Piyanka Gandhi Pressmeet in Delhi:
দৈনিক অগ্ৰদূত ডিজিটেল ডেক্স:–সংসদ – বিধানসভাত মহিলাৰ আসন সংৰক্ষণ আৰু লোকসভাত আসন বৃদ্ধি সংক্ৰান্তীয় সংবিধান (১৩১ সংশোধনী) বিধেয়কখন লোকসভাত গৃহিত কৰিব নোৱাৰিলে নৰেন্দ্ৰ মোদী নেতৃত্বাধীন এনডিএ চৰকাৰে ৷ এনডিএ লোকসভাত পৰাজয়ৰ পাছত কংগ্ৰেছৰ সাংসদ প্ৰিয়ংকা গান্ধীয়ে শনিবাৰে নতুন দিল্লীত এক সংবাদমেল অনুষ্ঠিত কৰি কেন্দ্ৰীয় চৰকাৰৰ বিৰুদ্ধে সৰৱ হৈ পৰে ৷ এনডিএ’ৰ পৰাজয়ক গণতন্ত্ৰ আৰু সংবিধানৰ জয় বুলি অভিহিত কৰি গান্ধীয়ে কয় যে চৰকাৰে ফেডাৰেল গাঁথনি সলনি কৰাৰ ষড়যন্ত্ৰ কৰিছে যদিও বিৰোধীৰ ঐক্যই ইয়াক বিফল কৰিবলৈ সক্ষম হ’ল ।
প্ৰিয়ংকা গান্ধীয়ে কয় যে কালি যিটো হ’ল সেয়া গণতন্ত্ৰৰ বাবে এক বৃহৎ জয়। ফেডাৰেল গাঁথনি সলনি কৰি গণতন্ত্ৰক দুৰ্বল কৰাৰ বাবে চৰকাৰৰ ষড়যন্ত্ৰ পৰাজিত হৈ বন্ধ হৈ পৰিছে। তেওঁ আৰু কয় যে এই জয় কেৱল বিৰোধীৰ বাবেই নহয়, সংবিধান আৰু দেশৰ বাবেহে। এই বিৰোধী ঐক্যৰ প্ৰভাৱ শাসকীয় দলৰ নেতাসকলৰ মুখত স্পষ্টকৈ দেখা পোৱা বুলি কটু মন্তব্য কৰে ৷
চৰকাৰৰ উদ্দেশ্যক লৈ প্ৰশ্ন উত্থাপন কৰি কংগ্ৰেছ সাংসদ গৰাকীয়ে অভিযোগ কৰে যে বিজেপিয়ে যিকোনো মূল্যৰ বিনিময়ত ক্ষমতাত থাকিবলৈ নাৰীক “সঁজুলি” হিচাপে ব্যৱহাৰ কৰিব বিচাৰে।মই বিশ্বাস কৰোঁ যে এইটো যিকোনো মূল্যৰ বিনিময়ত ক্ষমতাত থকাৰ গভীৰ ষড়যন্ত্ৰ। ইয়াৰ বাবে তেওঁলোকে নাৰীক ব্যৱহাৰ কৰি কেনেকৈ স্থায়ীভাৱে ক্ষমতা দখল কৰিব পাৰি তাৰ পৰিকল্পনা কৰিছে।”
প্ৰিয়ংকা গান্ধীয়ে আৰু কয় যে,”আমাৰ স্থিতি অতি স্পষ্ট। লোকসভাত হোৱা ভোটদানৰ ফলত আৰু স্পষ্ট হৈ পৰিছে যে আমাৰ বুজাবুজিত এই বিধেয়কখন উত্থাপন কৰা হৈছিল আৰু তিনিদিনীয়া বিতৰ্কত মহিলাৰ সংৰক্ষণৰ বিষয়ে নাছিল; ই সম্পূৰ্ণৰূপে সীমা নিৰ্ধাৰণৰ বিষয় আছিল আৰু আমি সকলোৱে এই সন্দৰ্ভত আমাৰ মতামত অতি স্পষ্টভাৱে প্ৰকাশ কৰিছো।”
