Assam Bye Elections Results 2024:
সকলো উৎকন্ঠাৰ অন্ত পেলাই কাইলৈ ঘোষণা হ’ব অসমৰ ৫ সমষ্টিৰ উপ-নিৰ্বাচনৰ ফলাফল। ফলাফলকলৈ উৎকণ্ঠিত শাসক-বিৰোধী ৷ বিহালী, চামগুৰি, বঙাইগাঁও, চিদলী, ধলাইৰ নিৰ্বাচনী ফলাফলে গৌৰৱ গগৈৰো হ’ব ভাগ্য পৰীক্ষা ৷ একেদৰে ভাগ্য নিৰ্ণয় হ’ব ৰকিবুল আৰু ফণীভূষণৰ ৷
উল্লেখ্যো ১৩ নৱেম্বৰত ভোট গ্ৰহণ অন্ত পৰাৰ পাছতে দিছপুৰৰ শাসনাধিষ্ঠি মিত্ৰজোট আৰু কংগ্ৰেছ সহ নিৰ্বাচনত অৱতীৰ্ণ হোৱা আন আন দলবোৰে নিজ নিজ সমষ্টিত বিজয়ী হ’ম বুলি সদম্ভে দাবী কৰি আহিছে যদিও শণিবাৰৰ নিৰ্বাচনী ফলাফলে হে নিৰ্ণয় কৰিব তেওঁৰ লোকৰ ভাগ্য ৷ পুৱা ৮ বজাত আৰম্ভ হ’বলগীয়া ভোট গণনাত প্ৰথমে গণনা হ’ব পোষ্টেল বেলট ৷ তাৰ পিছত গণনা হ’ব ই ভি এমৰ ভোট গণনা ।
ৰাজ্যৰ পাঁচ সমষ্টিৰ উপ নিৰ্বাচনত হাইভল্টেজ সমষ্টি ৰূপে বিবেচিত হোৱা চামগুৰি আৰু বিহালীলৈ সকলোৱে দৃষ্টি নিবদ্ধ ৰাখিছে ৷ নিৰ্বাচন দিন ঘোষনাৰ দিনটোৰ নিশাৰে পৰা চামগুৰিত সংঘটিত হৈছিল নিৰ্বাচন কেন্দ্ৰীক ব্যাপক হিংসা । তাৰ সমান্তৰালভাৱে দুই এটা বিক্ষিপ্ত ঘটনাৰ সূত্ৰপাত হৈছিল বিহালী।
এনেবোৰ ঘটনাক্ৰমৰ মাজতে কাইলৈ ঘোষিত নিৰ্বাচনী ফলাফলে আগন্তুক ২০২৬ ৰ বিধানসভা নিৰ্বাচনৰ ছেমিফাইনেল ৰূপে বিবেচিত হৈছে ৷ আনহাতে পাঁচ সমষ্টিৰ ভোট গণনা শান্তিপূৰ্ণভাৱে সম্পন্ন কৰিবৰ বাবে সংশ্লিষ্ট জিলা প্ৰশাসন ব্যাপক নিৰাপত্তা মুলক ব্যৱস্থা গ্ৰহণ কৰিছে ৷
এইবাৰ উপ- নিৰ্বাচনত সকলোৰে কেন্দ্ৰবিন্দু হৈ পৰা চামগুৰি সমষ্টিৰ ফলাফলে ৰকিবুল হুচেইনৰ ভেটি অক্ষত হৈ থাকিবনে নাথাকে ৷ সেয়াও নিৰ্ধাৰণ কৰিব ৷ ৰকিবুল তনয় তানজিল হুছেইনে শেষ হাঁহি মাৰিবনে নে দিপ্লুৰঞ্জন শৰ্মাই হাঁহি মাৰিব তাৰো ভাগ্য নিৰ্ণয় হ’ব কাইলে ৷
একেদৰে বিগত ১৯৮৫ চনৰ পৰা ধাৰাবাহিকভাবে বঙাইগাঁৱৰ পৰা আঠবাৰকৈ বিধায়ক ৰূপে নিৰ্বাচিত হোৱা বৰ্তমান বৰপেটাৰ সাংসদ ফণীভূষণ চৌধুৰীৰ বঙাইগাঁও এইবাৰ তেওঁৰ পত্নী অগপৰ প্ৰাৰ্থী দীপ্তিময়ী চৌধুৰীৰ হাতত থাকিবনে, নে কংগ্ৰেছ প্ৰাৰ্থী ব্ৰজেনজিৎ সিনহাৰ হাতলৈ যাব। সেয়াও নিৰ্ণয় হ’ব কাইলৈ।
আনহাতে বিহালীৰ ফলাফলক লৈ নিৰ্ভৰ কৰিব সাংসদ গৌৰৱ গগৈৰ ৰাজনৈতিক ভৱিষ্যত। কিয়নো বিজেপি ত্যাগি জয়ন্ত বৰাই কংগ্ৰেছত যোগ নিদিয়াৰ পূৰ্বে দলীয় টিকট প্ৰদানত বিশেষ ভূমিকা লৈছিল গৌৰৱ গগৈয়ে। জয়ন্তক টিকট দিয়াৰ পিছতে হে তেজপুৰত যোগদান কৰায় কংগ্ৰেছত ৷ তাৰ পিছৰে পৰা বিহালী বাহৰ পাতি গৌৰৱ গগৈয়ে জয়ন্তৰ প্ৰচাৰাভিযানৰ সেনাপতি হৈ অকলেই যুঁজ দিছিল।
যাৰবাবে ৰণ খনত অংশ গ্ৰহণ কৰিবলৈ সুবিধাই নেপালে এপি চিচিৰ সভাপতি ভূপেন বৰা৷ এনে প্ৰেক্ষাপটত কাইলৈৰ ফলাফলে গৌৰৱ গগৈৰো হ’ব ভাগ্য পৰীক্ষা ৷ সমষ্টিটোত শক্তিশালী ৰূপত অৱতীৰ্ণ হোৱা বিজেপিৰ প্ৰাৰ্থী দিগন্ত ঘাটোৱালৰো কাইলৈ হ’ব ভাগ্য নিৰ্ণয় ৷
বিটিআৰৰ চিদলী সমষ্টিত মূল প্ৰতিদ্বন্দ্বী ইউপিপিএলৰ নিৰ্মল কুমাৰ ব্ৰহ্ম আৰু বিপিএফৰ শুদ্ধ কুমাৰ বসুমতাৰীৰ ভাগ্য নিৰ্ণয় কৰিব ইভিএে ।একেদৰে বৰাক উপত্যকাৰ কাছাৰৰ ধলাই সমষ্টিত বিজেপিৰ নীহাৰ ৰঞ্জন দাস আৰু কংগ্ৰেছৰ ধ্ৰুৱজ্যোতি পুৰকায়স্থৰ ভাগ্য নিৰ্ণয় হ’ব কাইলৈ ।
মনকৰিবলগীয়া যে,পাঁচ সমষ্টিৰ উপ- নিৰ্বাচনত মুল যুঁজ হৈছে কংগ্ৰেছ,বিজেপি ,অগপ,বিপিএফ আৰু ইউ পিপিএলৰ মাজত ৷ অৱশ্যে বিহালীত অসম সন্মিলিত মৰ্চাৰ প্ৰক্ষেপিত চিপিআইএমএল প্ৰাৰ্থী গৰাকীয়েও সমষ্টিটোত উল্লেখনীয় প্ৰাৰ্থী হিচাপে বিবেচিত হৈছে ৷