Number of students dropping out of school in Assam is increasing:
চৰকাৰী পক্ষই শিক্ষাকে ধৰি অসমৰ সৰ্বাংগীণ উন্নয়নৰ ধ্বনি দি থকাৰ সময়তে স্কুলীয়া শিক্ষাখণ্ডৰ এক শোচনীয় ছবি পোহৰলৈ আহিছে। স্বয়ং কেন্দ্রীয় শিক্ষা মন্ত্রণালয়ৰ তথ্যত প্রকাশ পোৱ মতে, অসমত বিগত কিছু বছৰৰ পৰা উদ্বেগজনকভাবে বৃদ্ধি পাবলৈ ধৰিছে আধাতে স্কুল এৰা (ড্রপ আউট) ছাত্র-ছাত্রীৰ সংখ্যা। আনকি অৱস্থা এনে হৈছে যে এই ক্ষেত্রত অসমে দাৰিদ্র পীড়িত বিহাৰৰ শাৰীত স্থান পাইছে।
কেন্দ্রীয় শিক্ষা মন্ত্রণালয়ৰ শিক্ষাৰ জিলা তথ্য ব্যৱস্থা (ইউডিআইএছই)ৰ ২০২৩-২৪ৰ তথ্য মতে, অসমত আধাতে স্কুল এৰা ছাত্ৰ-ছাত্ৰীৰ হাৰ ২৫.০৭ শতাংশ। এই ক্ষেত্রত অসমৰ স’তে প্রায় একে শাৰীত আছে বিহাৰ (২৫.৬৩ শতাংশ)। স্কুলীয়া শিক্ষাৰ ক্ষেত্ৰত ৰাজ্যৰ এনে তথৈবচ অৱস্থাৰ বিপৰীতে উত্তৰ-পূবৰে বিভিন্ন ৰাজ্যৰ পাৰদৰ্শিতা উন্নত।
উদাহৰণস্বৰূপে দুই পাহাৰীয়া ৰাজ্য অৰুণাচল প্রদেশত আধাতে স্কুল এৰা ছাত্ৰ-ছাত্ৰীৰ হাৰ ১৯.২৯ শতাংশ আৰু মেঘালয়ত ২২.০৬ শতাংশ। একেদৰে মণিপুৰত ১৫.৩০ শতাংশ আৰু ছিকিমত ১৯.০৫ শতাংশ। কেন্দ্রীয় শিক্ষা মন্ত্রণালয়ৰ আন এক উদ্বেগজনক তথ্য হ’ল যে ২০১৯ৰ পৰা ২০২৪ৰ সময়ছোৱাত একাংশ ৰাজ্যই স্কুলীয়া শিক্ষাৰ ক্ষেত্ৰত বিশেষ পাৰদৰ্শিতা প্ৰদৰ্শন কৰিবলৈ সক্ষম হয়। এই পাঁচটা বছৰত এনে ৰাজ্যসমূহত আধাতে স্কুল এৰা ছাত্ৰ-ছাত্ৰীৰ সংখ্যা চকুত লগাকৈ হ্রাস পায়।
ইয়াৰ উদাহৰণ হৈছে কেৰালা আৰু তামিলনাডু। এই পাঁচটা বছৰত ৰাজ্য দুখনে প্ৰদৰ্শন কৰা পাৰদৰ্শিতাক উন্নতৰ পৰা উৎকৃষ্ট আখ্যা দিয়া হৈছে। ২০১৯৩ কেৰালাত উচ্চ প্রাথমিক শিক্ষা সমাপ্ত কৰা ছাত্ৰৰ হাৰ ৯৯.৬ শতাংশ আছিল। ২০২৪ত ৰাজ্যখনত এই হাৰ এশ শতাংশলৈ বৃদ্ধি পায়। একে কথাই খাটে তামিলনাডুৰ ক্ষেত্ৰত।
২০১৯ত ৰাজ্যখনত উচ্চ প্রাথমিক শিক্ষা সমাপ্ত কৰা ছাত্ৰৰ হাৰ ৯৯ শতাংশ আছিল। ২০২৪ত ইয়াৰ হাৰ এশ শতাংশলৈ বৃদ্ধি পায়। সম্প্রতি ৰাজ্যখনত মাধ্যমিক শিক্ষা গ্রহণ কৰা ছাত্ৰৰ হাৰ ৮৯.২ শতাংশ আৰু ছাত্ৰীৰ হাৰ ৯৫.৬ শতাংশ হৈছে। ইয়াৰ বিপৰীতে বিহাৰ আৰু অসমৰ অৱস্থা পূৰ্বৰ কিছু বছৰতকৈ শোচনীয়হে হয়। অথচ প্রতিবেশী বিভিন্ন ৰাজ্যই স্কুলীয়া শিক্ষাৰ ক্ষেত্ৰত উন্নত ফলাফল প্রদর্শন কৰিবলৈ সক্ষম হৈছে।
অৱশ্যে দেশত সামগ্রিকভাবে স্কুলীয়া শিক্ষাৰ অৱস্থা দুখজনক হোৱাৰ তথ্য প্রকাশ পাইছে কেন্দ্রীয় শিক্ষা মন্ত্রণালয়ৰ তথ্যত। এই তথ্য অনুসৰি ২০১৮-১৯ত সমগ্র দেশত যিমান সংখ্যক ছাত্র-ছাত্রীয়ে স্কুলত নামভৰ্তি কৰিছিল, ২০২৩-২৪ত সেই সংখ্যা এক কোটিতকৈও অধিক হ্রাস পায়। এই ক্ষেত্ৰত দেশৰ অন্যতম বৃহৎ ৰাজ্য কর্ণাটকৰো অৱস্থা শোচনীয়। আধাতে স্কুল এৰা ছাত্ৰ-ছাত্ৰীৰ ক্ষেত্ৰত কৰ্ণাটকৰ অৱস্থা অসম আৰু বিহাৰতকৈ কিঞ্চিতহে উন্নত।
২০২৪ত কর্ণাটকত ৭৬.৫ শতাংশ ছাত্রীয়েহে স্কুলীয়া শিক্ষা সম্পূর্ণ কৰে। অৱশ্যে ২০১৯৩ ৰাজ্যখনত স্কুলীয়া শিক্ষা সমাপ্ত কৰা ছাত্ৰীৰ সংখ্যা ৭৯.৩ শতাংশ আছিল। অর্থাৎ কর্ণাটকতো স্কুলীয়া শিক্ষাৰ অৱস্থা শোচনীয় হ’বলৈ ধৰিছে। অনুৰূপ শোচনীয় অৱস্থা বিৰাজ কৰি আছে ৰাজস্থানতো।
