ছবছৰ পূৰ্বৰ ২০১৯ৰ পুলৱামা কাণ্ডৰ মূল পৰিকল্পক ওমৰ ফাৰুকৰ পত্নী আফিৰা বিবিয়েও জইছ-ই-মহম্মদত যোগদান কৰাৰ তথ্য পোহৰলৈ আহিছে। সূত্ৰৰ মতে, দিল্লী বিস্ফোৰণৰ কেইসপ্তাহমান পূর্বে আফিৰা বিবিয়ে জইছৰ নাৰী গোট জামাত-উল-মুমিনাটত যোগদান কৰে। সেই সূত্রে তেওঁ এই নাৰী সন্ত্রাসবাদী গোটৰ মুৰব্বী ছাদিয়া আজহাৰৰ স’তে কাম কৰাৰ তথ্য পোহৰলৈ আহিছে।
সম্প্রতি তেওঁ জামাত-উল-মুমিনাটৰ খুৰা বা উপদেষ্টা পৰিষদত কাৰ্যনিৰ্বাহ কৰি থকাৰ তথ্য চোৰাংচোৱাই উদ্ধাৰ কৰিছে। আনহাতে, জইছ-ই-মহম্মদৰ নাৰী গোট জামাত-উল-মমিনাটে পুঁজি সংগ্ৰহ আৰু সদস্যাভৰ্তিৰ বাবে অনলাইনৰ সহায় লোৱাৰ তথ্য তদন্তকাৰীয়ে উদ্ধাৰ কৰিছে। জেহাদী সংগঠনৰ প্ৰতি মুছলমান যুৱতী-মহিলাক আকৰ্ষণৰ উদ্দেশ্যে সন্ত্রাসবাদী সংগঠনটোরে এক অনলাইন প্রশিক্ষণ পাঠ্যক্ৰমো মুকলি কৰিছে।
এই পাঠ্যক্ৰমৰ অধীনত জইছ-ই-মহম্মদৰ কমাণ্ডাৰসকলৰ পৰিয়ালৰ সদস্যাসকলক জেহাদী হ’বলৈ প্ৰৰোচনা দিয়া হয়। তদুপৰি আৰ্থিকভাৱে দুৰ্বল মুছলমান পৰিয়ালৰ যুৱতী-মহিলাকো সংগঠনটোরে জেহাদী কার্যকলাপত লিপ্ত কৰিবলৈ চেষ্টা কৰি থকাৰ তথ্য তদন্তকাৰীয়ে উদ্ধাৰ কৰিছে। সূত্ৰৰ মতে, যোৱা আঠ নৱেম্বৰত সন্ত্রাসবাদী সংগঠনটোরে নিযুক্তি অভিযান আৰম্ভ কৰে। এই ক্ষেত্ৰত গুৰি ধৰে মাছুদ আজহাৰৰ দুই ভগ্নী ছাদিয়া আৰু ছামাইৰাই। দুয়ো ৪০ মিনিটৰ অনলাইন বক্তৃতা অনুষ্ঠিত কৰে।
শ্রীনগৰ মেডিকেল কলেজত ছাত্ৰ-ছাত্ৰীৰ মগজু প্রক্ষালন কৰা কোন এই ইৰফান আহমেদ?অপাৰেছন সিন্দূৰত যোৱা মে’ত ভাৰতীয় প্ৰতিৰক্ষা বাহিনীয়ে ৰাজহাড় ভঙা পাকিস্তানী সন্ত্রাসবাদী সংগঠন জইছ-ই-মহম্মদে একাংশ ভাৰতীয়ৰ সহযোগত ভাৰতলৈ নেটৱৰ্ক বিস্তাৰৰ তথ্য ইতিমধ্যে ফাদিল হৈছে। দিল্লীৰ যোৱা সোমবাৰৰ সন্ধিয়া বিস্ফোৰণৰ আগৰে পৰা কে’বাজনো সন্ত্রাসবাদী জালত পৰিছে। পাকিস্তানী সন্ত্রাসবাদীৰ হৈ কাম কৰা আনসকলৰ বিৰুদ্ধে তদন্তকাৰী সংস্থাই অনুসন্ধান অব্যাহত ৰাখিছে।
