Book Fair in Dhemaji :
‘অসমীয়া গল্প উপন্যাসত জনগোষ্ঠীয় চেতনা” শীৰ্ষক আলোচনা সত্ৰ আজি বৌদ্ধিক চৰ্চাৰ কেন্দ্ৰবিন্দু হৈ পৰে ধেমাজিত অব্যাহত থকা অসম গ্ৰন্থমেলা ৷ অসম প্ৰকাশন পৰিষদ আৰু সদৌ অসম পুথি প্ৰকাশক আৰু বিক্ৰেতা সংস্থাই যৌথভাৱে ধেমাজি কাছাৰী ময়দানত অনুষ্ঠিত কৰা গ্ৰন্থমেলাত এই আলোচনা সত্ৰ সঞ্চালনা কৰে বিশিষ্ট সাহিত্য গৱেষক অনুবাদক , ডিমৌ মহাবিদ্যালয়ৰ প্ৰাক্তন অধ্যাপক ড° মামণি গগৈ বৰগোহাঞিয়ে ৷
বিষয় প্ৰসংগত তেওঁ কয়—“চেতনা হৈছে মনৰ ভিতৰত হোৱা এক ধৰণৰ জাগৰণ ৷ এই দিশেৰে বা ধাৰণাৰে বিশ্লেষণ কৰিলে এটা কথা ক’ব পাৰি যে জনগোষ্ঠীয় চেতনাৰে অসমীয়া সাহিত্য চহকী হৈছে আৰু এই সাহিত্যৰে জনগোষ্ঠীয় সমাজত বিভিন্ন চেতনা জাগৰিত হৈছে ৷ কিয়নো গল্প-উপন্যাসে ন্যায় সংগত অধিকাৰ , সংস্কৃতিৰ মূল্য , নতুন, জীৱনবোধ ,ভাষাৰ প্ৰতি দায়িত্বশীলতা , প্ৰকৃতিৰ প্ৰতি সচেতনতা আদি বিভিন্ন বিষয় তুলি আনে ৷
ইয়াৰ দ্বাৰা সাহিত্য আৰু সমাজ উভয়ে ঋদ্ধি লাভ কৰে ৷”তেওঁ লগতে কয় যে অসম আৰু উত্তৰ-পূৰ্বাঞ্চল জনগোষ্ঠীয় সমাজৰ বিচিত্ৰতাৰে জিলিকি থকা ভূমি ৷ সেইবাবে অসমীয়া গল্প-উপন্যাসত জনগোষ্ঠীয় চেতনাৰ পোহৰ পৰাটো তেনেই স্বাভাৱিক ৷
আলোচনা সত্ৰত অংশগ্ৰহণ কৰি বিশিষ্ট লেখক-সমালোচক , ছয়দুৱাৰ মহাবিদ্যালয়ৰ প্ৰাক্তন অধ্যক্ষ ড° অঞ্জন ওজাই কয় যে “ অসমীয়া গল্প-উপন্যাস জনগোষ্ঠীয় চেতনাৰে সমৃদ্ধ হৈ আছে ৷ ৰজনীকান্ত বৰদলৈয়ে মিৰি জীয়ৰীৰ জৰিয়তে এই বাট মুকলি কৰিছিল ৷ বৰদলৈ কিন্তু অজনজাতীয় ব্যক্তি আছিল ৷
তেতিয়াৰ পৰা এতিয়ালৈকে জনজাতীয়, অজনজাতীয় বহু ঔপন্যাসিক আৰু কথাশিল্পীয়ে জনগোষ্ঠীয় সমাজ সংস্কৃতিৰ চেতনাৰে গল্প-উপন্যাস ৰচনা কৰি আহিছে ৷ মিচিং , কাৰ্বি , বড়ো , ৰভাকে ধৰি সকলো সৰু-বৰ জনগোষ্ঠীৰ জন-জীৱন লৈ কালজয়ী উপন্যাস সৃষ্টি হৈছে অসমীয়া ভাষাত ৷ এই সৃষ্টিকৰ্ম সমূহে সামগ্ৰিকভাৱে অসমীয়া গদ্য সাহিত্যক ঐশ্বৰ্যশালী কৰি তুলিছে ৷”
