Public Protest:
স্বাৰ্থ পূৰণ হোৱাৰ পাছত মুখ্যমন্ত্রী ড: হিমন্ত বিশ্ব শর্মা সমন্বিতে শাসক দলৰ দূৰলৈ ঠেলি দিয়া নীতিৰ বিৰুদ্ধে বুধবাৰে উত্তাল হয় সমগ্ৰ ৰাভা হাছং অঞ্চল। চলিত বর্ষতে সম্পন্ন হোৱা ৰাভা হাছং স্বায়ত্তশাসিত পৰিষদৰ নিৰ্বাচনত ৰাভা জনগোষ্ঠীয় সংগঠনসমূহক হাত কৰি বিজেপিয়ে পৰিষদখন দখল কৰাৰ পাছত ৰাজ্য চৰকাৰে ৰাভা হাছঙৰ কমেও ২১শ পৰিয়ালক উচ্ছেদ কৰি পুঁজিপতিৰ স্বাৰ্থত উপগ্ৰহীয় নগৰী স্থাপনৰ প্ৰক্ৰিয়া আৰম্ভ কৰিছে।
মুখ্যমন্ত্রী কার্যালয় (চিএমঅ’ আছাম)-এ অলপতে সামাজিক মাধ্যমযোগে এই পৰিকল্পনা ৰাজহুৱা কৰাৰ পাছত জাঙুৰ খাই উঠি বিভিন্ন ৰাভা জনগোষ্ঠীৰ লগতে আন কেতবোৰ সংগঠনে চৰকাৰী হঠকাৰিতাৰ বিৰুদ্ধে তীব্র প্রতিবাদ সাব্যস্ত কৰে। প্ৰতিবাদকাৰীসকলে ২০২৬ৰ বিধানসভা নির্বাচনত বিজেপিক উচিত প্ৰত্যুত্তৰ দিয়াৰো হুংকাৰ দিয়ে। ড: হিমন্ত বিশ্ব শৰ্মা চৰকাৰে গ্ৰহণ কৰা এই পৰিকল্পনা বাতিলৰ দাবীত আজি কামৰূপ জিলা ৰাভা ছাত্ৰ সন্থা, কামৰূপ জিলা ৰাভা মহিলা পৰিষদ আৰু কামৰূপ জিলা ষষ্ঠ অনুসূচী দাবী সমিতিৰ উদ্যোগত পলাশবাৰীৰ আৰ বি উচ্চতৰ মাধ্যমিক আৰু বহুমুখী বিদ্যালয় খেলপথাৰত এক দুঘণ্টীয়া অৱস্থান ধর্মঘট কাৰ্যসূচীৰ আয়োজন কৰা হয়।
কামৰূপ জিলা ৰাভা ছাত্ৰ সন্থাৰ সাধাৰণ সম্পাদক অংশোক নংবাকে আঁত ধৰা এই প্রতিবাদী কাৰ্যসূচীত নিখিল ৰাভা ছাত্র সংস্থাৰ কেন্দ্রীয় সভাপতি মতিলাল বাকচুক, সম্পাদক ড: সুভাষ ৰাভা, ষষ্ঠ অনুসূচী দাবী সমিতিৰ কেন্দ্ৰীয় সভাপতি দশানন ৰাভা, কৃষক শ্রমিক সংঘৰ সাধাৰণ সম্পাদক দীনেশ দাস, বৰদোৱাৰ ভোলাগাঁও আদিবাসী ছাত্ৰ সন্থাৰ সম্পাদক জয়ন্ত ওৰাং আদিয়ে বক্তব্য আগবঢ়াই চৰকাৰী হঠকাৰী নীতিক কঠোৰ ভাষাৰে গৰিহণা দিয়ে।
ইয়াৰ পাছতে হাতে হাতে বেনার-প্লেকার্ড লৈ কাৰ্যসূচীত অংশগ্ৰহণ কৰা প্ৰতিবাদকাৰীসকলে ‘জনজাতীয় আবেষ্টনী আৰু খণ্ড মুক্ত কৰা বন্ধ কৰক’, ‘ষষ্ঠ অনুসূচী দাবী সমিতি জিন্দাবাদ’, ‘নিখিল ৰাভা ছাত্র সন্থা জিন্দাবাদ’, ‘মুখ্যমন্ত্রী ড: হিমন্ত বিশ্ব শর্মা গ’ বেক’, ‘জয়ন্ত মল্ল বৰুৱা গ’ বেক’, ‘বিধায়ক হেমাংগ ঠাকুৰীয়া গ’ বেক’, ‘উপগ্ৰহীয় চহৰ আমাক নালাগে’, ‘মাটিৰ ম্যাদী পট্টা