Raijor Dal Pressmeet:
যোৱা ২২ জানুৱাৰীত অসমৰ মুখ্যমন্ত্ৰী ড: হিমন্ত বিশ্ব শৰ্মা আৰু পশুপালন মন্ত্ৰী কৃষ্ণেন্দু পালে থাইলেণ্ডৰ বৃহৎ পুঁজিপতি গোষ্ঠী চি পি গ্ৰুপৰ সৈতে আলোচনা কৰি অসমত গাহৰি আৰু কুকুৰা পালনৰ ব্যৱসায়ত বিনিয়োগ কৰিব বিচৰা কাৰ্যৰ তীব্ৰ বিৰোধিতা কৰিছে ৰাইজৰ দলে।
আজি ৰাইজৰ দলৰ কেন্দ্ৰীয় কাৰ্যালয়ত এখন সংবাদমেল সম্বোধন কৰি সম্পাদক দেবাংগ সৌৰভ গগৈ, মেডিয়া পেনেলিষ্ট সোণেশ্বৰ পাটোৱাৰী আৰু জাতীয় যুৱ বাহিনীৰ কাৰ্যকৰী সভাপতি সৌৰভ বৰাই অসমৰ থলুৱা মানুহৰ এই ব্যৱসায়টো বিজেপি চৰকাৰে বহুজাতিক কোম্পানীৰ হাতত গতাই দি অসমৰ থলুৱা পালক সকলক বিনা বেতনৰ বনুৱা কৰিব খোজা ঘটনাৰ বিৰোধিতা কৰিছে।
সম্পাদক গগৈয়ে কয় যে বিগত সময়ছোৱাত সদৌ অসম গাহৰি পালক সন্থাকে ধৰি অসমৰ সৰু সৰু গাহৰি পালক সকলৰ সৈতে গাঁৱে ভূঞে সাক্ষাৎ কৰি আমি অনুভৱ কৰিছোঁ যে অসমৰ ১০ লাখ গাহৰি পালকে বিভিন্ন সমস্যাৰ মাজেৰে যুদ্ধ কৰি কোনোমতে তেওঁলোকৰ ব্যৱসায় আগুৱাই নি আজি এটা পৰ্যায়ত উপনীত হৈছে।
এফালে আফ্ৰিকান চুৱাইন ফিভাৰৰ ধ্বংসলীলা আৰু বহি:ৰাজ্য যেনে পঞ্জাৱ, হাৰিয়ানা, ৰাজস্থানৰ পৰা বৈধ অবৈধ ভাৱে কিছুমান ডাঙৰ ডাঙৰ দালালৰ পৃষ্ঠপোষকতাত গাহৰি আনি বজাৰ ভৰাই পেলোৱাৰ ফলত থলুৱা গাহৰি পালক সকলে বজাৰ দখলৰ বাবে যঠেষ্ট কষ্ট কৰিব লগীয়া হৈছে।
তেওঁ উল্লেখ কৰে যি সময়ত অসমৰ গাহৰি পালক সকলে গাহৰি পালনৰ ক্ষেত্ৰত In Breeding ৰ সমস্যা সমাধানৰ বাবে দীৰ্ঘদিন ধৰি বহি:ৰাষ্ট্ৰৰ পৰা উন্নত সঁচ আনি অসমৰ গাহৰিৰ উৎপাদনশীলতা বৃদ্ধি কৰাৰ বাবে দাবী জনাই আহিছিল, সেই সময়ত কিন্তু দেখা গ’ল উন্নত সঁচৰ পৰিৱৰ্তে বহি:ৰাষ্ট্ৰৰ কোম্পানী আনি তেওঁলোকৰ জৰিয়তে বিনিয়োগ কৰাই গোটেই সম্ভাৱনাময় উদ্যোগটোকে বহিৰাগত পুঁজিপতিক গতাই দিব বিচৰা হৈছে ।
