All Assam Venture School Teachers’ Employees Association:
চৰকাৰৰ মন্ত্ৰী-বিধায়কসকলে যদি অহাবাৰলৈ মন্ত্রী-বিধায়ক হ’ব নোৱাৰে, তেন্তে তেওঁলোকৰ পৰিয়ালসমূহ কেনেকৈ চলিব? এই দুশ্চিন্তাত মুখ্যমন্ত্রী ড: হিমন্ত বিশ্ব শর্মাই মন্ত্রী-বিধায়কৰ পত্নীক লাখ লাখ টকাৰ ৰাজসাহায্যযুক্ত আঁচনি প্রদান কৰিছে; কিন্তু ২০-২৫ বছৰে বিনা বেতনে শিক্ষকতা কৰি থকা ৰাজ্যৰ হেজাৰ হেজাৰ ভেন্সাৰ শিক্ষকৰ পৰিয়াল কিদৰে চলিছে ইয়াৰ চিন্তা কোনে কৰিব?’
মুখ্যমন্ত্রীলৈ এই প্রশ্ন সদৌ অসম অপ্রাদেশিকীকৃত শিক্ষক-কর্মচাৰী সংস্থাৰ। বৃহস্পতিবাৰে দিছপুৰ প্ৰেছ ক্লাবত সংস্থাৰ সভাপতি হৰমোহন বড়াই এক সংবাদমেল সম্বোধন কৰি বিজেপি চৰকাৰ তথা মুখ্যমন্ত্ৰীয়ে প্রদান কৰি অহা শিক্ষানুষ্ঠান-পদ প্রাদেশিকীকৰণৰ প্ৰতিশ্ৰুতি আজিকোপতি কাৰ্যকৰী নকৰাত সৰৱ হৈ পৰে। তেওঁ কয়, ‘ মন্ত্রী-বিধায়কক কিয়; অসমৰ বহু মানুহক ৰাজসাহায্য দিয়ক, বিনামূলীয়া আঁচনি দিয়ক, তাত আপত্তি কৰিবলগীয়া একো নাই; কিন্তু সমান্তৰালভাৱে দুৰ্ভগীয়া শিক্ষকসকলৰ প্ৰতিও চৰকাৰে দৃষ্টি দিব লাগিব।
২০-২৫ বছৰে বিনা বেতনে শিক্ষকতা কৰি অহা এইসকল লোকে কি খাইছে, পৰিয়াল কিদৰে চলাইছে, সন্তানক কিদৰে লালন-পালন কৰিছে সেয়াও মুখ্যমন্ত্রীয়ে দৃষ্টি দিব লাগিব; কিন্তু এই বিষয়ৰ পৰা মুখ্যমন্ত্রী আঁতৰি আছে।’ আগন্তুক অক্টোবৰৰ ভিতৰত অপ্রাদেশিকীকৃত শিক্ষানুষ্ঠান আৰু পদসমূহ প্রাদেশিকীকৰণৰ দাবী জনাই সভাপতি বড়াই কয় যে পঞ্চায়ত নির্বাচনৰ প্ৰাকক্ষণত অর্থাৎ চলিত বৰ্ষৰ ১০ জানুৱাৰীত মুখ্যমন্ত্রীয়ে ফেচবুক লাইভৰ জৰিয়তে প্রকাশ কৰিছিল যে অৱশিষ্ট অপ্রাদেশিকীকৃত শিক্ষানুষ্ঠানসমূহ প্রাদেশিকীকৰণ কৰা হ’ব।
ইয়াৰ বাবে ২০১৭-১৮ আইনখন সংশোধনৰ ব্যৱস্থা গ্রহণ কৰিব আৰু এই সন্দৰ্ভত এখন কেবিনেট উপ-সমিতি গঠন কৰিব; কিন্তু অতি দুখৰ বিষয় যে ছমাহ উকলি যোৱাৰ পাছতো এই ক্ষেত্রত মুখ্যমন্ত্রীয়ে কোনো ব্যৱস্থা গ্ৰহণ নকৰিলে। সভাপতি বড়াই কয়, ‘কালি শিক্ষা বিভাগৰ স’তে যোগাযোগ কৰি অৱগত হ’লো যে ইয়াৰ যিখিনি প্রাথমিক যাৱতীয় কাম-কাজ এক শতাংশও হোৱা নাই। সেয়ে সন্দেহ হৈছে যে যিহেতু এই চৰকাৰখনৰ কাৰ্যকাল আৰু বেছি দিন নাই, তেনেস্থলত আইন কেতিয়া সংশোধন কৰিব আৰু কেতিয়া পদ প্রাদেশিকীকৰণ কৰিব? ই এক বৃহৎ প্রশ্ন।’
মুখ্যমন্ত্রীক লগ কৰিবলৈ বহুবাৰ আবেদন-নিবেদন কৰা হৈছে যদিও সৌভাগ্য হোৱা নাই আৰু নে তেওঁ লগ কৰিবলৈ ভয় খাইছে বুলি বড়াই প্রশ্ন কৰি লগতে কয়, ‘২০২২ৰ ২০ অক্টোবৰৰ্ত মুখ্যমন্ত্ৰীয়ে আমাক তেওঁৰ কার্যালয়লৈ মাতি নিছিল আৰু উক্ত দিনাই প্রতিশ্রুতি দিছিল যে আইন সংশোধন কৰি প্ৰাদেশিকীকৰণ কৰিব। ইয়াৰ বহু দিনৰ পাছত পঞ্চায়ত নিৰ্বাচনৰ আগে আগে মুখ্যমন্ত্রীয়ে পুনৰ এটা ভাল খবৰ দিছিল যে প্রাদেশিকীকৰণ কৰিব।
শেহতীয়া বিধানসভাৰ মজিয়াতো এই কথা সদৰী কৰিছিল; কিন্তু কাৰ্যকৰী একো কৰা হোৱা নাই। সেয়ে মুখ্যমন্ত্রী তথা চৰকাৰখনে স্পষ্ট কৰক যে ভাষণ-প্রতিশ্রুতিৰ মাজতে কার্যকাল শেষ কৰিব নেকি? নে প্রকৃতার্থত প্রাদেশিকীকৰণ কৰিব ? যদি প্ৰাদেশিকীকৰণ কৰে আলোচনা কৰিবলৈ মুখ্যমন্ত্ৰীৰ আপত্তি কিহৰ?”
