Nagaon:✒️নগাঁও চহৰৰ ৰাজপথত আৰু বজাৰত কলম বিক্রী কৰি কঠোৰ জীৱন সংগ্রামত ব্রতী হৈছে এগৰাকী ১২ বছৰীয়া কিশোৰীয়ে। এই কিশোৰীগৰাকীৰ নাম জেচমিন চুলতানা। পিতৃহাৰা কিশোৰীগৰাকীৰ মাক অন্য পুরুষৰ স’তে বিবাহপাশত আবদ্ধ হৈছে। বর্তমান আইতাকৰ স’তে কিশোৰীগৰাকী থাকে। বৃদ্ধা আইতাক অসুস্থ হোৱা হেতুকে পৰিয়াল পোহপাল দিবলৈকে তেওঁ জীবিকারূপে কলম বিক্ৰী কৰা পথটোকে বাছি লৈছে।
উল্লেখ্য যে নগাঁও চহৰৰ সমীপৰ কাৱৈমাৰী নিৱাসী নেকিবুৰ ৰহমান নামৰ লোকজনে দুমাহ পূর্বে ৰোগত আক্রান্ত হৈ অকাল মৃত্যুক সাবটি লৈছে। তাৰ পাছতেই নেকিবুৰৰ পত্নীয়ে এই কিশোৰীগৰাকীক এৰি থৈ অন্য এজন লোকৰ স’তে দ্বিতীয় বিবাহপাশত আবদ্ধ হৈছে। লগে লগে কিশোৰীগৰাকীৰ জীৱনলৈ ঘোৰ অমানিশা নামি আহে।
জেচমিন চুলতানা নামৰ কিশোৰীগৰাকীয়ে সংবাদ মাধ্যমৰ আগত কোরা মতে, তাই স্থানীয় এখন ব্যক্তিগত শিক্ষানুষ্ঠানত চতুর্থ শ্রেণীত পঢ়ি আছিল যদিও ধনৰ অভাৱত বর্তমান স্কুল যোৱা নাই। অৱশ্যে চৰকাৰী শিক্ষানুষ্ঠানত তেওঁক কোনেও নামভর্তি কৰাই দিয়া নাই বুলিও উল্লেখ কৰে। এইদৰে আইতাকব স’তে থকা কিশোৰীগৰাকীৰ ঘৰৰ আর্থিক দুৰৱস্থাই ফুলকুমলীয়া বয়সতে কলম বিক্রী কবি দুপইচা উপার্জন কৰাৰ দৰে সংগ্ৰামৰ পথলৈ তেওঁক আনে।
কিশোৰীগৰাকীয়ে প্রকাশ কৰা অনুসৰি, তেওঁ নগাঁও চহৰৰ মৰিগাঁও বাছ আস্থানৰ কিতাপৰ দোকানৰ পৰা পাইকাৰী দৰত কলমসমূহ ক্রয় কবি তাক চহৰখনৰ বিভিন্ন স্থানত ঘুৰি ফুৰি এটা-দুটাকৈ সেইবোৰ বিক্ৰী কৰে। দিনটোত তিনিশ টকাৰ পৰা পাঁচশ টকা পর্যন্ত উপার্জন কৰে।
মৰমলগা কিশোৰীগৰাকীয়ে হাতত কলম লৈ আকুলতাৰে যেতিয়া কোনো লোকক সেইটো ক্ৰয় কৰিবলৈ অনুৰোধ জনায় তেতিয়া বছতেই তেওঁক বিমুখ নকৰে। বহুতেই আকৌ পাঁচ টকা দামৰ কলমটো ১০ টকা, আন বহুতেই ১০ টকা দামৰ কলমটো ২০ টকা দিও ক্রয় কৰে।
কালি নগৰৰ ক্লক টাৱাৰৰ সম্মুখত জিলাখনৰ একাংশ সচেতন নাগৰিকে কলম ক্রয় কৰি কঠোৰ জীবন সংগ্রামত ব্রতী হোৱা কিশোৰীগৰাকীক উৎসাহ জনোৱা পৰিলক্ষিত হয়। এইদৰে বহুতেই কিশোৰীগৰাকীক দুপইচা বেছিকৈ দি হ’লেও তেওঁৰ কৰ্মৰ প্রতি উৎসাহ জনায়। কিশোৰীগৰাকীয়ে লগতে জনায় যে তেওঁ আনৰ ঘৰত কাম নকৰে নাইবা আনৰ ঘৰত থাকি বিদ্যালয়লৈও নাযায়।
আইতাকৰ লগত থাকিবলৈ দি বিদ্যালয়ত যোৱাৰ সুবিধা কৰি দিলে পুনৰ কিশোৰীগৰাকী নিয়মিতভাবে বিদ্যালয়লৈ যাব বুলি মন্তব্য কৰে। ভবিষ্যতে কি কৰিব সেয়া কিশোৰীগৰাকীয়ে নাজানো বুলি মন্তব্য কৰা এই কিশোৰীগৰাকীক সহায় কৰিবলৈ কোনো সদাশয় ব্যক্তি-সংগঠন ওলাবনে, সেয়া এতিয়া এক ডাঙৰ প্রশ্ন হৈ পৰিছে।