তেওঁ কয় আজি অসমৰ গাহৰি পালক সকলক কম মূল্যত দানাৰ প্ৰয়োজন আছিল। তাৰ বাবে চৰকাৰে চয়া, মাকৈ আদি খেতিত খেতিয়ক তথা থলুৱা উদ্যোগী সকলক উৎসাহিত কৰি দানা উৎপাদন কৰাই পালক সকলক যোগান ধৰিব পাৰিলেহেঁতেন। ফলস্বৰূপে অসমত গাহৰি উৎপাদনৰ ক্ষেত্ৰত ভাৰ্টিকেল ইন্টিগ্ৰেছন ( Vertical Integration) সম্ভৱ হৈ উঠিলেহেতেন। ৰেহাই মূল্যত দৰবৰ যোগান ধৰিব পাৰিলেহেঁতেন। যাৰ ফলত থলুৱা পালক সকলৰ লাভ বৃদ্ধি পোৱাৰ লগতে গ্ৰাহক সকলৰ বাবেও গাহৰি মাংসৰ বজাৰ মূল্য কমি আহিলহেঁতেন।
গগৈয়ে কয় আজি গাহৰি পালক সকলে বেংকত সহজে লোন নাপায়, কাৰণ গাহৰিৰ ক্ষেত্ৰত বীমাৰ ব্যৱস্থা নাপায়। চৰকাৰে যদি বীমাৰ ব্যৱস্থা কৰিলেহেঁতেন হয়তো এটা, দুটা গাহৰি পোহা পালক সকলেও পেছাদাৰী ভাৱে গাহৰি পালক হৈ নিজৰ লগতে ৰাজ্যখনৰ, দেশৰ GDP বৃদ্ধিত বৰঙণি যোগাব পাৰিলেহেঁতেন।
সম্পাদক গগৈয়ে চি পি গ্ৰুপ নামৰ এই বহুজাতিক কোম্পানীটোৱে কেনেদৰে অসমৰ থলুৱা কৃষকক সৰ্বস্বান্ত কৰি সমগ্ৰ বজাৰ দখল কৰি বজাৰ মূল্য নিৰ্ধাৰণ কৰিব তাৰ এটা বিশ্লেষণ আমি দাঙি ধৰে।
ব্ৰইলাৰ কুকুৰাৰ কন্ট্ৰেক্ট ফাৰ্মিঙৰ ১৫০০ টা ব্ৰইলাৰ পুহিব পৰা এখন ফাৰ্মৰ উদাহৰণ দি তেওঁ আয়-ব্যয়ৰ তালিকা দেখুৱাই কয় যে এজন ব্ৰইলাৰ পালকে সঁচা অৰ্থত মাহৰ শেষত আঠ হাজাৰতকৈও অধিক টকা লোকচানহে কৰিব লগা হয়। ১৫০০ ব্ৰইলাৰ ৰখা ঘৰটো তৈয়াৰ কৰা, পানীৰ ব্যৱস্থা কৰা বিদ্যুতৰ ব্যৱস্থা কৰাৰ পৰা ফাৰ্ম খন সাজু হৈ উঠালৈ প্ৰায় তিনি লাখ সাত সত্তৰ হাজাৰ পাঁচশ টকা খৰছ হয়। ৪০ / ৪৫ দিন ব্ৰইলাৰ পুহিব লাগিব। ভুছিৰ পৰা আদি কৰি প্ৰতি মাহত ব্যয় হয় ২২,২৭৫ টকা। ফিক্সড এছেটৰ ক্ষেত্ৰত অৱক্ষয় প্ৰায় ১০,৪৮৬ টকা।
সৰ্বমুঠ মাহিলী খৰছ ৩২,৭৬১ টকা। কিন্তু ইমান খৰছৰ পিছতো ব্ৰইলাৰ অতি ভাল ধৰণে উৎপাদন কৰিলে তেওঁলোকে পায় প্ৰতি কেজিত ৮.৫০ টকা, যিটোৰ সম্ভাৱনা অতি কম। তেওঁ দেখুৱাই যে এনেদৰে এজৰ কন্ট্ৰেক্ট ফাৰ্মাৰে প্ৰতিমাহে ৮,৬৫৫ টকাৰ লোকচান কৰে।
