Himanta biswa sarma:✒️মোৰ লগত থকা চাৰিটা ফোনৰ পৰা যদি প্রমোদ বড়ো, হাগ্রামা মহিলাৰী, অমিত শ্বাহ আৰু কংগ্রেছলৈ ফোনকল যায়, তেন্তে মোক আৰু কি শক্তি লাগে? তেন্তে মোতকৈ ক্ষমতাশালী (পাৱাৰফুল) মানুহ ভাৰতত আৰু কোন আছে? মোৰ লগত তেতিয়া হ’লে যুঁজ-বাগৰ নকৰা ভাল।’
শেহতীয়াকৈ প্রদেশ কংগ্ৰেছৰ সভাপতি গৌৰৱ গগৈয়ে কৰা কটাক্ষৰ প্রত্যুত্তৰ দি সোমবাৰে এই মন্তব্য কৰে মুখ্যমন্ত্রী ড° হিমন্ত বিশ্ব শর্মাই। মুখ্যমন্ত্রীয়ে লগতে কয়, ‘তেওঁ নিজেই স্বীকাৰ কৰিলে মই কিমান পাৱাৰফুল। ভৱিষ্যতে কংগ্রেছ বিজেপিলৈ অহাৰ সম্ভাৱনা আছে। অহা নিৰ্বাচনৰ পাছত কংগ্ৰেছ ক’ত থাকিব? যাৰ লগত চাৰিটা ফোন থাকে, তাৰ লগত বেলেগে কথা পাতি লাভ আছে জানো? মোক গৌৰৱ গগৈয়ে অজেয়-অপৰাজেয় কৰি তুলিলে। আজিলৈ বিজেপিৰ মানুহেই মোক ইমান প্রশংসা কৰি পোৱা নাই।’
মঙলবাৰে মুখ্যমন্ত্ৰীয়ে বিটিচিৰ ওদালগুৰি জিলাৰ পাঁচনৈ, ছেৰফাংগুৰি আৰু ৰৌতা পৰিষদীয় সমষ্টিত আয়োজিত বিজেপিৰ দুখন বিজয় সংকল্প সভাত অংশগ্রহণ কৰে। সাংবাদিকৰ আগত তেওঁ প্রদেশ কংগ্ৰেছৰ সভাপতিজনক কটাক্ষ কৰাৰ লগতে লোকসভাৰ বিৰোধী দলপতি বাহুল গান্ধীলৈও শেল এৰে।
তেওঁ কয়, ‘ৰাহুল গান্ধীয়ে যিকোনো প্ৰকাৰে ভাৰতত গণ্ডগোল লগোৱাৰ চেষ্টা কৰি আছে। কেতিয়াবা যদি জাতিৰ নামত, আন কেতিয়াবা ভোটৰ নামত! মানুহজনৰ মুখত কেতিয়াও ইতিবাচক কথা শুনা নাযায়। সংসদত পাকিস্তানক সমর্থন জনায়। গতিকে ৰাহুল গান্ধীৰ চিকিৎসা জনসাধাৰণে কৰিব।’
উল্লেখ্য যে সোমবাৰে সাংসদ গগৈয়ে মুখ্যমন্ত্রীক সমালোচনা কৰি কয় যে ড° শৰ্মাৰ চাৰিটা ফোনৰ এটাৰ পৰা কেন্দ্ৰীয় গৃহমন্ত্রী অমিত শ্বাহ, আন এটাৰ পৰা ইউপিপিএলৰ মুৰব্বী প্রমোদ বড়ো, তৃতীয়টো ফোনৰ পৰা হাগ্ৰামা মহিলাৰীলৈ আৰু চতুৰ্থটো ফোনৰ পৰা কংগ্ৰেছৰ কাৰোবালৈ ফোন যায়। গগৈৰ এই মন্তব্যৰ আজি প্রত্যুত্তৰ দিয়ে মুখ্যমন্ত্রীয়ে। লগতে তেওঁ অজাপৰ সভাপতি লুৰীণজ্যোতি গগৈকো সমালোচনা কৰে। যাৰ আদৰ্শ নাই, তেওঁ গান্ধী পৰিয়ালৰ নেগুৰত ধৰিব বুলি গগৈক সমালোচনা কৰি তেওঁ লগতে কয়, ‘ময়ো ধৰি আছিলো। ভুল বুজিলো আৰু ওলাই আহিলো।যি মানুহৰ ব্যক্তিত্ব আছে, তেনে মানুহে গান্ধী পৰিয়ালৰ নেণ্ডৰত ধৰি বেছিদিন থাকিব নোৱাৰে।’
