Fake Doctor Detained in Silchar:
ৰাজ্যৰ চৌদিশে মুন্নাভাই এম বিবি এছৰ টিঘিলঘিলনী৷ ইজনৰ পিছত সিজনকৈ আৰক্ষী জালত পৰিছে ভুৱা চিকিৎসক ৷ সচেতন মহলৰ অভিযোগৰ ভিত্তিত আৰক্ষীয়ে কঠোৰস্থিতি লৈ অহাৰ মাজতে শিলচৰৰ ধৰা পৰিল এজন ভুৱা চিকিৎসক । আইএম চি ৰ অভিযোগৰ ভিত্তিত শিলচৰ আৰক্ষীয়ে ঘুংগুৰৰ এখন ব্যক্তিগত নাৰ্ছিংহোমৰ পৰা আটক কৰে এজন চিকিৎসকক ৷ আটকাধীন ভুৱা চিকিৎসকজনৰ নাম পংকজ চৌধুৰী ৷ আৰক্ষীয়ে ভুৱা চিকিৎসকজনৰ পৰা জব্দ কৰে কাজাখস্তানৰ এখন ব্যক্তিগত চিকিৎসা মহাবিদ্যালয়ৰ প্ৰমাণ পত্ৰৰ লগতে কলকাতাৰ আৰ জি কৰ চিকিৎসা মহাবিদ্যালয় হাস্পতালৰ পৰা এমডি ডিগ্রী লোৱা ভুৱা প্ৰমাণ পত্ৰ ৷
ইতিমধ্যে শিলচৰ আৰক্ষীয়ে ভুৱা চিকিৎসক জনৰ নথিপত্ৰ সমূহ তন্নতন্নকৈ পৰীক্ষা কৰাৰ লগতে কাজাখস্তানৰ সংশ্লিষ্ট চিকিৎসা মহাবিদ্যালয় আৰু কলকাতাৰ আৰ জি কৰ চিকিৎসা মহাবিদ্যালয় হাস্পতালৰ কৰ্তৃপক্ষৰ স’তে যোগাযোগৰ বাবে তৎপৰ হৈছে ৷ সংশ্লিষ্ট পক্ষৰ পৰা ভুৱা চিকিৎসক জনৰ নথিপত্ৰ ভুৱা বুলি ৰিপৰ্ট আহিলেই শিলচৰ আৰক্ষীয়ে আনুষ্ঠানিকভাৱে গ্ৰেপ্তাৰ কৰাৰ সম্ভাৱনা আছে।