প্রতি বছৰে শীতকালত নগাঁও জিলাত পর্যাপ্ত পৰিমাণৰ শাক-পাচলি উৎপন্ন হয়। এই সময়ত কৃষিপ্রধান জিলাখনত যিহেতু পর্যাপ্ত পৰিমাণৰ ওপৰত শাক-পাচলি উৎপাদন হয় সেয়েহে জিলাখনৰ পাইকাৰী আৰু খুচুৰা পাচলিৰ বজাৰসমূহো ভৰি পৰে বিভিন্ন তৰহৰ শাক-পাচলিৰে।
সেয়েহে স্বাভাৱিকতে এই সময়ত পাচলিৰ দাম হ্রাস পায়। কিন্তু এইবাৰ জিলাখনৰ পাইকাৰী শাক-পাচলিৰ বজাৰত থলুৱাভারে উৎপাদিত শাক-পাচলি উভৈনদী হৈ পৰা সত্ত্বেও পূৰ্বৰ দৰে জিলাখনৰ পাচলিৰ খুচুৰা বজাৰসমূহত পাচলিৰ দাম কম হোৱা নাই। এইবাৰ ডিচেম্বৰ যাবলৈ মাজত মাথোঁ ছটা দিনহে বাকী থকা অৱস্থাতো জিলাখনত পাচলি বজাৰত পূৰ্বৰ দৰে পাচলিৰ দাম হ্রাস নোপোৱাৰ সন্দৰ্ভত পাইকাৰী ব্যবসায়ীসকলৰ ভাষ্য হ’ল জিলাখনৰ পাচলি উৎপাদনৰ অন্যতম স্থান বহু চৰ চাপৰিত প্রশাসনে উচ্ছেদ অভিযান চলোৱাৰ বাবে সেই ঠাইত এইবাৰ পাচলি খেতি কৰা হোৱা নাই।
আনহাতে, আন বহু চৰ চাপৰিৰ কৃষকে বেদখল উচ্ছেদৰ ভয়তে পূৰ্বৰ তুলনাত বহু কম পৰিমাণে পাচলিৰ খেতি কৰা, পথাৰত প্ৰয়োজনীয় জলসিঞ্চন ব্যবস্থা নথকা হেতুকে পাচলি খেতি ভাল নোহোৱা আৰু বৰষুণৰ অভাৱ আদিৰ বাবে পূৰ্বৰ তুলনাত এইবাৰ জিলাখনত পাচলি কমকৈ উৎপন্ন হৈছে। পূৰ্বৰ দৰে এইবাৰ পাচলিৰ পাইকাৰী বজাৰত ডিচেম্বৰৰ বজাৰতো পাচলি উভৈনদী হৈ পৰা নাই।
সেয়েহে আগৰ বছৰসমূহৰ দৰে এইবাৰ দাম বহু বেছি কমা নাই। অবশ্যে জানুৱাৰীৰ পৰা পাচলিৰ দাম হ্রাস পাব। যিহেতু জিলাখনৰ পাচলি বজাৰত প্রশাসন আৰু যোগান বিভাগৰ কোনো ধৰণৰ নিয়ন্ত্রণেই নাই সেয়েহে এই যুক্তি দেখুৱাই সম্প্রতি নগাঁও জিলাত প্রতিবিধ পাচলিৰ দামেই এতিয়াও চৰা কৰি ৰাখিছে ব্যৱসায়ীসকলে।
সেয়েহে এতিয়া পাচলিৰ সোৱাদ লোৱাটো দৰিদ্ৰ আৰু নিম্ন আয়ব পৰিয়ালৰ লোকৰ বাবে কষ্টসাধ্য হৈ পৰিছে। এতিয়া নগাঁও চহৰৰ প্ৰতিখন পাচলিৰ বজাৰত যিকোনো পাচলিৰ সৰ্বনিম্ন দৰ হৈছেগৈ ৩০ টকা। আশ্চর্যজনক কথাটো হ’ল জিলাখনৰ ধিং, মাঠখলা, ডুমডুমীয়া, বলিকটীয়া, শান্তিজান, জুৰীয়া, ৰূপহী, আমবাগান, লাওখোৱা, নলতলী, চামগুৰি, বাঙলু, নগাঁও গাহৰি বজাৰ প্ৰমুখ্যে বিশিষ্ট পাচলিৰ পাইকাৰী বজাৰ আৰু বিভিন্ন খুচুৰা বজাৰত প্রতিবিধ পাচলিৰ প্রতিকেজিত দামৰ ১৫-২০ টকা পর্যন্ত তাৰতম্য পৰিলক্ষিত হৈছে।
এই পাইকাৰী বজাৰসমূহত প্রশাসন অথবা যোগান বিভাগৰ কোনো নিয়ন্ত্রণ নথকা হেতুকে পাইকাৰী ব্যৱসায়ীসকলে নিজৰ খেয়াল খুচি অনুসৰি দৰ নিৰ্ধাৰণ কৰি আহিছে। যোৱা দুদিনত নগাঁও চহৰৰ বৰবজাৰ, আইটিআই বজাৰ, কেঁচা আলি বজাৰ, ডিমৰুগুৰি বজাৰ, নতুন বজাৰ, নেহৰুবালি বজাৰ, ধিং গেট প্রমুখ্যে একাংশ পাচলিৰ খুচুৰা বজাৰত চলোৱা এক জৰীপৰ জৰিয়তে প্রাপ্ত তথ্য অনুসৰি, সম্প্রতি নগাঁও চহৰৰ খুচুৰা পাচলিৰ বজাৰসমূহত আলু প্রতি কেজিৰ দাম ২৫-৩০ টকা, পিঁয়াজ ৩০-৩৫ টকা, নহৰু ১৭০ টকা আৰু আদাৰ প্ৰতি কেজিৰ দৰ ২০০ টকা।
