MissWorldFinal: দৈনিক অগ্ৰদূত ডিজিটেল ডেস্ক: সৌন্দৰ্য প্রতিযোগিতাৰ মঞ্চতো সন্মানিত হ’ল লিয়নেল মেছি। ভিয়েটনামত আয়োজিত ‘মিছ ৱৰ্ল্ড’ প্রতিযোগিতাৰ ফাইনেলত চমক দিলে আর্জেন্টিনাৰ প্ৰতিযোগী এলিনা লুজ আক্সেলৰাডে।
আর্জেন্টিনাৰ বিশ্বকাপ জয়ী অধিনায়কজনৰ ফুটবল জীৱনৰ নানা মুহূৰ্তক সংগী কৰি মঞ্চত উপবিষ্ট হৈ সকলোৰে দৃষ্টি আকর্ষণ কৰিলে প্রতিযোগীগৰাকীয়ে।
বিশ্ব সুন্দৰী প্ৰতিযোগিতাৰ মঞ্চলৈ নানা নক্সাৰ ৰং-বিৰঙৰ পোছাক পৰিধান কৰি আহিছিল বিভিন্ন দেশৰ প্ৰতিযোগীসকলে। নানা পোছাকৰ ভিৰতো পৃথকে দৃষ্টি আকর্ষণ কৰে এলিনাই।
তেওঁৰ নীলা-বগা পোছাক হৈ পৰিছিল মেছিময়। সদ্য অৱসৰপ্ৰাপ্ত আর্জেন্টিনাৰ প্ৰাক্তন অধিনায়কজনৰ ফুটবল জীৱনৰ নানা মুহূৰ্তৰ ছবিয়ে ধৰা দিছিল তেওঁৰ পোছাকত।
বিশ্বকাপ হাতত লৈ মেছি বা যোৱা বিশ্বকাপৰ ফাইনেলৰ পাছত হতাশ মেছি-সকলোবোৰেই আছিল এলিনাৰ পোছাকত। বিশেষভাৱে পৰিকল্পনা কৰা পোছাকৰ ওপৰৰ অংশ আর্জেন্টিনা ফুটবল দলৰ নীলা-বগা জাৰ্ছিৰ দৰে।
আনহাতে, তলৰ অংশত কেৱল মেছি। এইদৰেই কিছুদিনৰ পূর্বে আন্তর্জাতিক ফুটবলৰ পৰা অৱসৰ গ্ৰহণ কৰা তাৰকা ফুটবলাৰজনলৈ সন্মান প্রদর্শন কৰিলে ‘মিছ আর্জেন্টিনা’ই।
এলিনাৰ পোছাকৰ পৰিকল্পক অৰেলিয়ো মার্টিনেজে মেছিৰ ফুটবল জীৱনৰ নানা মুহূৰ্তক ধৰি ৰাখিছে। নিউ বেলছ বয়জ, বার্চিলোনা, পেৰিছ ছেইন্ট জার্মেইন, ইণ্টাৰ মায়ামিৰ জাৰ্ছিত মেছিৰ বিভিন্ন মুহূৰ্ত যিদৰে আছে, সেইদৰে আছে দেশৰ হৈ খেলাৰ সময়ত উচ্ছ্বাস বা বা হতাশাৰ একাধিক ছবি।
