Jibonjora Sahitya Sadhana Award:
নগাঁও জিলা অসমীয়া সাহিত্য সন্মিলনীৰ উদ্যোগত সন্মিলনীৰ সভাপতি ডাঃ ৠষেশ্বৰ ঠেঙাল শইকীয়াৰ সভাপতিত্বত সোমবাৰে পুৰণিগুডাম বাপুজী ভৱন আৰু পুথিভঁৰালৰ সভাপতি তথা পুৰণিগুডাম শতদল শাখা সাহিত্য সভাৰ প্ৰাক্তন সভাপতি পুলিন হাজৰিকা,’তৰা’ আলোচনীৰ সম্পাদক উজ্জ্বল জ্যোতি দাস, নগাঁও জিলা সাহিত্য সভাৰ প্ৰাক্তন সহকাৰী সম্পাদক তথা নগাঁও জিলা অসমীয়া সাহিত্য সন্মিলনীৰ সদৰ শাখাৰ সম্পাদক গুণ কান্ত শৰ্মাকে ধৰি বহু কেইগৰাকী লোকে বিশিষ্ট সাহিত্যিকে ফণীন্দ্ৰ নাথ গায়নৰ সামাজ্যিক কৰ্ম জীৱনৰ আৰু সাহিত্য সাধনাৰ ক্ষেত্ৰখনৰ লগতে বিভিন্ন দিশত থকা অৱদান সন্দৰ্ভত আলোকপাত কৰে।
বিশিষ্ট সাহিত্যিক,গল্পকাৰ, প্ৰৱন্ধকাৰ,কবি,নগাঁও জিলা অসমীয়া সাহিত্য সন্মিলনীৰ প্ৰাক্তন সভাপতি, বৰ্তমান সন্মিলনীৰ মুখ্য উপদেষ্টা,বহু বিশেষনৰে বিভূষিত, নগাঁও বৰেণ্য পুৰণিগুডাম মুঢ়ানিৰ বাসিন্দা ফণীন্দ্ৰ নাথ গায়নক “জীৱন যোৰা সাহিত্য সাধনা বঁটা তেখেতৰ বাসগৃহতে এক বৰ্নাঢ্য অনুষ্ঠানৰ জৰীয়তে প্ৰদান কৰা হয়।নগাঁও জিলা অসমীয়া সাহিত্য সন্মিলনীৰ জিলা সম্পাদিকা নিজৰা শইকীয়াই আতধৰা বঁটা প্ৰদান অনুষ্ঠানত সন্মিলনীয়ে জীৱন জোৰা সাহিত্য সাধনা বঁটা সহ ফুলাম গামোছা,চেলেং,জাপি,সন্মান-পত্ৰ আৰু গ্ৰন্থৰ টোপোলা প্ৰদান কৰে।
বঁটা গ্ৰহন কৰি ফণীন্দ্ৰ নাথ গায়নে কয়-এনে বঁটাই মানুহক লেখা-মেলা কৰাত উৎসাহ যোগাই,প্ৰেৰণা যোগাই।লেখা মেলা কিমান কৰিলো নকৰিলো সেইটো নিৰ্ভৰ কৰে পাঠকৰ ওপৰত।মই অলপতে ৮৭ বছৰ অতিক্ৰম কৰি ৮৮ত ভৰি থলো।এই বয়সত আজি নগাঁও জিলা অসমীয়া সাহিত্য সন্মিলনীয়ে মোৰ গৃহত আহি যি বঁটাৰে সন্মানিত কৰিলে ই অপৰিসীম আৰু চিৰস্মৰণীয়। মোৰ বাবে কৰ্ম জীৱনৰ প্ৰেৰণা।গায়ন দেৱে ভাষনৰ অন্তত তেখেতৰ স্ব-ৰচিত কবিতা পাঠ কৰি ভাষণ সামৰণি কৰে।
নগাঁৱৰ কবি- সাহিত্যিক হৰিদেৱ মহন্ত,’বিচিত্ৰা’ কাব্যালোচনীৰ সম্পাদক বিশিষ্ট কবি নাৰায়ণকলিতা,নগাঁও জিলা অসমীয়া সাহিত্য সন্মিলনীৰ সহকাৰী সম্পাদিকা অনিমা বৰা,নগাঁও জিলা অসমীয়া সাহিত্য সন্মিলনীৰ কলংপাৰ মহিলা শাখাৰ সভানেত্ৰী ড° টুলু মণি দেৱী,সন্মিলনীৰ সদৰ শাখাৰ সম্পাদক গুণ কান্ত শৰ্মা,’তৰা’ আলোচনীৰ সম্পাদক কবি উজ্জ্বল জ্যোতি দাস,পুৰণিগুদাম বাপুজী ভৱন আৰু পুথিভঁৰালৰ সম্পাদক দ্বীপেন বৈৰাগী, সহ বহু কেইজন গণ্যমান্য কবি সাহিত্যিকৰ উপস্থিতিত হৰিদেৱ মহন্ত,ড° টুলু মণি দেৱী,নিজৰা শইকীয়া, গুণ কান্ত শৰ্মা, অনিমা বৰা,উজ্জ্বল জ্যোতি দাসকে প্ৰমুখ্য কৰি কেইবা গৰাকী কবিয়ে ফণীন্দ্ৰ নাথ গায়নৰ ৰচিত কবিতা পাঠ কৰাৰ লগতে বঁটা প্ৰদানৰ আৰম্ভনীতে সন্মিলনীৰ ৰাজ্যিকৰ প্ৰাক্তন সভাপতি ড°দিলীপ বৰাই ৰচিত সন্মিলনীৰ সমবেত গীত পৰিবেশন কৰি বঁটা প্ৰদান অনুষ্ঠানটো গহীন কৰি তুলিলে।
