KMSS Pressmeet:
কেৱল হাতী নহয় সকলো বন্যপ্ৰাণীৰ সৰবৰাহৰ নতুন ৰাজধানী গুৱাহাটী ৰাজ্যিক চিৰিয়াখানা | অসমৰ চিৰিয়াখানাৰ দুষ্প্রাপ্য বন্যপ্রাণী উদং কৰি আম্বানীৰ ‘বানতাৰা’ চিৰিয়াখানা শুৱনী কৰাত ব্যস্ত ৰাজ্যৰ মুখ্যমন্ত্রী, বন বিভাগ আৰু অসম ৰাজ্যিক চিৰিয়াখানা কর্তৃপক্ষ। অসমৰ বিৰল প্ৰজাতিৰ বন্যপ্ৰাণীৰ এনে গোপন সৰবৰাহে অসমৰ পৰ্যটন উদ্যোগলৈ চৰম ভাবুকি কঢ়িয়াই আনিছে- এই অভিযোগ কৃষক মুক্তি সংগ্ৰাম সমিতিৰ।
মঙলবাৰে সংগঠনটোৰ গান্ধীবস্তিত থকা মুখ্য কার্যালয়ত এখন সংবাদ মেল অনুষ্ঠিত কৰি কৃষক মুক্তি সংগ্ৰাম সমিতিৰ সাধাৰণ সম্পাদক বিতু সোনোৱাল আৰু মুখ্য সাংগঠনিক সম্পাদক আকাশ দলে কয় যে মুখ্যমন্ত্রী হিমন্ত বিশ্ব শৰ্মাই দায়িত্বভাৰ গ্ৰহণ কৰাৰ পাছত ধাৰাবাহিকভাৱে অসমৰ চিৰিয়াখানাৰ পৰা বিৰল প্ৰজাতিৰ বন্যপ্রাণী আম্বানীৰ চিৰিয়াখানালৈ গোপনে সৰবৰাহ কৰাৰ ঘটনা সংঘটিত হৈ আহিছে।
কৃষক মুক্তি সংগ্ৰাম সমিতিৰ হাতত আহি পৰিছে ২০২২ চনৰ ৯ ছেপ্টেম্বৰত অসম চৰকাৰ অধীনৰ অসম ৰাজ্যিক চিৰিয়াখানা আৰু মুকেশ আম্বানীৰ পুত্ৰ অনণ্ট আম্বানীৰ গুজৰাটৰ জামনগৰ স্থিত গ্রীনচ জুল ‘জিকেল বেস্কিউ এণ্ড ৰিহেবিলিটেশন চেণ্টাৰৰ মাজত হোৱা গোপন বুজাবুজিৰ চুক্তি।
এই চুক্তিৰ অনুসৰিয়ে অসম ৰাজ্যিক চিৰিয়াখানাৰ পৰা ২০২২ চনৰ পৰা বৰ্তমানলৈকে স্থানান্তৰ কৰি আহিছে ৬৬ টাকৈ বিৰল বন্যপ্রাণী। উল্লেখ্যযোগ্য যে ২০২২ চনৰ চুক্তি স্বাক্ষৰ কৰাৰ পূৰ্বেও হিমন্ত বিশ্ব শৰ্মাই নিজৰ প্ৰভাৱ খটুৱাই ২০২১ চনতেই ২ টাকৈ ব্লেক পেন্থাৰ অসম ৰাজ্যিক চিৰিয়াখানাৰ পৰা আম্বানীৰ ‘বানতাৰালৈ স্থানান্তৰ কৰাৰ বিস্ফোৰক তথ্য পোহৰলৈ আহিছে।
আম্বানীৰ চিৰিয়াখানা ‘বানতাৰা’ কর্তৃপক্ষই ২০২২-২৩ বৰ্ষৰ প্ৰতিবেদনত প্রকাশ কৰা তথ্য অনুসৰি অসমৰ চিৰিয়াখানা উদং কৰি আম্বানীৰ জাম নগৰত থকা গ্রীনচ জুল’জিকেল ৰেস্কিউ এণ্ড বিহেবিলিটেশ্বন চেণ্টাৰ অৰ্থাৎ বৰ্তমানৰ ‘বানতাৰা’লৈ ৬৬ টা দুষ্প্রাপ্য বন্যজীৱ গোপনে সৰবৰাহ কৰা হৈছে।
প্রতিবেদনত প্ৰকাশ কৰা অনুসৰি এই বন্যপ্রাণীসমূহৰ ভিতৰত আছে ব্লেক পেন্থাৰ ২ টা, এশিঙিয়া গড় ২ টা, আফ্রিকান কাছ ১৭ টা, বিয়াৰডেড কাপুচিন ১ টা, ব্লেক ক্রেস্টেড মংগাবে ২ টা, বুটেড মাকাও ৬ টা, হোৱাই চেকড গিবন ১ টা, ডি ব্রাজাছ মাংকি ১ টা, ইউৰোপিয়ান হেডগেহগ ২ টা, হেক’ছ মাকাও ৪ টা, ইও চাইনিজ চিলভাৰড লেংগুৰ ৩ টা, কলছ গিবন ১ টা, লাৰ গিবন ১ টা, লেজাৰ স্পষ্ট ন’জড গুৱেনন ৪ টা, মীৰকাট ১ টা, ম’ৰ মাকাও ৮ টা, পিলেটেড গিবন ১ টা, বেড চেইলড গুবেনন ১ টা, টনকিন মাকাও ৫ টা আৰু হোৱেষ্ট মাংকি ২ টা। এই বন্যপ্রাণীসমূহৰ ভিতৰত ডি ব্রাজাছ মাংকি আৰু ম’ৰ মাকাও হৈছে বিপদাপন্ন প্রজাতিৰ।
