Heavy Rain:
অহা দুই-তিনি দিনলৈ ৰাজ্যৰ অধিকাংশ জিলাত প্ৰচুৰ বৃষ্টিপাতৰ আগজাননী দিছে ভাৰতীয় বতৰ বিজ্ঞান কেন্দ্ৰই। আজি এই সম্ভাৱনা ব্যক্ত কৰি বতৰ বিজ্ঞান কেন্দ্ৰই সদৰী কৰে যে বুধবাৰে পুৱা ওড়িছাৰ উপকূলীয় অঞ্চলৰ বংগোপসাগৰৰ দক্ষিণ-পশ্চিমত শক্তিশালী নিম্ন চাপৰ সৃষ্টি হয়। এই নিম্ন চাপৰ প্ৰভাৱ অহা ২৪ ঘণ্টাৰ ভিতৰত বংগোপসাগৰৰ দক্ষিণত বিশেষভাৱে পৰিব।
ইয়াৰ পৰিপ্ৰেক্ষিতত অসমৰ অধিকাংশ জিলাত প্ৰচুৰ বৃষ্টিপাত হ’ব। এই বৃষ্টিপাত ঠায়ে ঠায়ে অতি বৃষ্টিলৈয়ো ৰূপান্তৰিত হ’ব বুলি বতৰ বিজ্ঞান কেন্দ্রই সম্ভাৱনা ব্যক্ত কৰিছে। এই জিলাসমূহ হ’ল- কাছাৰ, হাইলাকান্দি, শ্রীভূমি, দক্ষিণ শালমাৰা-মানকাচৰ, গোৱালপাৰা, বৰপেটা, বঙাইগাঁও, পশ্চিম কাৰ্বি আংলং, কোকৰাঝাৰ, চিৰাং, বজালী, বাকসা, তামুলপুৰ, নলবাৰী, কামৰূপ মহানগৰ, কামৰূপ, দৰং, ওদালগুৰি, মৰিগাঁও, নগাঁও, হোজাই, শোণিতপুৰ আৰু ডিমা হাছাও।
ইপিনে বৃহস্পতিবাৰে কাহিলীপুৱাৰে পৰা গুৱাহাটী সহ ৰাজ্যৰ প্ৰায়টোৰ অঞ্চলত অব্যাহত আছে নেৰানেপেৰা বৰষুণ ৷ বৰষুণৰ ফলত মহানগৰীৰ অধিকাংশ অঞ্চলত কৃত্ৰিমবাৰৰ সৃষ্টি হৈছে ৷
এই সময়ছোৱাৰ বাবে গুৱাহাটী মহানগৰীৰ ক্ষেত্ৰত বিশেষ সতর্ক বার্তা আগবঢ়োৱা হৈছে। সেই অনুসৰি, প্ৰচুৰ বৃষ্টিপাতৰ ফলত কৃত্রিম বানৰ সৃষ্টি হোৱা আৰু ভূমিস্খলনৰ আশংকা ব্যক্ত কৰিছে অসম ৰাজ্যিক দুর্যোগ ব্যৱস্থাপনা প্ৰাধিকৰণে। ইয়াৰ বাবে স্পর্শকাতৰ অঞ্চলসমূহত আগতীয়া সতর্কতামূলক ব্যৱস্থা গ্রহণৰ নির্দেশ জিলা প্রশাসনক দিয়া হৈছে।
প্ৰচুৰ বৰষুণ হোৱাৰ সম্ভাৱনাৰ বাবেই অপ্রয়োজনত বিশেষকৈ গুৱাহাটী মহানগৰীত ঘৰৰ বাহিৰ নোলাবলৈ আৰু পাহাৰীয়া অঞ্চলৰ বাসিন্দাক স্পর্শকাতৰ অঞ্চলৰ ওপৰত দৃষ্টি ৰাখিবলৈ প্ৰাধিকৰণে পৰামৰ্শ আগবঢ়াইছে।