তেওঁ এইক্ষেত্ৰত অসম তথা অৰুণাচলৰো কেবাগৰাকী দিক্গজ সাহিত্যিকৰ বহুল পঠিত আৰু সমাদৃত সাহিত্যকৰ্মৰ বিষয়ে উল্লেখ কৰে ৷ সাম্প্ৰতিক কালৰ গল্পকাৰ ঔপন্যাসিকসকলেও জনগোষ্ঠীয় সমাজ-জীৱনলৈ অহা বিভিন্ন পৰিৱৰ্তন , বিছিন্নতাবাদৰ আধাৰত গঢ়ি উঠা সংগ্ৰাম আৰু ইয়াৰ পৰিনতি , বিশ্বায়নে আনি দিয়া দ্বন্দ্ব আদি বষয়ক লৈ উচ্চস্তৰৰ সাহিত্য সৃষ্টি কৰিছে ৷
তেওঁ এই পৰম্পৰা অসমীয়া ভাষা-সাহিত্যৰ বাবে আশাব্যঞ্জক বুলিও মন্তব্য কৰে ৷ আন এগৰাকী আলোচক , বিশিষ্ট লেখক-সমালোচক , উত্তৰ লখিমপুৰ মহাবিদ্যালয়ৰ অধ্যাপক ড° অৰবিন্দ ৰাজখোৱাই অসমীয়া উপন্যাসত জনগোষ্ঠীয় চেতনাৰ স্ৰোত অৱধাৰিত বুলি উল্লেখ কৰে ৷ প্ৰসংগক্ৰমে তেওঁ কয় যে জনগোষ্ঠীয় সমাজক বাদ দি অসমৰ সমাজ-জীৱন যিদৰে কল্পনা কৰিব নোৱাৰি সেইদৰে জনজাতীয় সমাজ-জীৱনক এৰি অসমীয়া সাহিত্যৰো কল্পনা কৰিব নোৱাৰি ৷সমাজ গঢ়াৰ ক্ষেত্ৰত ৰাজনীতিৰ যি ভূমিকা সাহিত্যৰো সেই একেই ভূমিকা ৷
সাম্প্ৰতিক প্ৰেক্ষাপটত বহু জনগোষ্ঠীয়ে বিভিন্ন কাৰণত বিচ্ছিন্নতাবাদক আঁকোৱালী লৈছে ৷ সেই বিচ্ছিন্নতাৰ চেতনাক সংশ্লিষ্ট জনগোষ্ঠী সমূহে ন্যায় সংগত বুলি ভাবে ৷ গতিকে জনগোষ্ঠীয় চেতনাৰে সাহিত্য সৃষ্টিৰ ক্ষেত্ৰত এতিয়া অতি সাৱধানতাৰে আগবাঢ়িব লাগিব ৷ ব্ৰিটিছসকলে অতি কৌশলে অসমত জাতি আৰু জনজাতিৰ মাজত বিচ্ছিন্নতাৰ বীজ ৰোপণ কৰিছিল ৷
সেই চেতনাৰ এতিয়া উদ্গিৰণ ঘটিছে ৷ গতিকে এনে প্ৰেক্ষাপটত সাহিত্যিকসকলে কি দৃষ্টিভংগী লোৱা উচিত সেইটো বিচাৰ্যৰ বিষয় ৷ কাৰণ অতীজৰে পৰা এতিয়ালৈ অসমীয়া গল্প-উপন্যাসত জনগোষ্ঠীয় সমাজ-জীৱনৰ চেতনাৰ সোঁত আছে আৰু থাকিবই ৷ অৱশ্যে ড° ৰাজখোৱাই এই বক্তব্যক সিন্ধান্ত বুলি নলৈ আলোচনা বুলি গ্ৰহণ কৰিবলৈ আহ্বান জনায় ৷