প্রদান কৰক’ আদি ধ্বনিৰে পৰিৱেশ উত্তাল কৰে। পছত প্রতিবাদকাৰীসকলে ৩৭নম্বৰ ৰাষ্ট্ৰীয় ঘাইপথেৰে বিভিন্ন ধ্বনি দি পলাশবাৰী ৰাজহ চক্ৰৰ বিষয়া কাৰ্যালয়ত উপস্থিত হৈ ৰাজহ চক্র বিষয়া অংকিতা শৰ্মাৰ হাতত মুখ্যমন্ত্রীলৈ বুলি কে’বাখনো স্মাৰকপত্র দাখিল কৰে। চক্ৰ বিষয়াই স্মাৰকপত্র গ্রহণ কৰি কয়, ‘বিভাগীয়ভাৱে আমালৈ উচ্ছেদৰ কোনো জাননী প্রদান কৰা নাই।
কিন্তু যিসকলে বায়তী বা ভূমি পট্টা পোৱা নাই, তেওঁলোকৰ বাবে যাৱতীয় কাম-কাজত ৰাইজৰ সহযোগিতাৰ আমাক প্রয়োজন।’ আনহাতে, স্মাৰকপত্ৰত ৰাভা ছাত্ৰ সন্থাই উল্লেখ কৰিছে যে পলাশবাৰী ৰাজহ চক্ৰৰ অন্তৰ্গত বৰদোৱা বাগানৰ ১৫শ একৰ ভূমিত উপগ্ৰহীয় নগৰ স্থাপন কৰিব বুলি মুখ্যমন্ত্রী কার্যালয়ে সামাজিক মাধ্যমৰ জৰিয়তে কৰা ঘোষণাই স্থানীয় খিলঞ্জীয়া লোকসকলক শংকিত কৰিছে। এই নগৰী স্থাপন হ’লে ইতিহাসে ঢুকি নোপোৱাৰ সময়ৰ পৰা বাস কৰি থকা কমেও ২১শ খিলঞ্জীয়া পৰিয়াল উচ্ছেদ হোৱাটো নিশ্চিত হ’ব বুলি ৰাভা ছাত্ৰ সন্থাই অভিযোগ উত্থাপন কৰিছে।
তদুপৰি এই উপগ্ৰহীয় নগৰ স্থাপন প্রকল্পই ৰাভাসকলৰ দীর্ঘদিনীয়া ষষ্ঠ অনুসূচী প্রাপ্তিৰ ক্ষেত্ৰতো বাধাৰ প্ৰাচীৰ সৃষ্টি কৰাৰ লগতে বৰদুৱাৰ অঞ্চলৰ খিলঞ্জীয়া জনগোষ্ঠীয় লোকসকলৰ আৰ্থ-সামাজিক, দৈনন্দিন জীৱন নির্বাহ, কৃষ্টি-সংস্কৃতি, ভাষা-জনগোষ্ঠীয় পৰম্পৰা আদিতো বিৰূপ প্রভাৱ পেলাব বুলি সংগঠনটোৱে স্মাৰকপত্ৰত উল্লেখ কৰিছে। উল্লেখ্য যে খহনীয়াগ্রস্ত লোকক বৰদুৱাৰ বাগান অঞ্চলত ১৯৫৪ আৰু ১৯৭৪ত চৰকাৰে সংস্থাপন কৰি বিশেষ আইনৰ অধীনত একে শ্ৰেণীৰ ভূমিৰ পট্টা প্ৰদান কৰে।
ইয়াৰ বিপৰীতে উক্ত অঞ্চলত যুগ যুগ ধৰি বাস কৰি অহা খিলঞ্জীয়া লোকসকলে বাৰম্বাৰ দাবী উত্থাপন কৰি অহাৰ পাছতো আজি পর্যন্ত ভূমিপট্টা লাভ কৰা নাই। এই কথা উল্লেখ কৰি ৰাভা ছাত্ৰ সন্থাই স্মাৰকপত্ৰত লগতে কয়, ‘১৬শ শতিকাত ৰাণীৰ পৰা চমৰীয়ালৈকে ৰাভাসকলে শাসন কৰা কে’বাখনো সৰু-বৰ ৰাজ্যৰ বিষয়ে ইতিহাসত পোৱা যায়। ইয়াৰ ভিতৰত বৰদুৱাৰো অন্যতম ৰাজ্য আছিল। মির্জা নাথনে লিখা ‘বাহাৰিস্তান-ই-ঘাইৰী’ত বৰদুৱাৰক এখন শক্তিশালী ৰাজ্যৰপে উল্লেখ কৰিছে।
