Heavy Rainfall:
মুষলধাৰ বৰষুণত পুনৰ কৃত্রিম বানত সসাগৰা হয় গুৱাহাটীৰ বিস্তীর্ণ অঞ্চল। বিশেষকৈ মহানগৰীৰ গণেশগুৰিৰ পৰা দক্ষিণ দিশত কৃত্রিম বানে আজি অধিক গুৰুতৰ ৰূপ ধাৰণ কৰে। একেবাৰে যোৰাবাট পর্যন্ত পানীৰ কালৰূপে সাধাৰণ জীৱন যাত্ৰাই স্থৱিৰ কৰি তোলে। ইয়াৰ প্ৰভাৱ পৰে সমগ্র মহানগৰীত।
কিয়নো পানীৰ বাবে খানাপাৰা, পাঞ্জাবাৰী, বশিষ্ঠ, হাতীগাঁও, বেলতলা, লালগণেশ আদিৰ পৰা যানবাহনৰ চলাচল প্ৰায় স্থৱিৰ হৈ পৰে। বৃহস্পতিবাৰে পুৱতি নিশাৰ পৰা হোৱা বৃষ্টিপাতৰ ফলত মূল পথবোৰেই পানীত বুৰ যোৱাত আগবেলা বিশেষকৈ মহানগৰ বাছ সেৱা স্থৱিৰ হৈ পৰাত জনজীৱনত ব্যাপক প্ৰভাৱ পৰে। কিয়নো এই অঞ্চলবোৰত যি বানৰ সৃষ্টি হয়, তাৰ প্রভাৱ আজিও দিনজুৰি অব্যাহত থাকে। এছডিআৰএফৰ ৰবৰৰ নাৱৰেহে স্থানীয় বাসিন্দাসকলে যাতায়াত কৰিবলগীয়া হয় বৃহত্তৰ ৰুক্মিণীগাঁও অঞ্চলত।
ইপিনে, যোৰাবাটৰ বানপানীয়ে বৃহস্পতিবাৰে গুৰুতৰ ৰূপ ধাৰণ কৰে। ইয়াৰ ফলত যোৰাবাটৰ উৰণ সেতুৰ তলৰ ৰাষ্ট্ৰীয় ঘাইপথৰে যানবাহনৰ চলাচল সম্পূর্ণৰূপে বন্ধ হৈ পৰে। কে’বাখনো যানবাহন বানত আবদ্ধ হৈ পৰে। লক্ষ্যণীয়ভাবে পানীৰ প্রকোপ হ্রাস পালেও যাতায়াত বিপদসংকুল হৈ থকাৰ বাবে পথটোৰে নিয়ন্ত্রিত ৰূপতহে যানবাহন চলাচলত অনুমতি দিয়া হৈছে। ইপিনে, হাতীগাঁও, বেলতলা, ছার্ভে আদি অঞ্চলৰ কে’বাটাও উপ-পথ এই প্রতিবেদন যুগুতোৱা পৰলৈকে পানীত বুৰ গৈ আছে। আনহাতে, আজিও পানীত বুৰ যায় অনিল নগৰ আৰু নবীন নগৰ অঞ্চল।
ইপিনে, বৰঝাৰ আঞ্চলিক বতৰ বিজ্ঞান কেন্দ্ৰই ৰাজ্যৰ কে’বাখনো জিলাত আজিৰ দিনটোত ‘ৰেড এলার্ট’ জাৰি কৰিছে। অতিবৃষ্টি হোৱাৰ আশংকা বৃদ্ধি থকা জিলাকেইখন হ’ল- ধুবুৰী, দক্ষিণ শালমাৰা-মানকাচৰ, গোৱালপাৰা, বাগসা বঙাইগাঁও, বজালী, পশ্চিম কাৰ্বি আংলং, ডিমা হাছাও, কাছাৰ, হাইলাকান্দি আৰু শ্রীভূমি। ইপিনে, শুক্ৰবাৰে মহানগৰীৰ আকাশ ডাৱৰীয়া হৈ থাকিব বুলি বতৰ বিজ্ঞান কেন্দ্ৰই আগজাননী দিছে। আজি দিনটোৰ বেছিভাগ সময়ত পাতলীয়াৰ পৰা মজলীয়া বৰষুণ হোৱাৰ সম্ভাৱনা আছে বুলিও আগজাননী দিয়া হৈছিল যদিও বৃহস্পতিবাৰে মাজনিশাৰে পৰা গুৱাহাটী সহ ৰাজ্যজুৰি অব্যাহত আছে নেৰানেপেৰা বৰষুণ।
উল্লেখ্য যে এইবাৰ দেশৰ কে’বাখনো ৰাজ্যত আগতীয়াকৈ মৌচুমী বায়ুৰে প্রবেশ কৰিছে। তাৰ ফলতে বংগোপসাগৰত সৃষ্টি হোৱা নিম্ন চাপৰ প্রভাৱ অসমৰ উপৰি বাংলাদেশতো পৰিছে।