ইয়াত আলোচকৰূপে অংশগ্ৰহণ কৰি বিশিষ্ট লেখক -সমালোচক , দুলীয়াজান মহাবিদ্যালয়ৰ অধ্যাপক ড° চিত্ৰজিৎ শইকীয়াই কয় —“ পৰম্পৰাগত চিন্তা-চেতনাৰ লগতে বিশ্বায়নৰ ফল জনগোষ্ঠীয় সমাজেও প্ৰত্যক্ষ কৰিছে ৷ গতিকে সামাজিক উত্থান-পতনে জনগোষ্ঠীয় জন-জীৱনকো চুই গৈছে ৷
এনে প্ৰেক্ষাপটত উত্তৰ-পূৰ্বাঞ্চলৰ বিচিত্ৰ জনগোষ্ঠীয় সমাজৰ পটভূমিত উপন্যাস ৰচনা কৰাৰ প্ৰচুৰ সুবিধা আহিছে ৷ কাৰণ পৰিৱৰ্তনৰ প্ৰভাৱে জনগোষ্ঠীয় সমাজৰ সৰল-নিৰ্ভেজাল জন-জীৱনতো পৰিছে ৷ ইয়ে পুৰনি বিশ্বাস , পৰম্পৰা , ধৰ্ম আদিকো স্পৰ্শ কৰিছে ৷ এই পৰিৱৰ্তনশীল ইতিহাসক উপন্যাসে ধৰি ৰাখিবলৈ সক্ষম হ’ব ৷” তেওঁ অসমৰ লগতে অৰুণাচলৰ বিভিন্ন জনগোষ্ঠীয় সমাজৰ পটভূমিত সৃষ্টি হোৱা উপন্যাস সমূহৰ বিষয়ে গভীৰভাৱে আলোকপাত কৰে ৷
মনোজ্ঞ আলোচনা সত্ৰখন উদ্বোধন কৰে ধেমাজি গাৰ্লছ কলেজৰ অধ্যক্ষ ড° দীপক বৰগোহাঁয়ে ৷ তেওঁ গ্ৰন্থ আন্দোলনক প্ৰসাৰিত কৰাৰ বাবে অসম প্ৰকাশন পৰিষদে গ্ৰহণ কৰা পদক্ষেপে সমাজ-জীৱনলৈ শুভবাৰ্তা কঢ়িয়াই অনা বুলি মন্তব্য কৰে ৷
তদুপৰি ব্যতিক্ৰমী অথচ ভাষা-সাহিত্য-সংস্কৃতিৰ বাবে অতি প্ৰয়োজনীয় বিষয়ক কেন্দ্ৰ কৰি আলোচনা সত্ৰ অনুষ্ঠিত কৰি পৰিষদে নতুন চিন্তা জাগৰিত কৰা বুলি কয় তেওঁ ৷আজি আলোচনা সত্ৰখন পৰিচালনাত সহযোগিতা আগবঢ়াই মহাবিদ্যালয়খনৰ ছাত্ৰ-ছাত্ৰীসকলে ৷
অসম গ্ৰন্থমেলা, ধেমাজিত আজি ধেমাজিৰ কবিৰ কবিতা পাঠৰ অনুষ্ঠান সম্পন্ন হয় ৷ ইপিনে গ্ৰন্থমেলাৰ প্ৰেক্ষাগৃহত আজি আন কেবাখনো নতুন গ্ৰন্থও উন্মোচিত হয় ৷ সন্ধিয়া গ্ৰন্থমেলাৰ মূল মঞ্চত পৰিৱেশিত হয় মনপৰশা সাংস্কৃতিক অনুষ্ঠান ৷
