Tezpur:তেজপুৰ বিশ্ববিদ্যালয়ৰ প্ৰৱেশদ্বাৰত উপাচার্যসহ পাঁচজনৰ জুমুঠি দাহ

তেজপুৰ বিশ্ববিদ্যালয়ৰ ইতিহাসত প্ৰথমবাৰৰ বাবে জ্বলিল বিশ্ববিদ্যালয়খনৰ উপাচাৰ্যৰ লগতে তেওঁৰ ঘনিষ্ঠৰূপে চিহ্নিত চাৰি বিভাগীয় মুৰব্বীৰ জুমুঠি। এই নজিৰবিহীন ঘটনাৰ পৰাই স্পষ্ট হৈছে বিশ্ববিদ্যালয়ৰ আভ্যন্তৰত বিভিন্ন বিষয়ক লৈ চলি থকা ক্ষোভৰ কথা। যোৱা এপষেকৰ অধিক কাল উত্তপ্ত হৈ আছে অসম চুক্তিৰ আধাৰত স্থাপিত ঐতিহ্যমণ্ডিত কেন্দ্ৰীয় বিশ্ববিদ্যালয়খনৰ চৌহদ। ইতিমধ্যে এই বিষয়বোৰে বিশ্ববিদ্যালয়ৰ চৌহদ অতিক্ৰম কৰি বাহিৰতো ৰাইজৰ মাজত তীব্র প্রতিক্ৰিয়াৰ তথা উদ্বিগ্নতাৰ সৃষ্টি কৰিছে। কালি সন্ধিয়া তেজপুৰ বিশ্ববিদ্যালয়ৰ সাম্প্ৰতিক পৰিস্থিতি আৰু ইয়াৰ কাৰণক লৈ তেজপুৰ নাগৰিক সমাজৰ এখন সভা অনুষ্ঠিত হৈ থকাৰ সময়তে তেজপুৰ বিশ্ববিদ্যালয়ৰ প্ৰৱেশদ্বাৰত উপাচাৰ্যসহ পাঁচগৰাকীৰ পুত্তলিকা দাহ কৰে।

তেজপুৰ বিশ্ববিদ্যালয়ত আজিও উপাচার্য শম্ভুনাথ সিং আৰু তেওঁৰ সহযোগীসকলৰ বিৰুদ্ধে উত্তাল প্রতিবাদ সাব্যস্ত কৰে ছাত্ৰ সমাজৰ লগতে শিক্ষক আৰু কৰ্মচাৰী সমাজে। যোৱা ২২ ছেপ্টেম্বৰৰ পৰা বিশ্ববিদ্যালয়খনত অনুপস্থিত হৈ থকা উপচার্য সিং আজি বিশ্ববিদ্যালয়খনলৈ উভতি আহিব বুলি চর্চিত হৈছিল। উল্লেখ্য যে ১৯ ছেপ্টেম্বৰৰ পৰা উপাচার্য সিঙৰ লগতে তেজপুৰ বিশ্ববিদ্যালয়ৰ প্ৰশাসনিক কর্তৃপক্ষৰ বিৰুদ্ধে ছাত্ৰ সমাজৰ ক্ষোভৰ উদ্‌দ্গীৰণ ঘটে শিল্পী জুবিন গাৰ্গৰ প্ৰতি উপাচার্য আৰু বিশ্ববিদ্যালয়ৰ প্ৰশাসনিক কর্তৃপক্ষই কৰা অপমানৰ বাবে। ইয়াৰ পাছতে ২২ ছেপ্টেম্বৰৰ পৰা ছাত্ৰ সমাজৰ স’তে বিশ্ববিদ্যালয়ৰ শিক্ষক আৰু কৰ্মচাৰী সমাজেও এই প্রতিবাদৰে চামিল হৈ উপাচার্য আৰু তেওঁৰ অনিয়মৰ সহযোগীসকলৰ বিৰুদ্ধে সৰৱ হৈ পৰে।

যোৱা তিনিটা সপ্তাহে বিশ্ববিদ্যালয়ৰ পৰা আঁতৰি থকা সিঙৰ পদত্যাগৰ দাবী বাৰম্বাৰ উত্থাপন হৈ অহাৰ পাছত আজি উপাচার্য সিঙৰ উপৰি বিশ্ববিদ্যালয়খনৰ বিত্ত বিষয়া ব্ৰজবন্ধু মিশ্র, আভ্যন্তৰীণ গুণগত মান নিশ্চিতকৰণ কোষৰ সঞ্চালক দেৱেন চন্দ্ৰ বৰুৱা, অভিযান্ত্রিক বিভাগৰ ডীন শংকৰচন্দ্ৰ ডেকা আৰু কার্যবাহী অভিযন্তা যাদৱ চন্দ্ৰ নাথৰ প্ৰতিকৃতিলৈ সন্ধিয়া ৫-৩০ বজাত বিশ্ববিদ্যালয়ত এক প্রতিবাদী সমদল উলিওৱা হয়। উপাচাৰ্যৰ স্বেচ্ছাচাৰিতাৰ বিৰুদ্ধে আৰু তেওঁৰ পদত্যাগৰ দাবী তথা সংঘটিত দুর্নীতি-অনিয়মৰ বিৰুদ্ধে কৰা ছাত্র, শিক্ষক আৰু কৰ্মচাৰীয়ে পুত্তলিকাত জোতা, চেণ্ডেল ওলোমাই সমদল উলিওৱাৰ পাছত প্ৰতিকৃতি দাহ কৰে।