Cm PressMeet
ৰাজ্যত অব্যাহত থকা নেৰা-নেপেৰা বৰষুণৰ ফলত ব্ৰহ্মপুত্ৰ সহ নৈ- উপ- নৈ ফেনেফুটুকাৰে বাঢ়ি অহাত ইতিমধ্যে বাঢ়নী পানীয়ে প্লাৱিত কৰিছে উজনি আৰু উত্তৰ অসমৰ সাত শতাধিক গাঁও। অসম ভয়ংকৰ বানৰ বিভীষিকা সম্পৰ্কত আজি প্ৰধানমন্ত্ৰী মোদীয়ে মুখ্যমন্ত্ৰী ড:হিমন্ত বিশ্বশৰ্মাৰ স’তে টেলিফোনিক বাৰ্তালাপ কৰি পৰিস্থিতিৰ বুজ লোৱাৰ লগতে সকলো প্ৰকাৰৰ সহায়ৰ আশ্বাস দিয়ে ৷
আনহাতে অসমৰ বান পৰিস্থিতি আৰু কেতবোৰ বিষয়কলৈ আজি মুখ্যমন্ত্ৰী ড:হিমন্ত বিশ্বশৰ্মাই জনতা ভৱনৰ লোকসেৱা ভৱনত সম্বোধন কৰে এক সংবাদমেল ৷ সংবাদমেলত মুখ্যমন্ত্ৰীয়ে উল্লেখ কৰা মতে,ব্ৰহ্মপুত্ৰ আৰু ইয়াৰ নৈ- উপনৈৰ পানী বিপদসীমাৰ ওপৰেৰে বৈছে। ৰাজ্যত প্রথমটো বান পাৰ হোৱাৰ পিছত এইটো দ্বিতীয় বান। এই বানত ৰাজ্যৰ ১৪ খন জিলাৰ ৪১ টাৰ ৰাজহ চক্ৰৰ ৬৯৮খন গাঁও বানৰ কবলত পৰিছে ৷ প্ৰায় ২ লাখ ৭০ হেজাৰ লোক ক্ষতিগ্ৰস্ত হৈছে। বুধবাৰে অনুষ্ঠিত হ’ব লগা কেবিনেটত বান পৰিস্থিতিৰ সন্দৰ্ভত লোৱা হ’ব গুৰুত্বপূৰ্ণ পদক্ষেপ ৷
আনহাতে কাজিৰঙা ৰাষ্ট্ৰীয় উদ্যান বছৰৰ প্ৰথমটো বানত প্লাৱিত হোৱা বুলি উল্লেখ কৰি জীৱ- জন্ত সুৰক্ষাৰ প্ৰতি লক্ষ্য ৰাখি কেতবোৰ ব্যৱস্থা গ্ৰহণ কৰা হৈছে ৷ কাজিৰঙাত ২৩৩ চেকপ’ষ্টৰ ভিতৰৰ ৯৫টা বন শিবিৰ বানৰ কবলত ৷ কাজিৰঙাৰ মাজেদি যোৱা ৰাষ্ট্ৰীয় ঘাই পথেদি গধুৰ যানবাহন চলাচলত নিষেধাজ্ঞা জাৰি কৰা হৈছে ৷ অৱশ্যে নৈশ বাছ সমূহক এঘন্টাৰ মুৰে মুৰে যাব দিয়া হ’ব ৷
মুখ্যমন্ত্ৰীয়ে লখিমপুৰৰ শেহতীয়া বান পৰিস্থিতিৰ সম্পৰ্কত উল্লেখ কৰে যে ১৩ বছৰৰ ৰেৰ্কড ভংগ কৰি বৃদ্ধি পাইছে সোৱণশিৰিৰ জলপৃষ্ঠ নেৰানেপেৰা বৰষুণৰ ফলত সোৱণশিৰিৰ জলস্তৰ বৃদ্ধি পোৱাত আজি পুৱা ৫ বজাৰ পৰা এনএইছ চিপিয়ে এৰিছে পানী | ৪০৯ কিউৱিক পানী এৰি দিছে। একেদৰে ৰঙানদী বান্ধৰ দুখনকৈ গেট খুলিছে নিপকোৱে। লগতে নিপকোৰ সৰ্তকবাণী নৈ-পৰীয়া ৰাইজলৈ।
