Asom Jatiya Parishad :
কা’ বিৰোধী গণ সংগ্ৰামত আত্মবলিদান কৰা পাঁচ গৰাকী জাতীয় বীৰ শ্বহীদক সোঁৱৰি অসম জাতীয় পৰিষদে আজি ৰাজ্যজুৰি আত্মবলিদান দিৱস পালন কৰে।
২০১৯ চনৰ আজিৰ দিনটোতে (১২ ডিচেম্বৰ) ছেম ষ্টেফৰ্ড, দীপাঞ্জল দাস, দীজেন্দ্ৰ পাংগিং, আব্দুল আলিম আৰু ঈশ্বৰ নায়কে আৰক্ষীৰ গুলিত প্ৰাণ হেৰুৱাইছিল। অসম জাতীয় পৰিষদে বীৰ শ্বহীদ কেইগৰাকীৰ স্মৃতিত আজিৰ দিনটোক আত্মবলিদান দিৱস হিচাপে পালন কৰি আহিছে।
আজি গুৱাহাটীৰ জু ৰোডত থকা অসম জাতীয় পৰিষদৰ মুখ্য কাৰ্যালয়ত দলৰ কামৰূপ মহানগৰ জিলা সমিতিয়ে আয়োজন কৰা আত্মবলিদান দিৱসত দলৰ সভাপতি লুৰীণজ্যোতি গগৈ আৰু সাধাৰণ সম্পাদক জগদীশ ভূঞা প্ৰমুখ্যে নেতাসকল উপস্থিত থাকে।
অনুষ্ঠানৰ আৰম্ভণিতে দলৰ নেতাসকলে পাঁচোগৰাকী শ্বহীদৰ প্ৰতিকৃতিত মাল্যাৰ্পন কৰে আৰু ধুপ-ধুনা-চাকি জ্বলাই তেওঁলোকৰ প্ৰতি শ্ৰদ্ধাঞ্জলি নিৱেদন কৰে। লগতে নাগাৰা নাম পৰিৱেশনেৰে বীৰ শ্বহীদ কেই গৰাকীৰ আত্মাৰ সদগতি কামনা কৰা হয়। আত্মবলিদান দিৱস উপলক্ষে দলৰ কৰ্মীসকলে কৱিতা আবৃতি আৰু গীত-মাত পৰিৱেশন কৰে।
আনহাতে বীৰ শ্বহীদ কেইগৰাকীলৈ শ্ৰদ্ধা নিৱেদন কৰি অসম জাতীয় পৰিষদৰ সভাপতি লুৰীণজ্যোতি গগৈয়ে কয় যে জাতিৰ হকে প্ৰাণ দিয়া এই শ্বহীদকেইগৰাকীক জাতিয়ে সদায় মনত ৰাখিব। তেওঁলোকৰ ত্যাগে ভৱিষ্যত প্ৰজন্মক জাতিৰ প্ৰতি থকা দায়বদ্ধতাৰ কথা সোঁৱৰাই থাকিব।
বিনা দোষত পুলিছে অপ্ৰৰোচিতভাৱে গুলিয়াই উক্ত পাঁচগৰাকী যুৱকক হত্যা কৰা ঘটনা কেতিয়াও পাহৰিব নোৱাৰি বুলি উল্লেখ কৰি গগৈয়ে কয় যে তেওঁলোকক ৰাজ্য চৰকাৰে শ্বহীদ ঘোষণা নকৰা আৰু দোষী আৰক্ষীক শাস্তি প্ৰদান নকৰাটো দুৰ্ভাগ্যজনক। এনে ভূমিকাৰে বিজেপি নেতৃত্বধীন চৰকাৰখন যে এখন জনবিৰোধী চৰকাৰ সেয়া চৰকাৰখনে নিজেই প্ৰমাণ কৰি দিলে।
আনহাতে অসম জাতীয় পৰিষদৰ সাধাৰণ সম্পাদক জগদীশ ভূঞাই নিজৰ ভাষণত জাতীয় বীৰ শ্বহীদ কেই গৰাকীক স্মৰণ কৰি কয় যে শ্বহীদ কেই গৰাকীৰ নাম কেইটাই সেই অসমৰ ছবিখন স্পষ্ট কৰি তোলে যিখন অসম ভাঙিবৰ বাবে বিজেপি দল আৰু চৰকাৰে অহৰহ চেষ্টা কৰি থাকে। উক্ত অসমখন অটুট ৰখাটো অসম জাতীয় পৰিষদৰ সংকল্প।
তেওঁ বিজেপি চৰকাৰখনক সমালোচনা কৰি লগতে কয় যে অবৈধ নাগৰিক চিনাক্ত আৰু বহিস্কৰণ বাবে পৃথিৱীৰ বিভিন্ন দেশ বা ৰাজ্যই আইন প্ৰণয়নৰ অলেখ উদাহৰণ আছে । বিজেপি দলে অবৈধ নাগৰিকক ৰক্ষণাবেক্ষণ দিবৰ বাবে কা’ৰ দৰে এখন ক’লা আইন প্ৰৱৰ্তন কৰি বিশ্বৰ বুকুত এক কুখ্যাতি অৰ্জন কৰিলে।
