SindhuRiver :পহলগাম আক্ৰমণৰ পাছতে সিন্ধু জলবণ্টন চুক্তি স্থগিত কৰে ভাৰতে। নতুন দিল্লীয়ে স্পষ্টভাৱে জনাই দিছে—ৰক্ত আৰু পানী একেলগে বৈ থাকিব নোৱাৰে। এনে সংঘাতপূৰ্ণ পৰিস্থিতিৰ মাজতে এইবাৰ লাদাখত সিন্ধু নদীৰ ওপৰত প্ৰথমটো পাথৰৰ বান্ধ নিৰ্মাণ কৰিলে ভাৰতে।
তথ্য অনুসৰি, লেহৰ পৰা প্ৰায় ৫০ কিলোমিটাৰ দূৰত উপশি অঞ্চলত এই বান্ধটো নিৰ্মাণ কৰা হৈছে। ইয়াৰ মূল লক্ষ্য হৈছে লাদাখৰ কৃষি আৰু জলসিঞ্চন ব্যৱস্থা শক্তিশালী কৰা। অৱশ্যে ভাৰতৰ এই পদক্ষেপক লৈ স্বাভাৱিকভাৱেই চিন্তিত পাকিস্তান।
চিমেণ্ট ব্যৱহাৰ নকৰাকৈ নদীৰ প্ৰস্থৰ দিশত বৃহৎ বৃহৎ পাথৰ স্থাপন কৰি প্ৰাকৃতিকভাৱে এই বান্ধটো নিৰ্মাণ কৰা হৈছে। ইয়াৰ ফলত নদীৰ জলস্তৰ প্ৰায় ১০ ফুট বৃদ্ধি পাইছে। এই পানী ‘ইগু ফে’ খালৰ জৰিয়তে কৃষিভূমিলৈ যোগান ধৰা হৈছে।
ইয়াৰ ফলত এই অঞ্চলৰ কৃষকসকলৰ দীৰ্ঘদিনীয়া এটা ডাঙৰ সমস্যাৰ সমাধান হ’ব বুলি ধাৰণা কৰা হৈছে। আচলতে বসন্তকালত খেতিৰ সময়ত সিন্ধু নদীৰ জলস্তৰ কমি যোৱাৰ ফলত পাম্পৰ সহায়ত পানী তোলাটো কঠিন হৈ পৰে।
বিশেষকৈ যিবোৰ অঞ্চলত নদীখন গভীৰ গিৰিখাতৰ মাজেৰে বৈ গৈছে, তাত এই সমস্যা অধিক প্ৰকট হয়। ফলত কৃষিকাৰ্যৰ বাবে পৰ্যাপ্ত পানী লাভ কৰিবলৈ কৃষকসকলে সমস্যাৰ সন্মুখীন হ’বলগীয়া হয়।
প্ৰাপ্ত তথ্য অনুসৰি, নতুনকৈ নিৰ্মাণ কৰা এই বান্ধটোৰ দৈৰ্ঘ্য ২০০ ফুট। ইয়াৰ পানী ধাৰণ ক্ষমতা প্ৰায় ৪ কোটি লিটাৰ। এই পানী গাঁৱৰ কৃষিভূমিসমূহলৈ যোগান ধৰা সম্ভৱ হ’ব। ফলত কৃষকসকল উপকৃত হ’ব।
উল্লেখ্য যে, শেহতীয়াকৈ নেদাৰলেণ্ডছৰ দ্য হেগস্থিত আন্তঃৰাষ্ট্ৰীয় সালিশী আদালতে ৰায় দিছিল যে পাকিস্তানৰ স’তে হোৱা সিন্ধু জলবণ্টন চুক্তি ভাৰতে মানি চলিব লাগিব। কিন্তু নতুন দিল্লীয়ে সেই ৰায় নাকচ কৰে। ইয়াৰ পিছতে চাপত পৰে পাকিস্তান।
এই পৰিস্থিতিত সিন্ধু জলবণ্টন চুক্তিক লৈ ভাৰতৰ স’তে আলোচনাৰ মেজত বহিবলৈ আগ্ৰহ প্ৰকাশ কৰিছে ইছলামাবাদে। এই সকলোবোৰৰ মাজতে লাদাখত সিন্ধু নদীৰ ওপৰত ভাৰতৰ বান্ধ নিৰ্মাণৰ খবৰ পোহৰলৈ আহিছে।
