চহৰখনৰ নাম উইকি ওৱাচি । মাৰ্কিন যুক্তৰাষ্ট্ৰৰ ফ্ল’ৰিডাস্থিত সৰু চহৰখন বিখ্যাত পৰ্যটকৰ বাবে । ২০১০ ৰ জনগণনা অনুসৰি চহৰখনৰ জনসংখ্যা ১৩ জন । জনসংখ্যা কম হ’লেও পৰ্যটকৰ আগমন চলি থাকে । পৰ্যটকৰ আগমনৰ উদ্দেশ্য বিনোদন । উইকি ওৱাচি চহৰত থকা ৱাটাৰ পার্ক, উইচি ওৱাচি স্প্ৰিং, বিভিন্ন প্ৰাণী সম্পৰ্কিত প্ৰদৰ্শনী আদি দৰ্শকৰ বাবে বিশেষ আকর্ষণীয় কেন্দ্ৰ; কিন্ত দৰ্শকক সবাতোকৈ অধিক আকৃষ্ট কৰে উইকি ওৱাচি স্প্ৰিং অনুষ্ঠানে । এই অনুষ্ঠানত মৎস্যকন্যা সাজি একাংশই সাংস্কৃতিক কাৰ্যসূচী পৰিৱেশন কৰে । মৎস্যকন্যাসকলক চাবলৈ প্ৰতিদিনে অনুষ্ঠানত ভিৰ কৰে পৰ্যটকে। ৱাটাৰ পাৰ্কত আছে বৃহৎ আকাৰৰ একুৰিয়াম । সেই স্থানতে মৎস্য কন্যাৰ অনুষ্ঠান অনুষ্ঠিত হয় । ৱাটাৰ পাৰ্কত মৎস্য কন্যাৰ প্ৰথম অনুষ্ঠান অনুষ্ঠিত হৈছিল ১৯৪৭ ৰ ১৩ অক্টোবৰত । মৎস্যকন্যা সাজিবলৈ বিভিন্ন স্থানৰ পৰা আহে মডেলসকল । মৎস্য কন্যাৰ পোছাক পৰিধান কৰি পানীত নামি অনুষ্ঠান পৰিৱেশন কৰে মডেল সকলে।
মৎস্যকন্যাৰ দেহৰ উপৰিভাগ নাৰীৰ দৰে আৰু দেহৰ তলৰ ভাগ মাছৰ দৰে । পানীৰ মাজত মৎস্যকন্যাৰ নৃত্য দেখি আকৃষ্ট হয় উপস্থিত সকল । মৎস্যকন্যাৰ বাবেই মাৰ্কিন যুক্তৰাষ্ট্ৰত পৰিচয় লাভ কৰা এই চহৰখনৰ আজি কোনো অস্তিত্ব নোহোৱাৰ দৰে হৈছে । এই বছৰৰ আৰম্ভণিতে স্থানীয় গভৰ্ণৰে এখন বিধেয়ক গৃহীত কৰি ইউকি ওৱাচি পৌৰ সভাৰ অৱলুপ্তি ঘোষণা কৰে । বৰ্তমান চহৰ খন হৰ্ণেণ্ডো কাউন্টিৰ অন্তৰ্গত কৰা হৈছে । এই অৱলুপ্তিৰ অন্যতম কাৰণ হৈছে জনসংখ্যা । ২০০০ ত চহৰখনৰ জনসংখ্যা আছিল ১৩ জন । ২০১০ তো চহৰখনৰ জনসংখ্যা ১৩তে আবদ্ধ থাকিল । ইয়াৰ সমান্তৰালভাৱেই স্থানীয় প্ৰশাসনৰ দুৰ্নীতি চহৰখন অবলুপ্ত হোৱাৰ অন্যতম কাৰণ । চহৰখন অবলুপ্ত হ’লেও উইকি ওৱাচি পার্ক বৰ্তমানো আছে একে স্থানতে ।মৎস্য কন্যাৰ অনুষ্ঠানো পৰিৱেশন হৈ আহিছে দৈনিক; কিন্ত মৎস্য কন্যাৰ অনুষ্ঠান চাবলৈ পৰ্যটকৰহে অভাৱ হৈছে।
