MysteriousDeath :দৈনিক অগ্ৰদূত ডিজিটেল ডেস্ক : বীৰ লাচিত সেনাৰ শিমলুগুৰি আঞ্চলিক সমিতিৰ সভাপতি মানসজ্যোতি চেতিয়া (৩৪)ই কালি পুৱতি নিশা চিকিৎসাধীন অৱস্থাত ডিব্ৰুগড়স্থিত অসম চিকিৎসা মহাবিদ্যালয়ত মৃত্যুক সাবটি লয়। যোৱা ২৩ আগষ্টত বানবিধ্বস্ত বিহুবৰৰ এজন বৃদ্ধ লোকৰ সহায়ৰ বাবে গৈ পৰৱৰ্তী সময়ত নিশা ঘৰলৈ মটৰ চাইকেলৰে উভতি আহিছিল মানসজ্যোতি। সেই সময়ত অগাপিছাকৈ আহি থকা মানসজ্যোতিৰ সতীর্থসকলে তেওঁ বহু দেৰিলৈকে উভতি নহা দেখি বিচাৰ-খোচাৰ কৰে।
পৰৱৰ্তী সময়ত তেওঁলোকে মানসক তেজৰে তুমুৰলি অৱস্থাত চন্টক বিহুবৰৰ মাজৰ ৰাজপথত পৰি থকা প্ৰত্যক্ষ কৰে। সংকটজনক অৱস্থাত ততালিকে মানসক চিকিৎসাৰ বাবে ডিব্ৰুগড়ৰ অসম চিকিৎসা মহাবিদ্যালয়লৈ প্ৰেৰণ কৰা হয়। কিন্তু আজি পুৱতি নিশা চিকিৎসাধীন অবস্থাতে কৰুণ মৃত্যুক আঁকোৱালি লয় বীৰ লাচিত সেনাৰ শিমলুগুৰি আঞ্চলিক সমিতিৰ সভাপতি মানসজ্যোতিয়ে।
উল্লেখ্য যে বিগত ১৯ জুলাইত দিখৌ নদীৰ প্রলয়ংকৰী বানে বিধ্বস্ত কৰি তোলা চন্টক, বিহুবৰ, শিমলুগুৰি আদি অঞ্চলত দিন-ৰাতি একাকাৰ কৰি বানবিধ্বস্ত লোকক সৰ্বতোপ্ৰকাৰে সহায়-সহযোগ কৰি অহা মানৱদৰদী যুৱক তথা বীৰ লাচিত সেনাৰ নেতা মানসজ্যোতিৰ এই অকাল মৃত্যুত শোকৰ ছাঁ পৰিছে সমগ্র নাজিৰা, শিমলুগুৰি, চন্টক বিহুবৰ অঞ্চলত। নিজৰ পৰিয়াল বানৰ কৱলত পৰাৰ পাছতো সামাজিক দায়িত্ব পালন কৰি বানপীড়িত লোকৰ কাষত থিয় দিয়া মানসে বানত মৃত্যুবৰণ কৰা লোকৰ শেষকৃত্যৰ লগতে সকাম তথা মাংগলিক কাৰ্যতো সহায় কৰিছিল।
শিমলুগুৰিৰ নিকটৱৰ্তী আদাবাৰী সন্দিকৈ গাঁৱৰ প্রয়াত নন্দী চেতিয়া আৰু যমুনা চেতিয়াৰ কনিষ্ঠ পুত্ৰ আছিল প্রয়াত মানসজ্যোতি।ইফালে, বীৰ লাচিত সেনাৰ শিমলুগুৰি আঞ্চলিক সমিতিৰ সভাপতিৰূপে কাৰ্যনিৰ্বাহ কৰা মানসজ্যোতিৰ এই কৰুণ মৃত্যুক সহজভাবে ল’ব পৰা নাই স্থানীয় লোকে।
উল্লেখ্য যে প্রলয়ংকৰী বানৰ পাছৰে পৰা আৰ্তজনৰ কাষত থিয় হোৱা মানসে শেহতীয়াকৈ বিহুবৰ অঞ্চলত চুবুৰীয়াৰ অত্যাচাৰৰ বলি হোৱা এজন দুৰ্ভগীয়া ৯৫ বছৰীয়া বৃদ্ধৰ ন্যায়ৰ বাবে সতীৰ্থৰ স’তে আগভাগ লৈছিল। বানপানীত কেঁচাঘৰটো সম্পূৰ্ণৰূপে ধ্বংস হোৱাৰ সুযোগ লৈ চুবুৰীয়া এঘৰ লোকে বৃদ্ধজনৰ মাটি দখল কৰাৰ অভিযোগ উঠাৰ পাছতে দুৰ্ভগীয়া বৃদ্ধজনৰ পক্ষত থিয় হৈছিল বীৰ লাচিত সেনাৰ অন্যান্য সদস্যৰ স’তে মানসজ্যোতি।
চুবুৰীয়াৰ অত্যাচাৰত আনকি বৃদ্ধজনে কাষৰে এটা পেট্ৰ’ল পাম্পত আশ্রয় ল’বলগীয়া হোৱাত বীৰ লাচিত সেনাই স্থানীয় লোকৰ সহযোগত বাঁহৰে এটা ঘৰ সাজি দিছিল। পৰৱৰ্তী সময়ত বৃদ্ধজনক দুপৰ নিশা কোনো লোকে আক্ৰমণ কৰি চিকিৎসাধীন কৰা কাৰ্যৰো তীব্ৰ বিৰোধ কৰিছিল বীৰ লাচিত সেনাই।
সেই বৃদ্ধজনৰ খবৰ লৈ দেওবাৰে নিশা ঘৰলৈ মটৰ চাইকেলৰে আহি থকা অৱস্থাত ৰহস্যজনকভাৱে ৰাজপথৰ কাষত মানসজ্যোতিক সংকটজনক অৱস্থাত পোৱা বিষয়টোৱে এয়া সাধাৰণ পথ দুর্ঘটনা নে পৰিকল্পিত আক্রমণ তাক লৈ বিভিন্নজনৰ মনত সন্দেহৰ আৱতাৰণা ঘটিছে। প্রশাসনক সমগ্র বিষয়টো তদন্ত কৰিবলৈ দাবী জনাইছে স্থানীয় বাইজে।
বানবিধ্বস্ত লোকৰ মাজত বিভিন্ন সা-সামগ্রী বিতৰণ স্থানীয় নামঘৰসমূহত ধর্মগ্রন্থৰ লগতে সাহায্য বিতৰণত আগভাগ লোৱা মানসজ্যোতিৰ মৃত্যুত বিভিন্ন দল-সংগঠনে শোক প্রকাশ কৰিছে।
