কৰ্তব্যৰত গৃহৰক্ষী জোৱানক চাকৰিৰ পৰা বৰ্খাস্ত
মৰিগাঁও:– মৰিগাঁও জিলা আৰক্ষী থানাৰ ভিতৰত অভিযুক্তক লৈ উঠা বন্ধুৰ ছেল্ফীয়ে সমগ্ৰ জিলা খনতেই তীব্ৰ চাঞ্চল্যৰ সৃষ্টি হৈছে। মৰিগাঁৱৰ মিকিৰভেটা আৰক্ষী থানাৰ ভিতৰত সংঘটিত হৈছে এই ঘটনা । প্ৰাপ্ত তথ্য মতে মৰিগাঁও জিলাৰ মিকিৰভেটা থানাৰ অন্তৰ্গত বালিগাঁৱৰ বচৰৎ উদ্দিনৰ কণ্যা চেলিনা বেগমক স্বামী আচাদুৰে নিজৰ ঘৰৰ পদুলীত এখন নীলা মেক্সিম’ বাহনেৰে চেপি হত্যাৰ চেষ্টা চলাইছিল। আচাদুৰ ৰহমানৰ পত্নী চেলিনা বেগমৰ পৰিয়ালে মিকিৰভেটা আৰক্ষী থানাত পত্নীক নিৰ্যাতন চলাই হত্যাৰ চেষ্টা চলোৱাৰ অভিযোগত ২৩ ছেপ্টেম্বৰত দাখিল কৰা ৩৭৩/১৯ নম্বৰৰ গোচৰৰ ভিত্তিত মিকিৰভেটা আৰক্ষীয়ে অভিযুক্ত আচাদুৰক আটক কৰি আইনী প্ৰক্ৰিয়া আৰম্ভ কৰে। আনহাতে অভিযুক্ত আচাদুৰক আৰক্ষীয়ে আটক কৰাৰ পাই থানাত তেওঁৰ পাচঁজন ঘনিষ্ঠ বন্ধু মিকিৰভেটা থানাত উপষ্ঠিত হয়। আৰক্ষীয়ে গিজগিজাই থকা থানাখনত অভিযুক্ত বন্ধুক লৈ ছেল্ফী উঠি ৰফিকুল আলী নামৰ এজন বন্ধুৱে নিজৰ ফেচবুক একাউণ্টত আপলোড দিয়ে৷এই ফটো কপি চচিয়েল মেডিয়াত ভাইৰেল হৈ পৰাত মৰিগাঁও জিলাত তীব্ৰ প্ৰতিক্ৰিয়া সৃষ্টি হৈছে৷ জানিব পৰা মতে আচাদুৰ ৰহমানৰ পত্নী ২৩ ছেপ্টেম্বৰৰ পৰা মৰিগাঁও অসামৰিক চিকিৎসালয়ত চিকিৎসাধীন হৈ আছিল যদিও তেওঁ সুষ্ঠ হৈ উঠাত কালি চিকিৎসকে ঘৰলৈ পঠাই দিয়ে। আচাদুৰে পত্নী চেলিমাক পূৰ্বৰ পৰাই শাৰীৰিক আৰু মানসিক নিৰ্যাতন সহিব নোৱাৰি পিতৃ গৃহত আশ্ৰয় লৈছিল বুলিও অভিযোগ উত্থাপিত হৈছে । আনহাতে সমগ্ৰ ঘটনাটো জিলাখনত চাঞ্চল্য সৃষ্টি হোৱাৰ পাছতেই ছেল্ফী কাণ্ডৰ অভিযুক্তক আৰক্ষীয়ে ৩৭৫/১৯ নম্বৰত গোচৰ ৰুজু কৰি আচাদুৰ সহ বন্ধু মিন্টু আলী,ইয়াজুতদ্দিন,ৰিবুল আলী,ইনাউদ্দিন,ৰুবুল আলীক মিকিৰভেটা আৰক্ষীয়ে আটক কৰিছে। ইপিনে মৰিগাঁও আৰক্ষী থানাৰ ভিতৰত আচামীৰ লগত বন্ধুয়ে ছেল্ফী মাৰি ফেচবুকত আপডেট দিয়া সন্দৰ্ভত মৰিগাঁও আৰক্ষী অধীক্ষকে তৎকালীন ভাৱে কৰ্তব্যতত গাফিলতি কৰা মিকিৰভেটা আৰক্ষী থানৰ গৃহৰক্ষী পৰাগ জ্যোতি ৰাজকুমাৰক চাকৰিৰ পৰা বৰ্খাস্ত কৰে আৰু ঘটনাৰ সন্দৰ্ভত মৰিগাঁও অতিৰিক্ত আৰক্ষী অধীক্ষক লুইত তালুকদাৰৰ তদন্তৰ দায়িত্ব দিয়ে৷
