমৰ উন্নয়নী যাত্ৰাৰ ফুলজাৰিৰ সময়তে ইয়াৰ আন্তঃসাৰশূন্যতা স্পষ্ট হৈছে । নীতি আয়োগৰ শেহতীয়া প্ৰতিবেদন দাঙি ধৰিছে অসমৰ দুৰ্দশাগ্ৰস্ত ছবি । নীতি আয়োগৰ দৰিদ্ৰতা সম্পৰ্কীয় প্ৰতিবেদন অনুসৰি অসম দেশৰ ভিতৰতে ষষ্ঠ দৰিদ্ৰতম ৰাজ্য । তদুপৰি, উত্তৰ-পূৰ্বাঞ্চলৰ ৰাজ্যসমূহৰ ভিতৰত মেঘালয়ৰ পাছতে অসম সবাতোকৈ দৰিদ্ৰ ৰাজ্য । উত্তৰ-পূৰ্বাঞ্চলৰ আন কেইখন ৰাজ্য ক্ৰমে নাগালেণ্ড, অৰুণাচল প্ৰদেশ, মণিপুৰ, ত্ৰিপুৰা, মিজোৰাম আৰু ছিকিমৰ অৱস্থা অসমতকৈ টনকিয়াল ।
নীতি আয়োগৰ প্ৰকাশিত তালিকা অনুসৰি দেশৰ ভিতৰত সবাতোকৈ দৰিদ্ৰতম ৰাজ্যখন হৈছে বিহাৰ । ইয়াৰ পাছতে আছে ঝাৰখণ্ড, উত্তৰ প্রদেশ আৰু মধ্যপ্ৰদেশ । ইয়াৰ পাছতে আছে পঞ্চম স্থানত মেঘালয় আৰু ষষ্ঠ স্থানত অসম । বিভিন্ন ক্ষেত্ৰত দৰিদ্ৰ ৰাজ্যসমূহৰ তালিকাত অসমৰ পাছত আছে ক্ৰমে চত্তীছগড়, ৰাজস্থান, ওড়িছা, নাগালেণ্ড, অৰুণাচল প্ৰদেশ, পশ্চিমবংগ, গুজৰাট, মণিপুৰ, উত্তৰাখণ্ড, ত্ৰিপুৰা, মহাৰাষ্ট্ৰ, তেলেংগানা, কৰ্ণাটক, অন্ধ্ৰপ্ৰদেশ, হাৰিয়ানা, মিজোৰাম, হিমাচল প্ৰদেশ, পঞ্জাৱ, তামিলনাডু, ছিকিম, গোৱা, কেৰালা তথা কেন্দ্ৰীয় শাসিত অঞ্চলসমূহ ক্ৰমে দাদৰা আৰু নগৰহাভেলী, জম্মু-কাশ্মীৰ, দমন আৰু ডিউ, চণ্ডীগড়, দিল্লী, আন্দামান নিকোবৰ, লাক্ষাদ্বীপ আৰু পুডুচেৰী ।
তালিকা অনুসৰি বিহাৰৰ ৫১.৯১ শতাংশ জনসংখ্যা দৰিদ্ৰ । ঝাৰখণ্ডৰ ৪২.১৬ শতাংশ, উত্তৰ প্রদেশৰ ৩৭.৭৯ শতাংশ, মধ্যপ্ৰদেশৰ ৩৬.৬৫ শতাংশ, মেঘালয়ৰ ৩২.৬৭ শতাংশ আৰু অসমৰ ৩২.৬৭ শতাংশ লোক দৰিদ্ৰ । ইপিনে, উত্তৰ-পূৰ্বাঞ্চলৰ আন ৰাজ্যসমূহ যেনে নাগালেণ্ডৰ ২৫.২৩ শতাংশ লোক দৰিদ্ৰ, অৰুণাচল প্ৰদেশৰ ২৪.২৭ শতাংশ, মণিপুৰৰ ১৭.৮৯ শতাংশ, ত্ৰিপুৰাৰ ১৬.৬৫ শতাংশ আৰু মিজোৰামৰ ৯.৮০ শতাংশ লোকহে দৰিদ্ৰ ।
