Bhupen Hazarika Death Anniversary Celebration :
ভাৰত ৰত্ন সুধাকণ্ঠ ড: ভূপেন হাজৰিকাৰ আজি ত্ৰয়োদশ সংখ্যক মৃত্যু বাৰ্ষিকী। ২০১১ চনৰ ৫ নৱেম্বৰৰ দিনটোত মহাপ্ৰয়াণ ঘটিছিল অসমীয়া জাতিৰ হিয়াৰ আমঠু ড:ভূপেন হাজৰিকাৰ ৷ ন ন কালজৰি গীতেৰে সমৃদ্ধ কৰি যোৱা সুধাকণ্ঠ গৰাকীক আজি ৰাজ্যজুৰি সোঁৱৰণ কৰিছে বিভিন্ন অনুষ্ঠান- প্ৰতিষ্ঠানে ৷ ৰাজ্যৰ বিভিন্ন প্ৰান্তত আয়োজন কৰিছে বৰ্ণাঢ্য অনুষ্ঠানৰ। ৰজাঘৰ – প্ৰজাঘৰ সকলোৰে শিল্পী গৰাকীলৈ যাছিছে শ্ৰদ্ধাঞ্জলী ৷
আনহাতে ত্ৰয়োদশ মৃত্যু বাৰ্ষিকী উপলক্ষে অসম চৰকাৰৰ সাংস্কৃতিক সঞ্চালকালয়ৰ উদ্যোগত আজি জালুকবাৰীৰ সমাধীস্থলীত পুৱাৰে পৰা স্মৃতিচাৰণ সভা আৰু সৰ্বধৰ্ম প্ৰাৰ্থনাৰ লগতে বিভিন্ন সাংস্কৃতিক অনুষ্ঠানৰ আয়োজন কৰে ৷ এই অনুষ্ঠানত মুখ্য অতিথি ৰূপে অংশগ্ৰহণ কৰে ৰাজ্য বিত্তমন্ত্ৰী অজন্তা নেওগে ৷ মন্ত্ৰী গৰাকীয়ে সুধাকণ্ঠৰ সমাধিক্ষেত্ৰৰ বেদীৰ মাল্যাৰ্পণ কৰি গভীৰ শ্ৰদ্ধা নিবেদন কৰে ৷
একেদৰে সদৌ অসম ছাত্ৰ সন্থাই বিগতবৰ্ষ সমূহৰ দৰে আজি সুধাকণ্ঠ ত্ৰয়োদশ সংখ্যক মৃত্যু বাৰ্ষিকীত দীঘলীপুখুৰীৰ পাৰত থকা ড:ভূপেন হাজৰিকাৰ প্ৰতিমুৰ্তিত মাল্যাৰ্পণ কৰি শ্ৰদ্ধাঞ্জলি জনায়৷ ভাৰত ৰত্ন গৰাকীৰ কালজৰী গীত- মাতেৰে মুখৰিত কৰি তোলে দীঘলীপুখুৰী পাৰ ৷ অনুষ্ঠানত অংশ লয় আছুৰ মুখ্য উপদেষ্টা ড:সমজ্জুল ভট্টাচাৰ্য সহ আছুৰ নেতৃবৰ্গ ৷
৷ আজি সন্ধিয়া দীঘলীপুখুৰীৰ প্ৰতিমূৰ্ত্তি স্থলীত ১০ হেজাৰ বন্তি প্ৰজ্বলন কৰিব আছুয়ে
আনহাতে মহানগৰীৰ চচলত ড: ভূপেন হাজৰিকা সাংস্কৃতিক ন্যাসে সুধাকণ্ঠ গৰাকীলৈ গভীৰ শ্ৰদ্ধা জনোৱাৰ উদ্দেশ্যৰে সৰ্বধৰ্ম প্ৰাৰ্থনা আয়োজন কৰে ৷
ইপিনে,ভাৰত ৰত্ন ভূপেন হাজৰিকাৰ ল’ৰালি কালৰ অধিক সময় পাৰ কৰা সাংস্কৃতিক নগৰি তেজপুৰত তেজপুৰীয়া ৰাইজে যাছিলে শিল্পী গৰাকীলৈ সশ্ৰদ্ধা প্ৰণাম ৷ ত্ৰয়োদশ সংখ্যক মৃত্যু বাৰ্ষিকী দিনটোত তেজপুৰৰ প্ৰহ্লাদ চন্দ্ৰ দাস স্মৃতি নৃত্যশালাত নৃত্য পটিয়সী দীপাই সুধাকণ্ঠৰ কালজৰি গীতত নৃত্যৰ জৰিয়তে শ্ৰদ্ধা জনাই ভাৰতৰত্ন গৰাকীলৈ ৷