মুখ্যমন্ত্রীয়ে আন এক তাৎপর্যপূর্ণ মন্তব্য কৰি কয় যে বিটিআৰৰ প্রমোদ বড়ো আৰু হাগ্রামা মহিলাৰীৰ লগত যাৰ ভাল থাকে তেওঁ বিধানসভাৰ ১৫খন আসন পাব। মুখ্যমন্ত্রীয়ে লগতে কয় যে ,অসমত যি ধৰণে মিঞা-মুছলমানৰ আগ্রাসন চলিছে, ১০-১৫ বছৰ পাছত অসমীয়া মানুহ জীয়াই থাকিব নোৱাৰিব।’
আনহাতে, দলীয় বিজয় সংকল্প সভাত মুখ্যমন্ত্রীয়ে বিটিচিত বিজেপিয়ে পৰিষদ গঠন কৰিলে ভিচিডিচি প্রথা বন্ধ কৰিব বুলিও ঘোষণা কৰে। ২০২০ত বিটিআৰ চুক্তি স্বাক্ষৰ হোৱাৰ সময়ত অঞ্চলটোত অনাগত দিনত সাম্প্রদায়িক-গোষ্ঠীগত সংঘর্ষ নহ’ব বুলি কোৱাৰ কথাও উল্লেখ কৰে মুখ্যমন্ত্ৰীয়ে।
তেওঁ কয়, ‘গৃহমন্ত্রী অমিত শ্বাহে মোক দায়িত্ব দিছিল যে বিটিআৰত এটাও গুলি ফুটিব নালাগে। বোমা বিস্ফোৰণ হ’ব নালাগে। মই ৰাজ্যৰ মুখ্যমন্ত্রী হোৱাৰ চাৰি বছৰ ছমাহ হ’ল; কিন্তু মই মুখ্যমন্ত্রী হোৱাৰ পাছত বিটিআৰত এজনো লোক গুলিত মৰিবলগীয়া হোৱা নাই। এটাও বোমা বিস্ফোৰণ সংঘটিত হোৱা নাই। কংগ্ৰেছৰ দিনত সাম্প্রদায়িক সংঘর্ষ, গোষ্ঠীগত সংঘর্ষ হৈছিল। কিন্তু আজি ক’তো এটাও বেয়া ঘটনা হোৱা নাই। সকলোৱে মূলসুঁতিলৈ ঘূৰি আহিল, অস্ত্রসমূহ চৰকাৰৰ হাতত দিলে।’
ফলত আজি বিটিচিৰ মানুহ নিৰাপদ হৈছে, শান্তিৰে বসবাস কৰিছে বুলিও তেওঁ মন্তব্য কৰে। তেওঁ লগতে কয় যে বিটিআৰত কোনোৱেই তৃতীয় শ্ৰেণীৰ নাগৰিক হ’ব নোৱাৰে, সকলোৱে প্রথম শ্রেণীৰ নাগৰিক হ’ব লাগিব।
এইবাৰ বাগৰুম্বা নৃত্যৰ আয়োজন কৰা হ’ব বুলি উল্লেখ কৰি মুখ্যমন্ত্রীয়ে লগতে কয়, ‘আমি বিহু পাতিলো, জুমুইৰ পাতিলো, এইবাৰ বাগৰুম্বা পাতিম। আমাৰ চকুত সকলো সমান। সেয়েহে মই ভয় নকৰাকৈ সকলো কথা ক’ব পাৰো।’ টকা নহ’লে ভিচিডিচিয়ে কাম নকৰে বুলি মুখ্যমন্ত্ৰীয়ে কালি পুনৰ ক্ষোভ প্রকাশ কৰে।
