Guwahati’s hills under threat:
দৈনিক অগ্ৰদূত ডিজিটেল ডেস্ক: মহানগৰীৰ একাধিক স্থানত হোৱা ভয়ংকৰ ভূমিস্খলনত প্ৰাণ হেৰুৱালে চাৰিজন লোকে। তদুপৰি এজন লোক আহত হয়। সোমবাৰে পুৱাৰে পৰা হোৱা মুষলধাৰ বৰষুণত মঠঘৰীয়াৰ নিজৰাপাৰ আৰু সাতগাঁৱৰ তালতলা অঞ্চলত সংঘটিত হয় এই ভূমিস্খলনৰ ঘটনা। প্রথম ঘটনাটো সংঘটিত হয় মঠঘৰীয়াৰ নিজৰাপাৰ অঞ্চলত। নেৰানেপেৰা বৰষুণৰ বাবে এই ঘটনা ঘটিত হোৱা বুলি ধাৰণা কৰা হৈছে। অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ বিষয়াই জনোৱা মতে, প্রথম ঘটনাটো সংঘটিত হয় পুৱা প্রায় ৭-৩০ বজাত মঠঘৰীয়াৰ নিজৰাপাৰত।
পাহাৰৰ এটা অংশ খহি পৰিয়ালটোৰ ঘৰৰ ওপৰত বাগৰি পৰাত শুই থকা অৱস্থাতে মাটিৰ তলত আবদ্ধ হৈ পৰে পিতৃ-মাতৃ, কন্যাসহ পৰিয়ালৰ তিনিজনেই। প্রশাসনে জনোৱা মতে, মাটি আৰু শিলৰ তলত আবদ্ধ হৈ কৰুণ মৃত্যুক সাবটি লয় নগেন ৰাজবংশী (৪৪), তেওঁৰ পত্নী চুনু ৰাজবংশী (৩৮) আৰু তেওঁলোকৰ ১২ বছৰীয়া কন্যা মীনা ৰাজবংশীয়ে। অৱশ্যে স্থানীয় ৰাইজ আৰু উদ্ধাৰকাৰী দলে পৰিয়ালটোৰ ১৯ বছৰীয়া পুত্ৰক ধ্বংসস্তূপৰ মাজৰ পৰা জীৱন্তে উদ্ধাৰ কৰিবলৈ সক্ষম হয়। বর্তমান তেওঁ গুৱাহাটী চিকিৎসা মহাবিদ্যালয়ত চিকিৎসাধীন হৈ আছে।
আনহাতে, দ্বিতীয়টো ঘটনা সংঘটিত হয় সাতগাঁৱৰ তালতলা অঞ্চলত। পাহাৰৰ পৰা বাগৰি অহা এটা বৃহৎ আকাৰৰ শিলাখণ্ডই এটা ঘৰ ভাঙি পেলোৱাৰ লগতে ৬৫ বছৰীয়া এগৰাকী মহিলাৰ মৃত্যু হয়। প্রশাসনৰ বিষয়াই জনোৱা মতে পুৱা এ.র ৬-৩০ বজাত কলিতাকুছি গাঁৱৰ পি সুমিতাৰ ঘৰৰ ওপৰত শিল বাগৰি পৰাত তেওঁৰ মৃত্যু হয় আৰু আন তিনিজন ক্রমে পি লক্ষী, পি ৰামান্না আৰু দময়ন্তী দাস আহত হয়।
উল্লেখ্য যে অসম বিধানসভাৰ এক তথ্য অনুসৰি ২০১৬ৰ পৰা ২০২৫ৰ ভিতৰত অসমত ৯৩ জন লোকে ভূমিস্খলনত প্রাণ হেৰুৱাইছে। ২০১৬ৰ পৰা ২০২২ৰ ভিতৰত কামৰূপ মহানগৰীত ৭৯ টা ভূমিস্খলনৰ ঘটনাত ২২ জনে প্রাণ হেৰুৱাছে।
আনহাতে গুৱাহাটীৰ ৩৬৬টা অঞ্চলতে পুনৰ ভূমিস্খলন হোৱাৰ সম্ভাৱনা ব্যক্ত জিলা প্ৰশাসনৰ। যাৰবাবে ৩৬৬টা অঞ্চলক স্পৰ্শকাতৰ অঞ্চল চিনাক্ত কৰি প্রশাসন তৎপৰত হৈ পৰিছে৷
ইপিনে ভূমিস্খলন হোৱাৰ সম্ভাৱনা থকা স্পৰ্শকাতৰ অঞ্চল সমূহ হ’ল চূণচালিৰ ৭৭ টা অঞ্চল অতি বিপদজনক, নুনমাটিৰ ৪০ টা অঞ্চল ভূমিস্খলনপ্ৰৱণ, খাৰঘুলিৰ ৩৭ টা অঞ্চল ভূমিস্খলনপ্ৰৱণ এলেকা,খানাপাৰাৰ ৩৩ টা ভূমিস্খলনপ্রৱণ এলেকা, নাৰেংগীৰ ৩১ টা ভূমিস্খলনপ্ৰৱণ এলেকা, হেঙেৰাবাৰীৰ ৩০ টা ভূমিস্খলনপ্ৰৱণ এলেকা, কাহিলীপাৰাৰ ২৫ টা ভূমিস্খলনপ্ৰৱণ এলেকা, শান্তিপূৰৰ ২০ টা ভূমিস্খলনপ্ৰৱণ এলেকা, নৰকাসুৰ পাহাৰ ১৪ টা ভূমিস্খলনপ্ৰৱণ এলেকা, গড়ভঙাৰ ৯টা স্থান ভূমিস্খলনপ্ৰৱণ এলেকা, মালিগাঁওৰ ৮ টা ভূমিস্খলনপ্ৰৱণ এলেকা,কালাপাহাৰৰ ৭ টা ভূমিস্খলনপ্ৰৱণ এলেকা, গোটানগৰ, নৱগ্ৰহৰ ৬ টাকৈ স্থান ভূমিস্খলনপ্ৰৱণ, কইনাধৰা, কামাখ্য, ফটাশিল, শৰণীয়াৰ ৫টা অঞ্চল আৰু লংকেশ্বৰৰ ২টা, শুক্ৰেশ্বৰৰ ১ টা অঞ্চল ভূমিস্খলনপ্ৰৱণ এলেকা হিচাপে চিহ্নিত কৰা হৈছে ৷
