Meenakshi Das has traveled 64 countries by two-wheeler:
এবছৰতে দুচকীয়া বাহনৰে ৬৪খন দেশ অর্থাৎ প্রায় ৬৫ হেজাৰ কিলোমিটাৰ পথ অতিক্ৰম কৰি বিশ্ব অভিলেখ গঢ়ি সুকলমে স্বভূমিত উপস্থিত হ’ল অসম কন্যা মীনাক্ষী দাস।
এই যাত্রাত বিশ্ব অভিলেখৰ লগতে মীনাক্ষীয়ে কঢ়িয়াই আনিলে মহিলাসকলৰ বাবে এক সম্ভাৱনা আৰু আশাৰ বতৰা। নিজৰ অভিযানৰ অভিজ্ঞতা সন্দৰ্ভত মীনাক্ষীয়ে কয়, ‘মোৰ এই যাত্ৰাৰ দুটা প্রধান উদ্দেশ্য আছিল। মহিলা সবলীকৰণৰ বাৰ্তাৰ লগতে একক ৰাইডাৰৰ ৰূপত নিজৰ বাবে আৰু ৰাজ্যখনৰ বাবে বিশ্ব অভিলেখ গঢ়া। অকলে প্ৰথমবাৰৰ বাবে ঘৰৰ পৰা দীর্ঘদিনৰ বাবে ওলাই গৈ বৰফত দুর্ঘটনা, বালিৰ ধুমুহা আৰু এটাৰ পাছত আন এটা সীমা পাৰ হোৱাৰ সমস্যাকে ধৰি বিভিন্ন প্রত্যাহ্বানৰ সন্মুখীন হৈছিলো যদিও এই সকলো প্রত্যাহ্বানক নেওচি এক ইতিবাচক বার্তা লৈ স্ব-ভূমিত উপস্থিত হৈছে। মোৰ এই দীর্ঘদিনীয়া যাত্রাত মহিলাৰূপে কোনো অপ্রীতিকৰ ঘটনাৰ সম্মুখীন হোৱা নাই।
মই ক’ম যে বিশ্বজুৰি মহিলা সুৰক্ষিত। নাৰীক সকলোৱে সন্মান কৰে; কিন্তু আমাৰ আত্মবিশ্বাসৰ অভাৱ হৈছে।’ তেওঁলগতে কয়, ‘আত্মবিশ্বাস আৰু সাহসেৰে মই নিজৰ অঞ্চলটোক প্রতিনিধিত্ব কৰি আগুৱাই গৈছিলো। প্রত্যেকে মোক এগৰাকী ৰাইডাৰৰ ৰূপত সন্মান আৰু মৰ্যাদাৰে আগবঢ়াই নিছিল।’
উল্লেখ্য যে ২০১৯ত মটৰ চাইকেল চালক ৰূপে যাত্ৰা আৰম্ভ কৰা মীনাক্ষী পৰিগণিত হয় বিশ্বৰ সুউচ্চ বাহন উপযোগী পথ উমলিং লা পাছলৈ দুচকীয়া বাহন চলাই যোৱা বিশ্বৰ দ্বিতীয় গৰাকী মহিলা।
উল্লেখ্য যে মীনাক্ষীৰ স্বামীও এজন বাইক ৰাইডাৰ। যোৱা ডিচেম্বৰত এখন দুচকীয়া বাহন লৈ বিশ্ব ভ্রমণৰ বাবে সাজু হোৱা মীনাক্ষীয়ে বিশেষ কোনো সহায় নোহোৱাকৈ দক্ষিণ-পূব এছিয়া, মধ্য প্রাচ্যৰ বিভিন্ন ঠাই, ইউৰোপ, লণ্ডন, জার্মানীকে ধৰি ৬৪খন দেশ ঘূৰি বিশ্ব অভিলেখ গঢ়িবলৈ সক্ষম হৈছে। মীনাক্ষীৰ এই অকলশৰীয়া যাত্ৰা অসমীয়া নাৰীৰ সাহস আৰু মানসিক ক্ষমতাৰ এক বিৰল উদাহৰণ হৈ পৰিছে।
বিভিন্নজনৰ লগত হোৱা বাৰ্তালাপত মীনাক্ষীয়ে উল্লেখ কৰিছে যে এই যাত্রা আছিল অত্যন্ত প্রত্যাহানপূর্ণ। বহু ঠাইলৈ ভিছা নাপালে, এমাহ ধৰি বৰষুণত দুচকীয়া বাহন চলাই যাত্ৰা কৰোতে মীনাক্ষীৰ গাৰ কাপোৰ গাতে শুকাইছিল। ছৌদি আৰবত বালিৰ ধুমুহা, আর্মেনিয়াত বৰফৰ ধুমুহাত তেওঁৰ বাহনখন বিকল হৈ পৰিছিল। কেতিয়াবা জ্বৰ উঠে, আকৌ কেতিয়াবা অন্যান্য অসুখত ভুগি ঔষধ সেৱন কৰি তেওঁ যাত্রা অব্যাহত ৰাখিছিল। মীনাক্ষীৰ এই যাত্ৰাত চীনত কেইজনমান ভাৰতীয়ই আর্থিক সহযোগিতা আগবঢ়ায়। লগতে লণ্ডনত প্রবাসী অসমীয়া সমাজে ভিছাৰ পৰা আৰম্ভ কৰি আৰ্থিকভাৱেও সহায় কৰে তেওঁক।
তদুপৰি ডুবাইতো প্রবাসী অসমীয়াসকল সহায় কৰিবলৈ আগবাঢ়ি আহিছিল। দেশ-বিদেশৰ বহু দুচকীয়া বাহন সংস্থাই তেওঁক সহযোগিতা কৰা বুলি মীনাক্ষীয়ে সদৰী কৰিছে। উল্লেখ্য যে মীনাক্ষী পেছাত এগৰাকী জিম ট্রেইনাৰ। এই যাত্রাত মীনাক্ষীয়ে অসমৰ কথা বিশ্বৰ বিভিন্ন প্রান্তত লৈ গ’ল, ভ্রাতৃত্ববোধৰ প্ৰসাৰ কৰিলে। মীনাক্ষীৰ এই যাত্ৰাই আত্মবিশ্বাস আৰু সাহসেৰে নিজৰ পথত আগবাঢ়ি যাবলৈ বহু অসমীয়া যুৱতীক অনুপ্রাণিত কৰিব বুলি আশা কৰা হৈছে।
মীনাক্ষীৰ এই বিশ্ব অভিলেখক সম্মান জনাই গুৱাহাটী বিশ্ববিদ্যালয়ৰ প্ৰশাসনিক বিভাগৰ সন্মুখত ‘ৰঙালী’ নামৰ অনুষ্ঠানটোৱে সম্বর্ধনা জ্ঞাপন কৰে। এই অনুষ্ঠানত গুৱাহাটী বিশ্ববিদ্যালয়ৰ উপাচার্য ননীগোপাল মহন্ত, ৰঙালীৰ মুখ্য আয়োজক শ্যামকানু মহন্তৰ লগতে বাইক ৰাইডাৰ সংস্থা, ছাত্র সংগঠনৰ প্ৰতিনিধি উপস্থিত আছিল।
