NikhariRiver : দৈনিক অগ্ৰদূত ডিজিটেল ডেস্ক : দীর্ঘ সময় ধৰি পূৰ্বৰ যমুনামুখ বর্তমান বিন্নাকান্দি সমষ্টিটো আজমল পৰিয়ালৰ দখলত থাকিলেও এখন দলঙৰ অভাৱৰ বাবে বছৰ বছৰ ধৰি যাতায়াতৰ ক্ষেত্রত যমৰ-যাতনা ভোগ কৰিবলগীয়া হৈছে ডবকাৰ এক বৃহত্তৰ অঞ্চলৰ ৰাইজে।
ডবকা নিখাৰী নৈৰ ওপৰত পকী দলং নির্মাণ নোহোৱাত চাংমাজী, পাতিদয়া, বনগাঁও, যোগীজানকে ধৰি কে’বাখনো গাঁৱৰ ৰাইজে জীৱন হাতৰ মুঠিত লৈ বিপদসংকুলভাৱে নৈ পাৰ হৈ যাতায়াত কৰিবলগীয়া হৈছে। বর্তমান টুলুঙা নাও অথবা বাঁহৰ সাঁকোৰ ওপৰতে নিৰ্ভৰশীল অঞ্চলবাসী।
বাৰিষা নৈৰ পানী বৃদ্ধি পালে এই যাতায়াত ব্যৱস্থা অধিক বিপজ্জনক হৈ পৰে। বিশেষকৈ বিন্নাকান্দি সমষ্টিৰ অন্তর্গত এই অঞ্চলসমূহৰ শ-শ ছাত্র-ছাত্রীয়ে প্রতিদিনে বিদ্যালয়লৈ অহা-যোৱা কৰোঁতে নৈ পাৰ হ’বলগীয়া হোৱাৰ ফলত তেওঁলোকৰ জীৱন-সুৰক্ষাক লৈ উদ্বিগ্ন হৈ পৰিছে অভিভাৱকসকল।
ইয়াৰ উপৰি দলং নথকাৰ বাবে অঞ্চলটোত জৰুৰীকালীন সেৱাও ব্যাপকভারে ব্যাহত হৈ পৰিছে। জৰুৰী সময়ত এম্বুলেন্স, অগ্নিনির্বাপক বাহন আদি অঞ্চলটোলৈ প্ৰৱেশ কৰাত বাধাৰ সৃষ্টি হোৱাৰ লগতে ৰোগীক ক্ষিপ্ৰতাৰে চিকিৎসালয়লৈ নিয়াৰ ক্ষেত্ৰতো সমস্যাৰ সৃষ্টি হৈ আহিছে।
অগ্নিকাণ্ড বা আন কোনো দুর্যোগৰ সময়তো জৰুৰীকালীন বাহন সময়মতে উপস্থিত হ’ব নোৱাৰাৰ আশংকা আছে। অঞ্চলবাসীৰ অভিযোগ অনুসৰি, নিখাৰী নৈৰ ওপৰত এখন স্থায়ী দলং নিৰ্মাণৰ বাবে স্থানীয় জনপ্রতিনিধি তথা সংশ্লিষ্ট কর্তৃপক্ষক বাৰম্বাৰ দাবী জনাই অহা হৈছে। কিন্তু বছৰ বছৰ ধৰি দাবী উত্থাপন কৰি অহাৰ পাছতো আজিকোপতি সমস্যাটোৰ কোনো স্থায়ী সমাধান নহ’ল।
স্থানীয় ৰাইজৰ অভিযোগ অনুসৰি তেওঁলোকে বিধায়ক বা বিভাগীয় কর্তৃপক্ষৰ পৰা প্ৰতিশ্রুতি আৰু উপেক্ষাৰ বাহিৰে কোনো ফল পোৱা নাই। এখন দলঙৰ অভাৱত কেৱল যাতায়াত ব্যৱস্থাই নহয়, শিক্ষা, স্বাস্থ্য আৰু জৰুৰীকালীন সেৱাৰ ক্ষেত্ৰতো অঞ্চলবাসীয়ে চৰম দুর্ভোগ ভুগিবলগীয়া হৈছে।
কণ-কণ ছাত্ৰ-ছাত্ৰীৰ জীৱন-সুৰক্ষাৰ লগতে বৃহত্তৰ অঞ্চলবাসীৰ যাতায়াতৰ সমস্যা দূৰ কৰাৰ স্বাৰ্থত নিখাৰী নৈৰ ওপৰত অতি শীঘ্ৰে এখন স্থায়ী দলং নিৰ্মাণৰ ব্যৱস্থা গ্রহণ কৰিবলৈ চৰকাৰ, সংশ্লিষ্ট বিভাগ আৰু সমষ্টিৰ বিধায়ক বদৰুদ্দিন আজমলক ৰাইজে দাবী জনাইছে।