লখিমপুৰৰ ২১ গাঁৱৰ ১১ হাজাৰ পৰিয়াল ক্ষতিগ্রস্ত হৈছে বুলি উল্লেখ কৰি মুখ্যমন্ত্ৰীয়ে কয়, ডিব্রুগড়ত বিপদসীমাৰ ওপৰেৰে বাগৰিছে ব্রহ্মপুত্রৰ পানী। একেদৰে কে’বাদিন ধৰি দি থকা নেৰা-নেপেৰা বৰষুণৰ ফলত চহৰৰ পানী ব্ৰহ্মপুত্ৰলৈ উলিয়াই নিব নোৱাৰা বাবে কৃত্ৰিম বানৰ সন্মুখীন হৈছে চহৰবাসী ৷ ইতিমধ্যে এছ ডিআৰএফ আৰু ডিব্ৰুগড় প্ৰশাসনক প্ৰয়োজনীয় পদক্ষেপ লোৱাৰ নিৰ্দেশ দিয়া হৈছে |
মুখ্যমন্ত্ৰীয়ে লগতে উল্লেখ কৰে যে,শেহতীয়া বান পৰিস্থিতিৰ বুজ ল’বলৈ তিনি গৰাকী মন্ত্ৰীক দায়িত্ব দিয়া হৈছে ৷ মন্ত্ৰী সকল হ’ল মন্ত্রী ৰঞ্জিৎ দাস, পীয়ুষ হাজৰিকা, সঞ্জয় কিষাণ ৷ একেদৰে বিধায়ক সকলকো ৰাইজৰ মাজত থাকি প্ৰয়োজনীয় সহায় – সহযোগিতা আগবঢ়োৱাৰ আহ্বান জনায় মুখ্যমন্ত্ৰী গৰাকীয়ে ৷
আজিৰ পৰা দেশত বলবৎ হোৱা তিনিখন নতুন আইন সন্দৰ্ভত মুখ্যমন্ত্ৰীয়ে কয় যে, নতুন আইন বলৱৎ হোৱাৰ পিছতে ৰাজ্যত প্রথমটো গোচৰ ৰজু হৈছে নগাঁৱত ৷ ভাৰতীয় ন্যায় সংহিতাৰ অধীনত ইতিমধ্যে ৰুজু হৈছে সংশ্লিষ্ট ধাৰা । ৰাজ্যত যাতে আইন কেইখন সুচাৰুৰূপে বলৱৎ হয় তাৰ বাবে আৰক্ষীক দিয়া হৈছে প্ৰশিক্ষণ ৷ ইতিমধ্যে ৫০০ আৰক্ষীক দিয়া হৈছে প্রশিক্ষণ ৷
আনহাতে নতুন ন্যায় সংহিতাত ব্যৱস্থা কৰা হৈছে অনলাইন এজাহাৰৰ ৷ হোৱাটচআপ আৰু ই- মেইল যোগে এজাহাৰ দিব পাৰিব ৷তিনিদিনৰ ভিতৰত ৰজু হ’ব গোচৰ ৷ অসম কেন্দ্ৰীক কেতবোৰ গুৰুতৰ বিষয়ত এতিয়াৰ পৰা ন্যায় সংহিতাৰ ধাৰা প্ৰয়োগ হ’ব ৷ ইতিমধ্যে ৰাজ্য চৰকাৰে বাল্যবিবাহৰ বিৰুদ্ধে কঠোৰস্থিতি লৈ প্ৰয়োজনীয় পদক্ষেপ লৈছে ৷ বাল্যবিবাহ কৰি নাবালিকাৰ স’তে যৌন সম্পৰ্ক কৰিলে লোৱা হ’ব কঠোৰ ব্যৱস্থা ৷ ১৬- ১৭ বছৰীয়া কিশোৰীক বিবাহ কৰিলে ধৰ্ষণৰ অভিযোগত অভিযুক্ত হ’ব ৷ একেদৰে ১৮ বছৰ তলৰ ছোৱালীৰ সৈতে শাৰীৰিক সম্পৰ্ক ৰাখিব নোৱাৰিব, যদি ৰাখে এতিয়াৰে পৰা সেইলোকক ধৰ্ষণৰ গোচৰত অভিযুক্ত হ’ব বুলি মুখ্যমন্ত্ৰীয়ে সদৰী কৰে ৷
শিক্ষা সেতু এপক লৈ মুখ্যমন্ত্রীয়ে সদৰি কৰিলে কেতবোৰ মন্তব্য ৷ শিক্ষা সেতু এপক লৈ যি বিতৰ্ক হৈছে ৷ সেইয়া অমুলক কিয়নো এপটোক লৈ কোনো সমস্যা নাই বুলি একাংশ শিক্ষকে জনাইছে। অৱশ্যে এই সন্দৰ্ভত তিনিগৰাকী অধ্যাপকক লৈ গঠন কৰা হৈছে এখন কমিটী। কমিটীত আছে গুৱাহাটী আই আই টিৰ ডীন অধ্যাপক পৰমেশ্বৰ আয়াৰ,অধ্যাপক শৰৎ কুমাৰ পাত্র আৰু কটন বিশ্ববিদ্যালয়ৰ কম্পিউটাৰ ছায়েন্সৰ অধ্যাপক ড: হিতেন চৌধুৰী।
এই তিনিজনীয়া কমিটিয়ে অতি পিছপৰা আৰু পাবত্যাঞ্চলৰ তিনিখন বিদ্যালয় পৰিদৰ্শন কৰিব আৰু এই সন্দৰ্ভত কিবা বিসংগতি থাকিলে চৰকাৰক অৱগত কৰিব৷ আনহাতে শিক্ষক সকলৰ কিবা অভিযোগ আৰু অভিজ্ঞতা জনাব বিচাৰিলে থাকিলে ৩১জুলাই ভিতৰত ই -মেইল একাউণ্ট যোগে জনাব পাৰিব ৷ অহা ১ ছেপ্টেম্বৰৰ ভিতৰত প্রকাশ কৰা হ’ব কমিটীৰ প্রতিবেদন।
এতিয়াৰে পৰা অসমৰ কোনো চিকিৎসকে কতব্যৰত সময়ত ব্যক্তিগত চিকিৎসালয়ত কাম কৰিলে চিকিৎসক ওপৰত লোৱা হ’ব বিহিত ব্যৱস্থা আৰু ব্যক্তিগত চিকিৎসালয় খনৰ লাই’চেন্স বাতিল হ’ব বুলি মুখ্যমন্ত্ৰীয়ে সদৰি কৰে ৷ তাৰোপৰি অসমৰ ৰাইজৰ সুবিধাৰ্থে চিকিৎসা ব্যৱস্থা সুনিশ্চিত কৰি ২০১৯ ৰ জুন মাহত নলবাৰীত ফ্ৰী কিডনী ড্ৰাইলেছিচ কেন্দ্ৰ মুকলি কৰা হৈছিল ৷ যোৱা ২৩-২৪ চনত ২ লাখ ২১ হাজাৰ লোকে ফ্ৰী কিডনী ড্ৰাইলেছিত অংশ গ্ৰহণ কৰিছে ৷ সেই উদ্দেশ্য অসমৰ ১২৬ টা বিধানসভা সমষ্টিত কিডনী ফ্ৰী ড্ৰাইলেছিচ চেন্টাৰ খোলাৰ পোষকতা ৰাজ্য চৰকাৰে কৰিছে বুলি সদৰী কৰে মুখ্যমন্ত্ৰীয়ে ৷