এই তালিকাত প্রকাশ কৰা বন্যজীৱৰ সৰবৰাহে এটা কথা প্রমাণ কৰে যে অসমৰ মুখ্যমন্ত্ৰী আৰু অসম ৰাজ্যিক চিৰিয়াখানা কর্তৃপক্ষই অসমৰ ৰাইজক অন্ধকাৰত ৰাখি এনে সিদ্ধান্ত গ্রহণ কৰি অসমৰ পৰ্যটন উদ্যোগলৈ অশনি সংকেট নমাই আনিছে।
ইয়াৰ বিপৰীতে অসম ৰাজ্যিক চিৰিয়াখানা কর্তৃপক্ষই ৬৬ টা বন্যপ্রাণী আম্বানীৰ চিৰিয়াখানালৈ প্ৰেৰণ কৰাৰ পাছতো কেৱল ২০২১-২২ চনত দুটা ব্লেক পেন্থাৰ আৰু দুটা এশিঙিয়া গড় প্ৰেৰণ কৰাৰ তথ্য সদৰি কৰি বাকী ৬২ টা বন্যপ্রাণী সৰবৰাহ কৰাৰ তথ্য লুকুৱাই ৰাখিছিল।
এনে ঘটনাই প্রমাণ কৰে যে অসম চৰকাৰ আৰু অসম ৰাজ্যিক চিৰিয়াখানা কর্তৃপক্ষই আম্বানীৰ স্বাৰ্থত অসমৰ ৰাইজক বিপথে পৰিচালিত কৰি অসমৰ চিৰিয়াখানাক আম্বানীৰ ‘বানতাৰা’ৰ চাৱ চেণ্টাৰ হিচাপে গঢ়ি তুলিছে বুলি অভিযোগ কৰাৰ লগতে এনে কাৰ্যসূচী শীঘ্রে বন্ধ কৰাৰ দাবী উত্থাপন কৰে কৃষক মুক্তিৰ নেতৃত্বই।
সংবাদ মেলত তেওঁলোকে সদৰি কৰে যে হিমন্ত বিশ্ব শৰ্মাৰ আমোলতে অসমৰ চিৰিয়াখানাৰে আম্বানীৰ যি চুক্তি সম্পন্ন হৈছিল সেই চুক্তি অনুসৰি দুয়োখন চিৰিয়াখানাৰ মাজত বন্যজীৱৰ বিনিময় হোৱাৰ কথা প্রকাশ কৰিছিল। কিন্তু বর্তমান সময়লৈকে অসমৰ চিৰিয়াখানাৰ ৬৬ টা বন্যজীৱই আম্বানীৰ ‘বানতাৰা’ শুৱনি কৰাৰ বিপৰীতে আম্বানীৰ চিৰিয়াখানাৰ পৰা এটা বন্যজীরও অসমলৈ আনিবলৈ সক্ষম নোহোৱাটো অত্যন্ত দুর্ভাগ্যজনক বুলি কৃষক মুক্তিৰ নেতৃত্বই প্রকাশ কৰে।
শেহতীয়াকৈ অসম- অৰুণাচল সীমান্তৰ নামচাইৰ পৰা হাতী সৰবৰাহ কৰা ঘটনাটো সন্দেহ প্রকাশ কৰিছে কৃষক মুক্তি সংগ্রাম সমিতিয়ে। সংগঠনটোৰ নেতৃত্বই কয় যে যদিও মুখ্যমন্ত্ৰীৰ কাৰ্যালয়ৰ পৰা স্পষ্টীকৰণ দিয়া হৈছে যে অসমৰ পৰা শেহতীয়াকৈ এটাও হাতী গুজৰাটলৈ স্থানান্তৰ কৰা হোৱা নাই তথাপিও মুখ্যমন্ত্ৰীৰ কাৰ্যালয়ৰ এনে বক্তব্যক আস্বস্ত হ’ব পৰা নাই কৃষক মুক্তি সংগ্রাম সমিতি।
অৰুণাচলৰ পৰা হাতী নিয়াৰ তথ্য প্রকাশ কৰিলেও সেই হাতীৰ মাজত অসমৰ হাতীৰ লগতে অন্য বন্যজীৱৰো সৰবৰাহ হ’ব পাৰে বুলি আশংকা ব্যক্ত কৰি অসমৰ পৰা গোপনে সৰবৰাহ কৰা দুষ্প্রাপ্য বন্যজীৱ পুনৰ ঘূৰাই অনাৰ দাবী উত্থাপন কৰে কৃষক মুক্তি সংগ্রাম সমিতিয়ে। গতিকে কৃষক মুক্তি, সংগ্রাম সমিতিয়ে দাবী উত্থাপন কৰে যে-১) অসমৰ পৰা গুজৰাটৰ ‘বানতাৰা’লৈ স্থানান্তৰ কৰা অসমৰ সম্পদ দুষ্প্রাপ্য বন্যজীৱসমূহ অতিশীঘ্ৰে ঘুৰাই আনক।
২) মানুহ আৰু বন্যজীৱৰ সংঘাত ৰোধ কৰিবলৈ ফলপ্ৰসু ব্যৱস্থা গ্রহণ কৰক।
৩) পৰম্পৰাগতভাৱে পুহি অহা অসমৰ হাতীৰ গৰাকী আৰু হাতীৰ মাউতসকলক চৰকাৰী আঁচনিৰ অধীনত আনি তেওঁলোকক সাহায্য প্রদান কৰক।
৪) হাতীকে ধৰি অসমৰ অন্য বন্য সম্পদসমূহ সংৰক্ষণ কৰি অসমৰ পৰ্যটন উদ্যোগটোক উন্নত কৰি গঢ়ি তোলক।