বটুৱা নামৰ ৰজাজনে শাসন কৰালৈকে একাধিক পণ্ডিতে দাঙি ধৰিছে। ইতিহাসে ঢুকি নোপোৱা সময়ৰে পৰা এই অঞ্চলবোৰত খিলঞ্জীয়া লোকসকলে বসবাস কৰি আছিল যদিও স্থায়ী ভূমি বন্দবস্তি নকৰাকৈয়ে ঔপনিবেশিক ব্রিটিহ চৰকাৰে ১৮৬১ত বৰদুৱাৰত প্ৰথম চাহ খেতিৰ পাতনি মেলে। খিলঞ্জীয়া লোকসকলক ভূমি পট্টা নিদি ঔপনিবেশিক চৰকাৰে ১৯২২ত টি এণ্ড টিম্বাৰ কোম্পানীক হস্তান্তৰ কৰে। উক্ত অঞ্চলত শ শ বছৰ ধৰি বাস কৰা লোকসকলে ভূমি ৰক্ষাৰ বাবে আন্দোলন কৰিবলগীয়া হৈছে।’ ইয়াৰ উদাহৰণ দি ছাত্র সন্থাই লগতে কয় যে ২০০৭ত ৰাষ্ট্ৰীয় দুর্যোগ উপশম বাহিনী (এনডিআৰএফ)ৰ প্ৰশিক্ষণ কেন্দ্ৰ স্থাপনৰ বাবে বৃহৎ অঞ্চলৰ ভূমি ল’ব বিচৰা চৰকাৰী আঁচনিক তীব্র গণ আন্দোলনৰ দ্বাৰা প্ৰতিহত কৰা হয়।
তদুপৰি জনজাতীয় আবেষ্টনী আৰু খণ্ড ভংগ কৰি ২০০৯ আৰু ২০১৫ত গুৱাহাটী মহানগৰ উন্নয়ন কর্তৃপক্ষৰ সম্প্ৰসাৰণৰ দ্বাৰা অঞ্চলটোৰ খিলঞ্জীয়াসকলক উচ্ছেদৰ পৰিকল্পনাক আন্দোলনৰ জৰিয়তে প্রতিহত কৰা হয় বুলি সন্থাই উল্লেখ কৰিছে। তাৰ পাছতে ২০১৭ত ৰাজ্যিক ৰাজধানী ক্ষেত্ৰ সম্প্ৰসাৰণৰ গইনাৰে পুনৰ জনজাতীয় আবেদী আৰু খণ্ডত শান্তিপূর্ণভাৱে বসবাস কৰি থকা খিলঞ্জীয়া জনগোষ্ঠীৰ লোকসকলক চৰকাৰে উচ্ছেদৰ পৰিকল্পনা প্ৰস্তুত কৰিছিল বুলি সন্থাই অভিযোগ উত্থাপন কৰে। সন্থাই কয়, ‘এনে খিলঞ্জীয়া বিৰোধী তথা জনবিৰোধী যিকোনো চৰকাৰী সিদ্ধান্ত আৰু পদক্ষেপ ৰাভা জাতীয় সংগঠনে কোনো কাৰণতে মানি নলয়।
এনে প্ৰতিটো হঠকাৰী সিদ্ধান্তৰ বিৰুদ্ধে সদায়ে ৰাইজক লগত লৈ সবল প্রতিবাদ কৰা হৈ আহিছে। আগন্তুক সময়তো ৰাইজক লগত লৈ প্ৰবল গণতান্ত্রিক আন্দোলন গঢ়ি তুলিবলৈ আমি বদ্ধ পৰিৰ্কৰ।’ ৰাভা ছাত্ৰ সন্থাই লগতে বৰদুৱাৰ চাহ বাগিচাৰ অন্তর্গত ক্রমে এক, দুই আৰু তিনি নম্বৰ ৰাজহ গাঁৱত অতীজৰে পৰা ভূমিৰ ভোগ দখল কৰি থকা লোকসকলক শীঘ্রে ভূমি পট্টা প্ৰদানৰ দাবী উত্থাপন কৰিছে।
তদুপৰি ২০০৬ৰ বন অধিকাৰ আইনৰ অধীনত বন ভূমিত বাস কৰি থকা খিলঞ্জীয়া জনগোষ্ঠীৰ লোকসকলক শীঘ্রে বন অধিকাৰ স্বীকৃতি প্ৰমাণপত্ৰ প্ৰদান কৰিবলৈও সন্থাই চৰকাৰৰ ওচৰত দাবী উত্থাপন কৰিছে। প্ৰতিবাদকাৰী সংগঠনসমূহে স্থানীয় বিধায়ক হেমাংগ ঠাকুৰীয়াকো কঠোৰ ভাষাৰে সমালোচনা কৰিছে।
