এতিয়াই খেতি নকৰিলে ৰাজ্যত সৃষ্টি হ’ব ভয়াবহ সংকটৰ: কৃষিমন্ত্ৰী অতুল বৰাৰ আশংকা
তলাবন্ধৰ ফলত ৰাজ্যৰ কৃষি ক্ষেত্ৰ ব্যাপক লোকচানৰ সন্মুখীন হৈছে। উৎপাদন, উৎপাদক সকলোৱে বৃহৎ ক্ষতিৰ কবলত পৰা বুলি এক সংবাদমেলত সদৰী কৰে ৰাজ্যৰ কৃষি আৰু পশুপালন- পশু চিকিৎসা বিভাগৰ মন্ত্ৰী অতুল বৰাই। তেওঁ সদৰী কৰা অনুসৰি ৰাজ্যৰ ১৬ খন জিলাত এই ক্ষতিৰ ব্যাপক প্রভাৱ পৰিছে আৰু প্রাথমিক হিচাপ অনুসৰি ৩,৫৭১ মেট্ৰিক টন কেৱল ফলমূল আৰু পাচলিয়েই নষ্ট হৈছে। বৃহৎ পৰিমানত লোকচান হোৱা পাচলি আৰু ফলমূলৰ ভিতৰত আছে বিলাহী, বেঙেনা, ফুলকবি, বন্ধাকবি, কল আৰু ষ্ট্ৰবেৰী।
উৎপাদন অনুসৰি বিক্ৰী নোহোৱা, মানুহে অপ্ৰচাৰত শংকিত হৈ পাচলি ক্ৰয় কৰিবলৈ অনিচ্ছুক হোৱা, হোটেল-ৰেস্তোৰাঁ আদি বন্ধ হৈ থকা, বহিঃ ৰাজ্যলৈ ৰপ্তানি বন্ধ হোৱা আদিয়েই এনে লোকচানৰ মূল কাৰণৰ উপৰিও উৰাবাতৰিয়ে উৎপাদকসকলক বিশেষভাৱে ক্ষতি কৰিছে। অন্যহাতে, চৰকাৰে ভাইৰাছ সংক্ৰমণ নহ’বলৈ সতৰ্কতামূলক ব্যৱস্থা অৱলম্বন কৰি কৃষকক কৃষি কাৰ্যৰ বাবে উৎসাহিত কৰিছে। কাৰণ এতিয়াই খেতি নকৰিলে পাছত যথেষ্ট সংকট আহিব। চৰকাৰে ইতিমধ্যে কৃষকসকলৰ সুবিধাৰ্থে বিভিন্ন পদক্ষেপ ৰূপায়ন কৰাৰ লগতে আৰ কে ভি ৱাইৰ আঁচনিৰ অধীনত ৪.১৭ কোটি টকা মোকলাই দিয়া হৈছে বুলি জনায়। তদুপৰি ৰাজ্যৰ পঞ্জীয়ন থকা ছয় লাখ কৃষকক আঢ়ৈ হেজাৰ টকাকৈ আগবঢ়োৱাৰ প্ৰক্ৰিয়াও আৰম্ভ হৈছে আৰু এতিয়ালৈ ২.১১ লাখক সেই ধন আদায় দিয়া হৈছে।
পশুপালন আৰু পশু চিকিৎসা বিভাগৰ প্ৰসংগত মন্ত্ৰী বৰাই জনাই যে কণী আৰু গাখীৰৰ যোগান বৰ্তমান স্বাভাৱিক হৈ উঠিছে। মাংসৰ যোগানো আৰম্ভ কৰাৰ ভবা-চিন্তা কৰা হৈছে। কৃষিৰ ক্ষেত্ৰত কৃষকক বীজ যোগান, আৰ্থিক সহায় আদিৰ দৰে যিবোৰ ব্যৱস্থা গ্ৰহণ কৰা হৈছে তেনেদৰে পশুপালনৰ ক্ষেত্ৰতো চৰকাৰে ব্যৱস্থা লব বুলি মন্ত্ৰী বৰাই আশ্বাস দিয়ে। প্ৰসংগক্ৰমে তেওঁ কয় যে পশু খাদ্য যোগানৰ বাবে অসমত থকা ১৪ টা মিল খোলাৰ সিদ্ধান্ত লৈছে চৰকাৰে। অৱশ্যে তেওঁ দাবী কৰে যে অসমত পশু খাদ্য যোগান পৰ্যাপ্ত আছে, কিন্তু সৰবৰাহত অসুবিধা হৈছে। বৰো ধানৰ খেতিত প্ৰয়োজন হোৱা সাৰ-ডিজেল আদিৰ ক্ষেত্ৰতো হোৱা বুলি তেওঁ কয়।
