Chinese garlic is filling the Dhing market:
নিত্যব্যৱহার্য খাদ্য সামগ্ৰীৰ লগতে কেঁচা শাক-পাচলিৰ আকাশলংঘী মূল্যবৃদ্ধিয়ে ৰাজ্যৰ জনসাধাৰণক জুৰুলা কৰি অহাৰ সময়তে ধিঙত চীনা নহৰুৱে বিপর্যস্ত কৰি তুলিছে স্বাভাবিক জীবন প্রণালী। চীনা নহৰু এতিয়া ভৰি পৰিছে ধিং বজাৰ। বিগত কিছুদিন ধৰি এক অসাধু ব্যৱসায়ীৰে মধ্যভোগী দালালৰ সহযোগত এক নেক্সাচ গঢ়ি গ্ৰাহকৰ মূৰত ৰামটাঙোন শোধাই বৃহৎ মুনাফা লাভ কৰি অহাৰ গুৰুতৰ অভিযোগ উঠিছে।
বজাৰখনত নাই থলুৱা নহৰু। চীনা নহৰুকে থলুৱা নহৰু বুলি গ্রাহকক আভুৱা ভাঁৰ প্রতি কিলোগ্রাম নহৰু ২৬০ টকা দৰত বিক্ৰী কৰি মুনাফা আদায় কৰি আহিছে এই অসাধু চক্রটোরে। যাৰ বাবে গ্রাহক এতিয়া বিবুধিত পৰি দিক-বিদিক হেৰুৱাব লগা হৈছে যদিও কিন্তু নীৰৱ নগাঁও জিলা যোগান বিভাগ অথবা নগাঁও জিলা প্রশাসন। সকলো দেখি শুনিও সকলো যেন এতিয়া কুম্ভকর্ণ নিদ্রাত।
উল্লেখ্য যে একাংশ ব্যৱসায়ীয়ে মেঘালয়ৰ পৰা দৈনিক সৰবৰাহ কৰিছে চীনত উৎপাদিত এই সমূহ নহৰঃ । ইয়াৰ পাছত ধিং বজাৰত একাংশ দালালক মেনেজ কৰি চীনা নহৰৰ এক ৰমৰমীয় ব্যৱসায় এই অসাধু চক্রটোবে চলাই অহাৰ গুৰুতৰ অভিযোগ উঠিছে। কেৱল নহৰুৱে নহয়, ধিং বজাৰত এতিয়া প্রতিবিধ শাক- পাচলিয়ে হাইব্রীড। প্রতিবিধ ফচলেই অতিমাত্ৰা ৰাসায়নিক সাৰ প্রয়োগ কৰি উৎপাদিত। যি মানৱ শৰীৰৰ বাবে অতি ক্ষতিকাৰক।
আনহাতে, সামাজিক মাধ্যমত চীনা নহৰু স্বাস্থ্যৰ পক্ষে ক্ষতিকাৰক বুলি ব্যাপক চর্চা চলি থকাৰ সময়তে সেই বিষয়ে জ্ঞাত নোহোৱাকৈ অবাধে বজাৰত বিক্ৰী হৈ আছে চীনা নহৰু। বিশেষকৈ নগাঁও জিলাৰ পশ্চিমাঞ্চলৰ ধিঙৰ লগতে দাঁতিকাষৰীয়া প্ৰায়বোৰ বজাৰত এতিয়া সুলভ হৈ পৰিছে চীনা নহৰু। নগাঁও জিলা যোগান বিভাগে চীনা নহৰ বিক্ৰীৰ ক্ষেত্ৰত কেনেধৰণৰ পদক্ষেপ গ্রহণ কৰে সেয়া পৰৱৰ্তী সময়ত লক্ষ্যণীয় হ’ব।
