Manipur CM N Biren Singh :মুখ্যমন্ত্ৰী বীৰেনৰ পদত্যাগৰ আঁৰত?
বিধানসভাৰ অধিবেশনত অনাস্থা প্রস্তাৱ উত্থাপনৰ যো-জা চলিছিল
অভাৱনীয় পদক্ষেপ গ্ৰহণৰ হুংকাৰ দিছিল বিদ্রোহী বিধায়কবর্গই
অধিবেশন বাতিল কৰিলে ৰাজ্যপাল ভাল্লাই
:দলৰ বাহিৰে-ভিতৰে সন্মুখীন হোৱা তিৰস্কাৰ-সমালোচনাক বিগত দুবছৰ ধৰি আওকাণ কৰি অহা মণিপুৰৰ মুখ্যমন্ত্ৰী এন বীৰেন সিঙে অৱশেষত পদত্যাগ কৰিলে। ৰাজ্যখনক অৰাজক কৰি তোলাৰ অভিযোগত দলৰ ভিতৰতে সৃষ্ট প্রচণ্ড চাপ তথা বিৰোধীৰ হুংকাৰত নতি স্বীকাৰ কৰি আজি মুখ্যমন্ত্রী সিঙে ৰাজ্যপাল অজয় কুমাৰ ভাল্লাৰ হাতত পদত্যাগপত্র দাখিল কৰে।
ইয়াৰ পূৰ্বে তেওঁ দেওবাৰে নতুন দিল্লীত কেন্দ্রীয় গৃহমন্ত্রী অমিত শ্বাহ আৰু বিজেপিৰ ৰাষ্ট্ৰীয় সভাপতি তথা কেন্দ্রীয় স্বাস্থ্যমন্ত্রী জে পি নড্ডাক সাক্ষাৎ কৰি এক দুঘণ্টীয়া আলোচনাত মিলিত হয়। লক্ষ্যণীয়ভাবে শ্বাহ-নড্ডাৰে আলোচনাত
মিলিত হোৱাৰ সময়ত তেওঁৰ স’তে মণিপুৰৰ কোনো মন্ত্রী-বিধায়ক উপস্থিত নাছিল। দিল্লীৰ পৰা তেওঁ দেওবাৰে আবেলি উভতি আহে আৰু সন্ধিয়া ৰাজ্যপাল ভাল্লাক সাক্ষাৎ কবি পদত্যাগপত্র দাখিল কৰে।
মুখ্যমন্ত্ৰী সিঙৰ স’তে দিল্লীৰ পৰা ইম্ফলত উপস্থিত হয় বিজেপিৰ উত্তৰ-পূৱৰ সমন্বয়ক ড:সম্বিত পাত্র। পাছত সন্ধিয়া সিঙে পাত্র আৰু দলৰ মণিপুৰৰ একাংশ জ্যেষ্ঠ নেতাৰ স’তে গৈ ৰাজ্যপাল ভাল্লাক সাক্ষাৎ কৰে। এই সাক্ষাতৰ সময়তে তেওঁ ৰাজ্যপালৰ হাতত পদত্যাগপত্র দাখিল কৰে। সিঙৰ এই ৰাজভৱন যাত্ৰাত সংগ দিয়া সকলৰ মাজত তেওঁৰ কেবিনেট সতীর্থ টি বিশ্বজিৎ সিং, সপাম ৰঞ্জন সিং, গোবিনদাস কণ্ঠৌজাম আৰু টি বসন্ত সিং থাকে।
উল্লেখ্য যে সোমবাৰৰ পৰা মণিপুৰ বিধানসভাৰ বাজেট অধিবেশন অনুষ্ঠিত হোৱাৰ কথা আছিল। এই অধিবেশনত সিঙৰ বিৰুদ্ধে অনাস্থা প্রস্তার উত্থাপনৰ কুচকাৱাজ আৰম্ভ কৰে বিৰোধী তথা কংগ্রেছে। এই ক্ষেত্ৰত বিৰোধীতকৈ অধিক সক্রিয় হৈ পৰে তেওঁৰে দলীয় সতীর্থ একাংশ মন্ত্রী-বিধায়ক আনকি এই মন্ত্রী-বিধায়কসকলে বিধানসভা অধিবেশন আৰম্ভ হোৱাৰ পূর্বে মুখ্যমন্ত্রী সলনি নকৰিলে এক ডাঙৰ অভাৱনীয় পদক্ষেপ গ্রহণৰো হুংকাৰ দিয়ে।
ইয়ে দলৰ শীর্ষ নেতৃত্বৰ ওপৰতো চাপ বৃদ্ধি কৰাত সিঙক পদত্যাগ কৰিবলৈ বাধ্য কৰে বুলি চর্চা হৈছে। অৱশ্যে সিঙে পদত্যাগপত্র দাখিল কৰাৰ পাছত নিশাই ৰাজ্যপাল ভাল্লাই মণিপুৰ বিগনসভাৰ আগন্তুক বাজেট অধিবেশন বাতিল কৰে। সূত্ৰৰ মতে, এনে কাৰণতে দেওবাৰেতেওঁ গৃহমন্ত্রী শ্বাহ আৰু বিজেপি সভাপতি নাড্ডাক অকলে সাক্ষাৎ কৰিবলগীয়া হয়। অৱশ্যে শ্বাহ আৰু নড্ডাৰ স’তে তেওঁৰ হোৱা দুঘণ্টীয়া আলোচনাৰ তথ্য ৰাজহুৱা হোৱা নাই।
উল্লেখ্য যে ২০২৩ৰ মে’ত সূত্রপাত ঘটা মণিপুৰৰ গোষ্ঠী সংঘৰ্ষত বিস্তৰ ধন-জনৰ ক্ষয়-ক্ষতি হৈছে। দলৰ বাহিৰে-ভিতৰে উত্থাপিত অভিযোগ অনুসৰি মুখ্যমন্ত্রী সিঙে ৰাজ্যখনত গোষ্ঠী সংঘৰ্ষৰ জুই জ্বলি উঠাত ইন্ধন যোগায়। আনকি ভাইৰেল হোৱা এটা বিতর্কিত অডিঅ’ টেপত সিঙে নিজেই এই গোষ্ঠী সংঘর্ষত উদগনি দিয়াৰ অভিযোগ উত্থাপিত হৈছে। এই অডিঅ’ ঢেপৰ পৰীক্ষণ প্রতিবেদন ফৰেনছিক বিজ্ঞান পৰীক্ষাগাৰৰ পৰা বিচাৰি কিছুদিন পূর্বে উচ্চতম ন্যায়ালয়ে নির্দেশ জাৰি কবে। এই অডিঅ’ টেপত বাণীবদ্ধ কণ্ঠৰ স’তে সিঙৰ কণ্ঠৰ ৯৩ শতাংশ মিল আছে। অডিঅ’ টেপটোত বাণীবদ্ধ কণ্ঠই গোষ্ঠী সংঘৰ্ষৰ কৃতিত্ব লৈছে।
