Pakistan-Afghanistan War Updates:
মাৰ্কিন যুক্তৰাষ্ট্ৰ আৰু ইৰাণৰ মাজত যুদ্ধ সংঘটিতৰ আশংকা প্ৰকট হৈ থকাৰ সময়তে এইবাৰ পাকিস্তান-আফগানিস্তানৰ মাজত আৰম্ভ হ’ল যুদ্ধ ৷ পবিত্ৰ ৰমজান মাহত দুই চুবুৰীয়া ৰাষ্ট্ৰৰ মাজত সংঘটিত ভয়ংকৰ যুদ্ধত চিন্তাম্বিত হৈ পৰিছে বিশ্ব সম্প্ৰদায় ৷
নিশা পাকিস্তানৰ তৰফৰ আৰম্ভ হোৱা এয়াৰষ্টাইকত ১৩৩ আফগান তালিবানৰ মৃত্যু হোৱাৰ লগতে ২০০ৰো অধিক আহত হয় ৷ একেদৰে ২৭টা সামৰিক চকী ধ্বংস কৰি ৯ তালিবাণীসামৰিক চকী দখল কৰি ৮০ খনতকৈও অধিক টেংক, আর্টিলাৰী, সাজসজ্জিত বাহন ধ্বংস কৰাৰ দাবী কৰিছে পাক চৰকাৰে ৷ ইয়াৰ বিপৰীতে আফগানিস্তানৰ দাবী তেওঁলোকৰ প্ৰত্যক্ষ আক্ৰমণত পাকিস্তানৰ ৫৫ সৈনিক নিহত হোৱাৰ লগতে ভূপতিত কৰিছে পাকিস্তানৰ এখন যুদ্ধ জেট আৰু ১৯টা সামৰিক চকী ধ্বংস কৰাৰ লগতে দুটা ঘাটি দখল কৰিছে।
শেহতীয়া প্ৰাপ্ত খবৰ অনুসৰি পাকিস্তান আৰু আফগানিস্তানৰ মাজত সংঘাত তীব্ৰতৰ হৈ পৰিছে। পাকিস্তানী সেনাই শুকুৰবাৰে পুৱতি নিশা কাবুল, কান্দাহাৰ, পাকতিয়াত বিমান আক্ৰমণ চলাই তালিবানে সীমান্ত চকীত বৃহৎ আক্ৰমণ চলায়। দুয়োপক্ষৰ পৰা প্ৰতিশোধমূলক গুলীচালনাই উত্তেজনা বৃদ্ধি কৰিছে৷ পাকিস্তানী ৰাষ্ট্ৰপতি আছিফ আলী জাৰ্দাৰীয়ে দেশখনক সুৰক্ষা দিয়াৰ প্ৰতিশ্ৰুতি দিয়াৰ বিপৰীতে তালিবানেও তীব্ৰতৰ আক্ৰমণ অব্যাহত ৰাখিছে।
ইফালে তালিবান চৰকাৰৰ মুখপাত্ৰ জাবিহুল্লাহ মুজাহিদে কঠোৰ প্ৰতিশোধৰ সকীয়নি দিয়ে। আফগান প্ৰতিৰক্ষা মন্ত্ৰালয়ে প্ৰকাশ কৰা অনুসৰি বৃহস্পতিবাৰে নিশা পাকিস্তানী বাহিনীয়ে আফগান ভূখণ্ডত আক্ৰমণ চলাই মহিলা আৰু শিশুক হত্যা কৰে ম। মন্ত্ৰালয়ৰ মতে, আফগান বাহিনীয়ে পাক্তিকা, পাকটিয়া, খোষ্ট, নাংগাৰহৰ, কুনাৰ, আৰু নুৰিস্তান প্ৰদেশত প্ৰতিশোধ লয় আৰু পাকিস্তানী সৈন্যক পিছুৱাই দিয়ে। এই যুদ্ধত দুটা সামৰিক ঘাটি আৰু ১৯টা চকী দখল কৰা হয় আৰু চাৰিটা ঘাটিৰ পৰা পাকিস্তানী সৈন্যই পলায়ন কৰে।
দুয়োখন দেশৰ সংঘাতৰ মাজতে কাটাৰৰ যুদ্ধবিৰতিৰ বাবে পদক্ষেপ আগবাঢ়িছে যদিও বিশেষ ফলৱতী হোৱাৰ আশা নাই ৷
