Operation Sindoor:✒️ভাৰতীয় সেনাৰ ‘সিন্দূৰ’ অভিযানৰ সময়ত পাকিস্তানৰ কেবাটাও বিমান ঘাটি ক্ষতিগ্ৰস্ত হৈছিল। ইয়াৰে এটা আছিল পাকিস্তানৰ পঞ্জাৱ প্ৰদেশৰ ৰহিম ইয়াৰ খান বায়ুসেনা ঘাটি।
ইণ্ডিয়ান এক্সপ্ৰেছৰ এক প্ৰতিবেদন অনুসৰি শেহতীয়াকৈ পাকিস্তানৰ অসামৰিক বিমান পৰিবহণ মন্ত্ৰালয়ে এক বিজ্ঞপ্তি (NOTAM) জাৰি কৰি ৰহিম ইয়াৰ খানৰ বিমান ঘাটি আৰু কেইদিনমানৰ বাবে বন্ধ থাকিব বুলি উল্লেখ কৰিছে।
এই বিজ্ঞপ্তি অনুসৰি অহা ছয় আগষ্টৰ ভাৰতীয় সময় অনুসৰি পুৱা ৫:২৯ বজালৈ বিমান ঘাটিটো বন্ধ কৰাৰ নিৰ্দেশ দিয়া হৈছে।অপাৰেচন সিন্দূৰৰ সময়ত হোৱা ক্ষতিৰ মেৰামতি এতিয়াও হোৱা নাই বুলি অনুমান কৰা হৈছে।
সূত্ৰ অনুসৰি ‘সিন্দূৰ’ অভিযানৰ দিনা পাকিস্তানৰ অসামৰিক বিমান পৰিবহণ মন্ত্ৰালয়ে এক বিজ্ঞপ্তি জাৰি কৰি ৰহিম ইয়াৰ খানৰ বিমান ঘাটি বন্ধ কৰাৰ কথা ঘোষণা কৰে।
সেই সময়ত ঘোষণা কৰা হৈছিল যে তাত এসপ্তাহৰ বাবে বিমান সেৱা বন্ধ থাকিব।ইয়াৰ পাছত পাকিস্তান মন্ত্ৰালয়ে একেৰাহে কেবাখনো বিজ্ঞপ্তি জাৰি কৰি বিমানঘাটি বন্ধ কৰাৰ সময়সীমা বৃদ্ধি কৰে।
এইবাৰ পাকিস্তান চৰকাৰে আন এক বিজ্ঞপ্তি জৰিয়তে ঘাটিটো বন্ধ কৰাৰ কথা ঘোষণা কৰিছে।তেওঁলোকে জনাইছে যে, কামৰ বাবে তাত উৰণ আৰু অৱতৰণ কৰা কোনো বিমান নাথাকিব।
অৱশ্যে ইয়াতকৈ বেছি একো স্পষ্ট হোৱা নাই।পাকিস্তানৰ পঞ্জাৱ প্ৰদেশৰ দক্ষিণে অৱস্থিত ৰহিম ইয়াৰ খান বিমান ঘাটি।ভাৰতৰ ৰাজস্থান সীমান্তৰ বিপৰীতে অৱস্থিত।
ইয়াত পাকিস্তান সেনাৰ ঘাটিৰ লগতে অসামৰিক বিমান পৰিবহণৰ সুবিধাও আছে। ই পাকিস্তান বায়ুসেনাৰ কেন্দ্ৰীয় বায়ুসেনাৰ ঘাটি। শ্বেখ জায়েদ আন্তঃৰাষ্ট্ৰীয় বিমানবন্দৰ ইয়াৰ এটা অংশ।যিয়ে অসামৰিক যাত্ৰীবাহী বিমান সেৱা আগবঢ়ায়।
অপাৰেচন সিন্দূৰ অভিযানৰ পাছত ভাৰতীয় সেনাই কিছু উপগ্ৰহৰ ছবি প্ৰকাশ কৰে য’ত ৰহিম য়াৰ খান বিমান ঘাটিৰ মাজত গভীৰ গহ্বৰ দেখা যায়। উপগ্ৰহৰ ছবিসমূহত ঘাটিটোৰ এটা ক্ষতিৰ চিহ্নও দেখা গৈছে।
এইবাৰ পাকিস্তানৰ অসামৰিক বিমান পৰিবহণ মন্ত্ৰালয়ে পুনৰ এক বিজ্ঞপ্তি জাৰি কৰিছে যে ৰাণৱে বন্ধ থাকিব। কাৰণ দিয়া হৈছে ‘WIP’। আন্তঃৰাষ্ট্ৰীয় অসামৰিক বিমান পৰিবহণ সংস্থাৰ অভিধানত এই ‘ডব্লিউ আই পি’ৰ অৰ্থ হৈছে ‘ৱৰ্ক ইন প্ৰগ্ৰেছ’।
আমেৰিকাৰ ফেডাৰেল এভিয়েশন এডমিনিষ্ট্ৰেচনৰ (FAA) নিয়ম অনুসৰি বিমানবন্দৰৰ পৃষ্ঠত কাম কৰা কামক ‘WIP’ বুলি কোৱা হয়। পাকিস্তানৰ অসামৰিক বিমান পৰিবহণ মন্ত্ৰালয়ে জাৰি কৰা অধিসূচনাৰ পৰা অনুমান কৰা হৈছে যে ৰহিম ইয়াৰ খান বায়ুসেনা ঘাটিৰ ৰাণৱেত কাম চলি আছে।
বিমানৰ গতিবিধিৰ তথ্য প্ৰদান কৰা Flightradar24 নামৰ এপটোৱে কয় যে পাকিস্তানৰ বিমান ঘাটিটোৰ ৰাণৱে ৩০০০ মিটাৰ দৈৰ্ঘ্যৰ।
