World famous biography of the Prophet Muhammad was launched in Assamese:
হজৰত মোহাম্মদ (ছ:) ৰ জীৱনী সন্দৰ্ভত বিশ্ব খ্যাত ‘আৰ- ৰাহীকুল মাখতুম’ গ্ৰন্থখনৰ অসমীয়া অনুবাদ কিতাপখনি যোৱাকালি ২৮ ডিচেম্বৰৰ পুৱা ১১ বজাত গুৱাহাটীৰ খানাপাৰাত অনুষ্ঠিত হৈ থকা ‘অসম গ্ৰন্থ মেলা’ৰ বাকৰিত উন্মোচন কৰা হয়।
কিতাপখন উন্মোচন কৰে গুৱাহাটী বিশ্ববিদ্যালয়ৰ অৱসৰপ্ৰাপ্ত অধ্যাপক আব্দুল মান্নানে । কিতাপখন অসমীয়ালৈ অনুবাদ কৰিছে অৱসৰপ্ৰাপ্ত মুখ্য অভিযন্তা তথা গুৱাহাটী ৰাজধানী মছজিদৰ প্ৰাক্তন সভাপতি জিয়াউল ইছলামে।
কিতাপখনৰ মূল লিখক হৈছে উত্তৰ প্ৰদেশৰ আজমগড়ৰ শ্বায়খ চফিউৰ ৰহমান মুবাৰক পুৰী। কটন বিশ্ববিদ্যালয়ৰ অধ্যাপক ডঃ ফজলুৰ ৰহমানল সভাপতিত্বত অনুষ্ঠিত উন্মোচনী সভাখনি ৰাজধানী মছজিদৰ ইমাম মুফতি আশ্বৰাফ হুছেইনৰ পৱিত্ৰ কোৰানৰ বাণী পাঠৰ দ্বাৰা শুভাৰম্ভ হয়। প্ৰায় শতাধিক গণ্য মান্য আৰু গ্ৰন্থ ,সাহিত্য প্ৰেমী ব্যক্তিয়ে অংশগ্ৰহন কৰা গাম্ভীৰ্যপূৰ্ণ সভাখনৰ আত ধৰে ছেবাত কৰ্মৰত জেষ্ঠ গাণিতিক বিষয়া চাহাব উদ্দিন আহমেদ আৰু অসমীয়া ইছলামী সাহিত্য প্ৰকাশন সমিতিৰ সদস্য বজলুল বাছিত চৌধুৰীয়ে। সভাখনৰ শলাগৰ শৰাই আগবঢ়ায় সাপ্তাহিক মুজাহিদ কাকতৰ সম্পাদক ছফিকুল ইছলামে।
কিতাপখন উন্মোচন কৰি আব্দুল মান্নানে কয়, হজৰত মোহম্মদ (ছ:) ৰ জীৱনাদৰ্শ সঠিকভাৱে জানিবলৈ সকলোৱে এই কিতাপখন অধ্যয়ন কৰা উচিত। এই কিতাপখন পঢ়িলে হজৰত মোহম্মদ (ছ:) যে কেৱল ধৰ্মীয় গুৰু নহয়, বৰং তেখেত যে সমগ্ৰ মানৱ জাতিৰ সমগ্ৰ দিশৰে সমাজ সংস্কাৰক আছিল সেই কথা জনা যায়। ইয়াৰোপৰি ইছলাম যে কেৱল এটা আনুষ্ঠানিক ধৰ্মৰ নাম নহয়, বৰং ইছলাম যে এটি শান্তি- ন্যায় প্ৰতিষ্ঠাৰ মিছন, এক সংগ্ৰাম সেইটো বোধগম্য হ’ব। কিতাপখনত তদানীন্তন আৰব সমাজৰ সামাজিক, ৰাজনৈতিক, ভৌগোলিক সকলো দিশৰ ওপৰত বিশ্লেষণ কৰি হজৰত মোহম্মদ (ছ:) ৰ জীৱনী চৰিত্ৰৰ বিভিন্ন দিশৰ ওপৰত আলোকপাত কৰা হৈছে।
কিতাপখনৰ মূল লিখক শ্বায়খ চফিউৰ ৰহমানে নবী মোহাম্মদ (ছ:) ৰ জীৱন চৰিত্ৰৰ ওপৰত উৰ্দু আৰবীত কিতাপখন লিখি ছিৰাতুন্নী প্ৰতিযোগিতাত বিশ্বৰ ভিতৰতে প্ৰথম পুৰস্কাৰ লাভ কৰিবলৈ সক্ষম হৈছিল।
গ্ৰন্থ উন্মোচনী উক্ত সভাত অতিথি হিচাপে উপস্থিত থাকি কিতাপখনিৰ ওপৰত চমু চমুকৈ বক্তব্য ৰাখে অসমীয়া ইছলামী সাহিত্য প্ৰকাশন সমিতিৰ সভাপতি অধ্যাপক জহুৰুল ইছলাম মোল্লা,বিশিষ্টা লেখিকা তথা মেঘালয়স্থিত তুৰা মহাবিদ্যালয়ৰ অধ্যাপিকা মিনাক্ষী বুঢ়াগোহাঁই, হস্ত তাত বস্ত্ৰ শিল্প বিভাগৰ পৰিদৰ্শক হিৰণময়ী ৰয়,হেডৱৰ্ড পাব্লিছিংৰ উপ -সভাপতি হেৰম্ভ কুমাৰ বৰা, অসমীয়া ইছলামী সাহিত্য প্ৰকাশন সমিতিৰ সম্পাদক তথা বিশিষ্ট সাংবাদিক আব্দুৰ ৰহমান আৰু বিশিষ্ট সমাজ সেৱক, লেখক মজীদ আলীয়ে।
সভাখনত সাপ্তাহিক মুজাহিদ কাকতৰ পূৰ্বৰ মুখ্য সম্পাদক মুজাম্মেল হকে অসমীয়া ভাষাত লিখি উলিওৱা ‘কবিতাৰ ছন্দৰে পৱিত্ৰ কোৰান’ গ্ৰন্থ খনো উন্মোচন কৰা হয়। গ্ৰন্থ খন উন্মোচন কৰে জামাত ই ইছলামী হিন্দ উত্তৰ অসমৰ সভাপতি তথা অসমীয়া ইছলামী সাহিত্য প্ৰকাশন সমিতিৰ সভাপতি অধ্যাপক জহুৰুল ইছলাম মোল্লাই ।
আজি উন্মোচন হোৱা দুয়োখন গ্ৰন্থ অসম গ্ৰন্থমেলাত থকা ১২৪ নং ‘অসমীয়া ইছলামী সাহিত্য প্ৰকাশন সমিতি’ৰ বিপনীত উপলব্ধ হ’ব বুলি উদ্যোগ্তাসকলে জানিবলৈ দিছে । ৮০০ পৃষ্ঠাৰ ‘আৰ -ৰাহিকুল মাখতুম’ কিতাপখনৰ মূল্য ৩৫০/ টকা। গ্ৰন্থ মেলাৰ সময়ত বিশেষ ৰেহাই মূল্যত দিয়া হ’ব বুলি লিখকে জনাইছে।