ঠিক একেদৰে বিলাহী প্রতি কেজিৰ দাম ৩০-৪০ টকা, ফুলকবি ২৫-৩০ টকা, বন্ধাকবি ২০-২৫ টকা, ওলকবি ৩০-৩৫ টকা, গাজৰ ৩০-৩৫টকা, ব্রকলি ৫০-৬০ টকা, কেঁচা মটৰৰ চেও ৬০-৭০ টকা, বেঙেনা ৪২ টকা, কেঁচা জলকীয়া ৬০-৮০ টকা, ফ্রেচবিন ৪০ টকা, উৰহী ২০-৪০ টকা, লেছেৰা ৪০-৫০ টকা, তিতা কেৰেলা ৪০-৪৫ টকা, তিয়হ ২০ টকা, পানী লাও গোটে ৩০-৩৫ টকা, কেপচিকাম ৭০ টকা, ৰঙালাও প্রতি কেজি ২৫-৩০ টকা, ভীমকলৰ কলডীল গোটে ৮০-১০০ টকা মূল্যত বিক্রী হৈ আছে।
অথচ জিলাখনৰ বিভিন্ন পাইকাৰী পাচলি বজাৰত এইসমূহ পাচলিৰ প্ৰতি বিধৰেই দাম প্রতি কেজিত অতি কমেও ১০-১৫ টকা পর্যন্ত কম।
উল্লেখ্য যে কৃষিপ্রধান জিলা নগাঁৱৰ মুঠ কৃষিভূমি ১,৫১,৬৬১ হেক্টৰ। ইয়াৰে ২৬,৩৩২ হেক্টৰ মাটিতহে শাক পাচলিৰ খেতি কৰা হয়। জিলাখনৰ ধিং, ডুমডুমীয়া, বলিকটিয়া, বালিসত্র, জুৰীয়া, ৰূপহী, চামগুৰি, লাওখোৱা, আমবাগান, নলতলী, কঠিয়াতলি, বাঙলু, ননৈ, ঘাঁহী, বৰকলা আদিকে ধৰি বিভিন্ন অঞ্চলত প্ৰচুৰ পৰিমাণে শাক-পাচলি উৎপাদন হয়।
জিলাখনৰ পাইকাৰী আৰু খুচুৰা পাচলিৰ বজাৰত অতি উচ্চ দামত এতিয়াও শীতৰ পাচলি বিক্ৰী হৈ থাকিলেও উৎপাদক প্রকৃত কৃষকসকলে কিন্তু সিমান দাম লাভ কৰা নাই। জিলাখনৰ ধিঙৰ কৃষক নজমুল হকে কয়, ‘আমি যি দামত পাইকাৰী বজাৰত পাচলি বিক্ৰী কৰো তাৰ দুগুণ দামত পাইকাৰী ব্যৱসায়ীয়ে খুচুৰা ব্যৱসায়ীক একেখিনি পাচলিকে বিক্রী কৰে।
সেয়েহে ৰাইজে বহু বেছি দাম দি পাচলি কিনিবলগীয়া হৈছে।’ ইপিনে, ধিঙৰ ৰিয়াজ উদ্দিন, দিলদাৰ ফাৰাজী ইলিমুদ্দিন, ডুমডুমীয়াৰ বিয়াজ উদ্দিন, লাওখোৱাৰ মাণিক মণ্ডল, ৰূপহীহাটৰ আজগৰ আলী প্রমুখ্যে কৃষকসকলে জনোৱা মতে তেওঁলোকে এতিয়া আলু, পিঁয়াজৰ নলা, বিলাহী, বেঙেনা, কবি, উৰহী আদি বজাৰত বিক্ৰী কৰি আছে।
তেওঁলোকে যিটো দামত পাইকাৰী বজাৰত পাচলি বিক্ৰী কৰে সেই একেখিনি পাচলিকে পাইকাৰী বজাৰত ১০-১৫ টকা প্রতি কেজি মূল্যত বেছিকৈ দামত বিক্রী হোৱা আৰু খুচুৰা বজাৰত ২০-২৫টকা পর্যন্ত বেছি দামত বিক্ৰী হৈ থকাৰ কথা গম পায়। তেওঁলোকে কয়, ‘আমি কষ্ট কৰি পাচলি উৎপাদন কৰো যদিও আমাতকৈ পাইকাৰী আৰু খুচুৰা ব্যৱসায়ী সকলহে বেছিকৈ লাভবান হয়।’
আনহাতে, নগাঁৱৰ খুচুৰা বজাৰত পাচলিৰ দাম এতিয়াও হ্রাস নোপোৱাৰ সন্দৰ্ভত চাহজাহান আলী, আইনুল হক, মাণিক বৰা, যোগেন নাথ প্রমুখ্যে খুচুৰা পাচলিৰ ব্যৱসায়ীসকলৰ ভাষ্য হ’ল, ‘আমি পাইকাৰী বজাৰত বেছি দামত কিনিবলগীয়া হ’লে অলপ বেছি দামত বিক্ৰী কৰিবলৈ বাধ্য হওঁ।’
