দিল্লীতৰ বিবেক বিহাৰ অঞ্চলত এটা চাৰিমহলীয়া আৱাসিক ভবনত সংঘটিত হোৱা ভয়ংকৰ অগ্নিকাণ্ডত কমেও ন জন লোকৰ মৃত্যু হোৱা বুলি নিশ্চিত হৈছে। ঘটনাটোত আৰু দুজন লোক গুৰুতৰভাৱে আঘাতপ্ৰাপ্ত হৈছে।
অগ্নিকাণ্ডৰ সঠিক কাৰণ এতিয়াও স্পষ্ট নহ’লেও প্ৰাথমিকভাৱে এচি (বাতানুকূল যন্ত্ৰ) বিস্ফোৰণৰ ফলতেই এই দুৰ্ঘটনা সংঘটিত হোৱা বুলি সন্দেহ প্ৰকাশ কৰা হৈছে।
আৰক্ষী আৰু অগ্নিনিৰ্বাপক বাহিনীৰ সূত্ৰে জনোৱা মতে, দেওবাৰৰ পুৱতি নিশা প্ৰায় চাৰি বজাত হঠাৎ ভবনটোত জুই লাগি যায়। অলপ সময়ৰ ভিতৰতে জুইয়ে ভয়ংকৰ ৰূপ ধৰি লৈ সমগ্ৰ এলাকা ক’লা ধোঁৱাই আচ্ছন্ন কৰি তোলে। ঘটনাই তৎক্ষণাত আতংকৰ সৃষ্টি কৰে।
খবৰ লাভ কৰিয়েই ঘটনাস্থলীত উপস্থিত হয় আৰক্ষী আৰু অগ্নিনিৰ্বাপক বাহিনীৰ ১৪টা ইঞ্জিন। জুইৰ ফলত বহু বাসিন্দা ঘৰখনৰ ভিতৰতেই আৱদ্ধ হৈ পৰে। তৎক্ষণাৎ আৰম্ভ কৰা উদ্ধাৰ অভিযানত কেবাজনো লোকক উদ্ধাৰ কৰা হয় যদিও, অগ্নিদগ্ধ হৈ এতিয়ালৈকে ন জনৰ মৃত্যু হৈছে।
আহতসকলক তৎকালীনভাৱে ওচৰৰ চিকিৎসালয়লৈ প্ৰেৰণ কৰা হৈছে। অগ্নিনিৰ্বাপক বাহিনীৰ মতে, প্ৰথমে ভবনটোৰ দ্বিতীয় মহলাত জুইৰ সূত্ৰপাত ঘটে আৰু তাৰ পাছতে সেয়া দ্ৰুতগতিত আন অংশলৈ বিস্তাৰ লাভ কৰে। প্ৰায় দু ঘণ্টাৰ কঠোৰ প্ৰচেষ্টাৰ অন্তত জুই নিয়ন্ত্ৰণলৈ অনা হয়।
ঘটনাটোৰ পাছতে আৰক্ষীয়ে তদন্ত আৰম্ভ কৰিছে। অগ্নিকাণ্ডৰ প্ৰকৃত কাৰণ কি আৰু কোনো প্ৰকাৰৰ অৱহেলা জড়িত আছে নেকি, সেই সকলো দিশত সূক্ষ্মভাৱে অনুসন্ধান চলোৱা হৈছে।
