Child trafficking:
ৰাজ্যৰ সকলো আদালতত বিচাৰাধীন হৈ থকা শিশু সৰবৰাহৰ গোচৰসমূহ অহা অক্টোবৰৰ ভিতৰত মীমাংসা কৰিবলৈ গুৱাহাটী উচ্চ ন্যায়ালয়ে জাননী জাৰি কৰিছে। নিম্ন আদালতবোৰক তেনে গোচৰবোৰ অগ্ৰাধিকাৰ ভিত্তিত লৈ মীমাংসা কৰিবলৈয়ো কোৱা হৈছে। প্রয়োজন সাপেক্ষে দৈনিক শুনানি গ্রহণৰো পৰামৰ্শ দিছে উচ্চ ন্যায়ালয়ে।
উল্লেখ্য যে যোৱা ১৫ এপ্রিলত উচ্চতম ন্যয়ালয়ে উত্তৰ প্ৰদেশৰ শিশু সৰবৰাহ সংক্রান্তীয় এটা গোচৰৰ শুনানি গ্ৰহণ কৰি দেশৰ সকলো উচ্চ ন্যায়ালয়লৈ বিশেষ জাননী জাৰি কৰিছে। সেই জাননীত উচ্চ ন্যায়ালয়বোৰে নিজৰ অধীনৰ ৰাজ্যবোৰত শিশু সৰবৰাহ সম্পৰ্কীয় গোচৰবোৰ নিষ্পত্তিৰ ক্ষেত্ৰত কি ধৰণে সক্রিয় হৈ আহিছে, তাৰ তথ্য অহা অক্টোবৰৰ ভিতৰত দাখিলৰ নিৰ্দেশ দিয়ে।
উল্লেখ্য যে উত্তৰ প্ৰদেশৰ এগৰাকী মহিলাই তেওঁৰ পুত্র সন্ধানহীন হোৱাৰ এটা গোচৰ সুদীর্ঘ সময় ধৰি বিচাৰাধীন অৱস্থাত থকাক লৈ উচ্চতম ন্যায়ালয়ৰ দ্বাৰস্থ হৈছিল। সেই গোচৰটোৰে শুনানিত উচ্চতম ন্যায়ালয়ে উচ্চ ন্যায়ালয়বোৰক উক্ত নির্দেশ দিয়ে তাৰ ভিত্তিত গুৱাহাটী উচ্চ ন্যায়ালয়ে নিজাববীয়াকৈ বিষয়টোৰ শুনানি গ্রহণ কৰি মঙলবাৰে সকলো নিম্ন আদালতক উক্ত জাননী জাৰি কৰে।
অসমৰ লগতে গুৱাহাটী উচ্চ ন্যায়ালয়ৰ অধীনত থকা আন ৰাজ্যবোৰতো এই জাননী কাৰ্যকৰী হ’ব। ইয়াৰ বাবে যোৱা ২০ জুনত গুৱাহাটী উচ্চ ন্যায়ালয়ত শুনানি অনুষ্ঠিত হৈছিল। উত্তৰ প্ৰদেশৰ গোচৰটোৰ শুনানি অহা অক্টোবৰত অনুষ্ঠিত হ’ব আৰু তাৰ পূৰ্বে অসমৰ নিম্ন আদালতত বিচাৰাধীন শিশু সৰবৰাহ সম্পৰ্কীয় গোচৰবোৰ নিষ্পত্তিৰ জাননী জাৰি কৰিছে উচ্চ ন্যায়ালয়ে।
উল্লেখ্য যে অসমৰ পৰা ব্যাপক হাৰত মানৱ সৰবৰাহ চলি আহিছে। বহু শিশু সন্ধানহীন হোৱাৰ অন্তৰালত মানৱ সৰবৰাহকাৰী চক্র জড়িত থকাৰ তথ্যও আৰক্ষীৰ তদন্তত পোহৰলৈ আহিছে। তেনে একাংশ শিশু উদ্ধাৰ হোৱাৰ বিপৰীতে বহুতৰে আজিলৈকে সন্ধানেই নাই। তেনে সন্ধানহীন হোৱা বহু গোচৰ ৰাজ্যৰ নিম্ন আদালতত বিচাৰাধীন হৈ আছে। অৱশ্যে তেনে গোচৰৰ প্ৰকৃত সংখ্যা অদ্যাপি স্পষ্ট হোৱা নাই। গতিকে সেই সকলো গোচৰ অহা অক্টোবৰৰ পূৰ্বে অগ্ৰাধিকাৰ ভিত্তিত নিষ্পত্তি কৰিবলৈ নিম্ন আদালতবোৰক গুৱাহাটী উচ্চ ন্যায়ালয়ে জাননী জাৰি কৰিছে।