দেশৰ ৰাজ্যসমূহৰ ভিতৰত সবাতোকৈ কম দৰিদ্ৰ লোক আছে ক্ৰমে কেৰালা, গোৱা, ছিকিম, তামিলনাডু আৰু পঞ্জাৱত । কেৰালাৰ ০.৭১ শতাংশ, গোৱাৰ ৩.৭৬ শতাংশ, ছিকিমৰ ৩.৮২ শতাংশ, তামিলনাডুৰ ৪.৮৯ শতাংশ আৰু পঞ্জাৱৰ ৫.৫৯ শতাংশ লোকহে দৰিদ্ৰ । তদুপৰি কেন্দ্ৰীয় শাসিত অঞ্চলসমূহৰ ভিতৰত দাদৰা আৰু নগৰহাভেলী সবাতোকৈ দৰিদ্ৰতম (২৭.৩৬ শতাংশ লোক দৰিদ্ৰ) আৰু ধনী হৈছে পুডুচেৰী । ইয়াৰ মাত্ৰ ১.৭২ শতাংশ লোকহে দৰিদ্ৰ ।
অসমৰ জিলাসমূহৰ ভিতৰত সবাতোকৈ দৰিদ্ৰ হাইলাকান্দি, ইয়াৰ ৫১.০৭ শতাংশ লোকেই দৰিদ্ৰ । ইয়াৰ পাছত দৰিদ্ৰ জিলাসমূহ হৈছে ক্ৰমে – ধুবুৰীৰ ৫১.০৬ শতাংশ, কৰিমগঞ্জৰ ৪৬.০২ শতাংশ, গোৱালপাৰা ৪০.১৫ শতাংশ, বৰপেটা ৩৯.৪১ শতাংশ লোক দৰিদ্ৰ । ইয়াৰ পাছতে ক্ৰমে দৰঙৰ ৩৮.২২ শতাংশ, কাৰ্বি আংলঙৰ ৩৭.৬৩ শতাংশ, মৰিগাঁও ৩৬.৭৫ শতাংশ, তিনিচুকীয়া ৩৬.৭০ শতাংশ, চিৰাঙত ৩৬.২২ শতাংশ, বঙাইগাঁও ৩৩.০৮ শতাংশ, কোকৰাঝাৰ ৩২.০১ শতাংশ, ডিমা হাছাওৰ ৩১.০২ শতাংশ লোক দৰিদ্ৰ ।
আনহাতে, নগাঁৱৰ ৩০.০৫ শতাংশ, ওদালগুৰিৰ ২৯.৪৬ শতাংশ, ডিব্ৰুগড়ৰ ২৮.৯৭ শতাংশ, ধেমাজিৰ ২৭.৭১ শতাংশ আৰু কামৰূপৰ ২৬.২২ শতাংশ লোক দৰিদ্ৰ । ইপিনে, অসমৰ জিলাসমূহৰ ভিতৰত ধনী কামৰূপ মহানগৰ । এই জিলাখনৰ ১১.০৪ শতাংশ লোক দৰিদ্ৰ । ইয়াৰ পাছতে নলবাৰীৰ ১৬.৮৪ শতাংশ, যোৰহাটৰ ২০.২৪ শতাংশ, গোলাঘাটৰ ২০.৬০ শতাংশ, বাগ্সাৰ ২৩.৫৯ শতাংশ, লখিমপুৰৰ ২৪.২৩ শতাংশ, শোণিতপুৰৰ ২৫.৩২ শতাংশ আৰু শিৱসাগৰৰ ২৫.০৯ শতাংশ লোক দৰিদ্ৰ ।
উল্লেখ্য যে এই প্ৰতিবেদনত নীতি আয়োগৰ উপাধ্যক্ষ ৰাজীৱ কুমাৰে তেওঁৰ আগপত্ৰত কয় যে ভাৰতত বহুমাত্ৰিক দৰিদ্ৰসূচক হৈছে ৰাজহুৱা নীতি প্ৰস্তুতৰ ক্ষেত্ৰত এক গুৰুত্বপূৰ্ণ অংশীদাৰ । তদুপৰি তেওঁ কয় যে দেশৰ প্ৰথমটো এনে বহুমাত্ৰিক দৰিদ্ৰ সূচক (এমপিআই) প্ৰতিবেদন ২০১৫-১৬ৰ ৰাষ্ট্ৰীয় পৰিয়াল স্বাস্থ্য জৰীপৰ ভিত্তিত প্ৰস্তুত কৰা হৈছে ।