তেওঁ কয় যে নিজৰ মাটিত নিজৰ টকাৰে উৎপাদন কৰিও, নিজে কষ্ট কৰিও, নিজে লোকচান কৰিও কোম্পানীৰ বহতীয়া হৈ থাকিব লগীয়া হৈছে অসমৰ ব্ৰইলাৰ পালক। অথচ সেইখিনি ব্ৰইলাৰকে বিক্ৰী কৰি কোম্পানীয়ে চাৰিওফালৰ পৰা লাভ কৰি আছে। তেওঁলোকে পোৱালীও বেচিছে, দানাও বেচিছে, দৰবো বেচিছে।
তেওঁ কয় একেটা ঘটনাই হ’বলৈ ওলাইছে গাহৰি পালকৰ সৈতে । সেয়ে আমি ৰাইজৰ দলে এনে অসমক অৰ্থনৈতিক ভাৱে ধ্বংস কৰিব বিচৰা এই ষড়যন্ত্ৰৰ পৰা চৰকাৰক আতৰি আহিবলৈ দাবী জনাইছে । লগতে তেওঁ চৰকাৰক গাহৰি আৰু কুকুৰা পালক সকলৰ বাবে কেইবাটাও দাবী উত্থাপন কৰে-
১) গাহৰি পালক সকলৰ সহায় হোৱাকৈ বহিঃৰাষ্ট্ৰৰ পৰা উন্নত সঁচৰ ব্যৱস্থা কৰি বিজ্ঞানসন্মত পদ্ধতিৰে যোগানৰ ব্যৱস্থা কৰক যাতে গাহৰি পালক সকলে পুনৰ কম দিনৰ ভিতৰতে In breeding ৰ সমস্যাত ভুগিব নালাগে।
২) গাহৰি পালক সকলক কম মূল্যত দানা যোগানৰ ব্যৱস্থা কৰক। দানা প্ৰস্তুতৰ বাবে প্ৰয়োজনীয় চয়া, মাকৈ আদি খেতি অসমৰ সম্ভৱনাপূৰ্ণ অঞ্চলত খেতিয়ক সকলক উৎসাহিত কৰি খেতি কৰাৰ ব্যৱস্থা কৰক, যাৰ ফলত থলুৱা উদ্যোগীয়ে কম খৰছত দানা উৎপাদন কৰি আমদানিকৃত দানাতকৈ কম বজাৰ মূল্যত বিক্ৰী কৰিব পাৰিব। ইয়াৰ ফলত গাহৰি পালক সকলৰ লগতে কৃষক সকলো উপকৃত হ’ব।
৩) চৰকাৰী উদ্যোগত গাহৰিৰ বীমাৰ ব্যৱস্থা কৰক, যাতে পালক সকলে বেংকৰ পৰা সহজেই ঋণ ল’ব পাৰে।
৪) ব্ৰইলাৰ কন্ট্ৰেক্ট ফাৰ্মিঙৰ সৈতে জড়িত কোম্পানী সমূহক নিয়ন্ত্ৰণ কৰি ব্ৰইলাৰ পালক সকলক এটা নূন্যতম Growing Charge দিয়াটো বাধ্যতামূলক কৰক।
শেষত গগৈয়ে অসমৰ জনসাধাৰণক অসমৰ এই সকলো পশুপালকৰ সৈতে ঠিয় দিয়াৰ লগতে কন্ট্ৰেক্ট ফাৰ্মিঙৰ নামত কোম্পানীবোৰে দিয়া ভুৱা প্ৰতিশ্ৰুতিৰ পৰা নিজকে দূৰত ৰাখিবলৈ আহ্বান জনায়।