এনে অৱস্থাতে পোহৰলৈ আহিছে যে জেহাদী সংগঠনত অন্তর্ভুক্ত কৰোৱাৰ পৰিকল্পনাৰে একাংশই শ্রীনগৰৰ চৰকাৰী চিকিৎসা মহাবিদ্যালয়ৰ ছাত্ৰ-ছাত্ৰীৰ মগজুৰ প্ৰক্ষালন কৰি আহিছে। এই দেশবিৰোধী কাৰ্যৰ স’তে ইৰফান আহমেদ নামৰ এজন জড়িত থকাৰ তথ্য তদন্তকাৰী সংস্থাই উদ্ধাৰ কৰিছে। ফৰিদাবাদত বিস্ফোৰক মজুতৰ আঁৰত কোন আছে, ইয়াৰ মূল পৰিকল্পনাকাৰী কোন আদি সন্দৰ্ভত তদন্তকাৰী সংস্থাই চলোৱা অনুসন্ধানত এই তথ্য পোহৰলৈ আহিছে।
সূত্রই জনোৱা মতে, ইৰফান শ্রীনগৰ চৰকাৰী চিকিৎসা মহাবিদ্যালয়ৰ প্রাক্তন স্বাস্থ্যকর্মী। সেই সূত্রে চিকিৎসা মহাবিদ্যালয়খনৰ ছাত্ৰ-ছাত্ৰীৰ স’তে তেওঁৰ যোগাযোগ আছে বুলি তদন্তকাৰীয়ে সন্দেহ কৰিছে। তদন্তকাৰীৰ ধাৰণা হ’ল যে এই যোগাযোগ সূত্রেই তেওঁ জেহাদী সংগঠনত ভর্তিৰ উদ্দেশ্যে ছাত্র-ছাত্ৰীসকলৰ মগজু প্রক্ষালন কৰি আছে। নানা ধৰণৰ সন্ত্রাসবাদী কার্যকলাপত লিপ্ত হ’বলৈও তেওঁ ছাত্র-ছাত্রীসকলক প্ৰৰোচিত কৰি অহাৰ তথ্যও তদন্তকাৰীয়ে উদ্ধাৰ কৰিছে।
এই সম্পৰ্কত এক সূত্রই সংবাদ মাধ্যমক জনায় যে নওগামৰ এটা মছজিদলৈ উক্ত চিকিৎসা মহাবিদ্যালয়ৰ ছাত্ৰ-ছাত্ৰীক মাতি নিয়ে। তাতে তেওঁ ছাত্র-ছাত্রীসকলক সন্ত্রাসবাদী সংগঠনত ভর্তি হ’বলৈ প্ৰৰোচনা দিয়ে। সূত্ৰৰ মতে, ফৰিদাবাদ কাণ্ডৰ দুই ধৃত অভিযুক্ত ডাঃ মুজাম্মিল আহমেদ আৰু ডাঃ আদিল মাজিদ ৰাথেৰৰ স’তে ইৰফানৰ যোগাযোগ আছিল। তদুপৰি দিল্লী বিস্ফোৰণ কাণ্ডত জড়িত থকা বুলি তদন্তকাৰীয়ে সন্দেহ কৰা ডাঃ ওমৰ নবীৰ স’তেও তেওঁৰ যোগাযোগ আছে বুলিও তদন্তকাৰীয়ে সন্দেহ কৰিছে।
ইতিমধ্যে ইৰফানক আৰক্ষীয়ে গ্ৰেপ্তাৰ কৰিছে। অৱশ্যে ডাঃ ওমৰ নবী পলাতক অৱস্থাত আছে। তেওঁক সন্ত্রাসবাদী কার্যকলাপত লিপ্ত থকাৰ অভিযোগত শ্রীনগৰ চিকিৎসা মহাবিদ্যালয় কর্তৃপক্ষই বহিষ্কাৰ কৰা বুলিও সূত্রই জনায়। বহিষ্কাৰৰ পাছত তেওঁ ফৰিদাবাদৰ আল-ফালাহ চিকিৎসা মহাবিদ্যালয়ৰ স’তে সম্পর্ক গঢ়ি তোলে বুলিও সূত্রই সদৰী কৰিছে।