We will take revenge:Irani Army :
শনিবাৰে নিশা মার্কিন বাহিনীয়ে পাৰমাণৱিক ক্ষেত্ৰত আক্রমণ সংঘটিত কৰাৰ পাছতে ইজৰাইলক ভয়ংকৰ আক্রমণ কৰে ইৰানে। দেওবাৰে পুৱতি নিশাৰ পৰা দেশখনে কমেও ৪০ টা ক্ষেপণাস্ত্র ইজৰাইললৈ নিক্ষেপ কৰে।
এই ক্ষেপণাস্ত্র আক্রমণত দেশখনৰ কমেও ১১ জন লোক আহত হয় বুলি উদ্ধাৰকাৰী বাহিনীয়ে প্ৰকাশ কৰিছে। ইৰানৰ সামৰিক বাহিনী ৰিভল্যুচনাৰী গার্ড ক’ৰ (আইআৰচিজি)-এ প্রকাশ কৰা অনুসৰি ইজৰাইলক আক্রমণত ব্যৱহাৰ কৰা এই ক্ষেপণাস্ত্ৰসমূহৰ মাজত খোৰামশ্বাহৰ ক্ষেপণাস্ত্রও আছে।
এই ক্ষেপণাস্ত্রসমূহে দুহেজাৰ কিলোমিটাৰ দূৰত্বৰ লক্ষ্যবস্তুত আঘাত হানিব পাৰে। এনে একোটা ক্ষেপণাস্ত্ৰৰ অগ্রভাগত ১৫শ কিলোগ্রাম ওজনৰ যুদ্ধাস্ত্র থাকে।
অৱশ্যে ইৰানৰ মতে, এনে একোটা ক্ষেপণাস্ত্রই বহু সংখ্যক যুদ্ধাস্ত্র কঢ়িয়াই নিব পাৰে। সূত্ৰই প্ৰকাশ কৰা অনুসৰি ইৰানে ভয়ংকৰ ৰূপ ধাৰণ কৰি ইজৰাইললৈ নিক্ষেপ কৰা এই ক্ষেপণাস্ত্ৰসমূহৰ ইজৰাইলৰ অন্যতম প্রধান চহৰ তেল আভিভৰ উত্তৰ অঞ্চলকে ধৰি বহুকেইটা অঞ্চলত আঘাত হানে। ক্ষেপণাস্ত্ৰৰ আঘাতত ক্ষতিগ্রস্ত হোৱা তেল আভিভৰ অঞ্চলটো সাধাৰণ লোকৰ বসতিস্থল। ক্ষেপণাস্ত্র আক্রমণত অঞ্চলটোৰ এটা বেংক, এখন চেলুন, এটা শ্বপিং মল আদি ক্ষতিগ্রস্ত হয়। ক্ষেপণাস্ত্রৰ আঘাতত বহুসংখ্যক দোকান, প্রবেশদ্বাৰ আদি ভাঙি পৰে। বাট-পথ আইনাৰ টুকুৰাৰে ভৰি পৰে।
এজন স্থানীয় লোকে সাংবাদিকক জনোৱা মতে, ইৰানী ক্ষেপণাস্ত্ৰৰ আক্ৰমণত তেওঁৰ ঘৰৰ প্ৰথম মহলা ধ্বংস হয়। সৌভাগ্যবশতঃ আক্রমণটোত কোনো লোক হতাহত নহ’ল বুলি তেওঁ জনায়। ইৰানী ক্ষেপণাস্ত্ৰৰ আক্ৰমণ সংঘটিত হোৱা স্থানসমূহৰ পৰিস্থিতি নিয়ন্ত্ৰণত নিৰাপত্তাৰক্ষী নিয়োজিত কৰে চৰকাৰে। আনহাতে, চলিত ইৰান-ইজৰাইল যুদ্ধত পাৰস্য উপসাগৰীয় যুদ্ধৰত দেশখনত ছয় শতাধিক লোকৰ মৃত্যু হোৱাৰ লগতে সহস্রাধিক আহত হৈছে।
এই তথ্য প্রকাশ কৰিছে ৱাশিংটনস্থিত এটা ইৰানী মানবাধিকাৰ সংগঠনে আনহাতে, ইজৰাইলে প্ৰকাশ কৰা অনুসৰি চলিত যুদ্ধৰ সময়ত দেশখনে ৪৫০ টা ক্ষেপণাস্ত্ৰ আৰু এহেজাৰ ড্ৰ’নৰে ইৰানক প্রত্যাক্রমণ কৰিছে। এই আক্রমণত কমেও ২৪ জন ইৰানী লোকৰ প্রাণহানি হোৱা বুলি ইজৰাইলে প্রকাশ কৰিহে।
# প্রতিশোধ ল’মেই, আমেৰিকাৰ পলোৱাৰ কোনো পথ নাই: ইৰানী সেনা
আমেৰিকা যুক্তৰাষ্ট্ৰকো প্রত্যাঘাতৰ সকীয়নি দিলে ইৰানে। দেশখনৰ সশস্ত্র বাহিনী ৰিভল্যুচনাৰী কৰ্গছ গার্ডে স্পষ্ট কৰি দিছে যে যোৱা নিশাৰ মার্কিন আক্ৰমণৰ প্রতিশোধ লোৱা হ’বই। ট্রাম্প প্রশাসক সকীয়নি দি বাহিনীটোৱে দেশখনৰ এখন সংবাদপত্ৰৰ আগত কয়, ‘আক্রমণকাৰীসকলৰ পলায়নৰ কোনো পথ নাই। আক্রমণকাৰীসকল প্রত্যুত্তৰ পাবলৈ সাজু থাকক। তেওঁলোকে অনুশোচনা কৰিব লাগিব।’ তেহৰানৰ আত্মৰক্ষাৰ অধিকাৰ আহে বুলিও সশস্ত্র বাহিনীটোৱে দাবী কৰিছে। ইৰানী ৰিভল্যুচনাৰী গাৰ্ডছ কর্পছৰ মতে পশ্চিম এছিয়াৰ ঘাটিত অৱস্থান কৰি মার্কিন বাহিনী আঁতৰি থকাটো শক্তিৰ লক্ষণ নহয়, বৰঞ্চ ই হৈছে দুর্বলতাৰ উৎস। পশ্চিম এহিয়াৰ মার্কিন সামৰিক ঘাটিসমূহৰ উৎকণ্ঠা বহুগুণে বৃদ্ধি পাইছে বুলিও ইৰানৰ এই সশস্ত্র বাহিনীয়ে দাবী কৰিছে।
# প্ৰতিজন আমেৰিকানেই লক্ষ্য: ইৰানী সংবাদ মাধ্যমৰো সকীয়নি
বর্তমানে মধ্য প্রাচ্য তথা পশ্চিম এছিয়াত থকা আমেৰিকা যুক্তৰাষ্ট্ৰৰ সামৰিক বাহিনীৰ লোকেই হওক বা অসামৰিক লোকেই হওক প্রতিজন আমেৰিকান নাগৰিকেই ইৰানৰ লক্ষ্য বুলি হুংকাৰ দিছে দেশখনৰ সংবাদ মাধ্যমেও ইৰানৰ আকাশমাৰ্গত প্ৰৱেশ কৰি আমেৰিকা যুক্তৰাষ্ট্ৰই ইৰানৰ বিৰুদ্ধে অপৰাধ সংঘটিত কৰিলে বুলিও দেশখনৰ ৰাষ্ট্ৰ নিয়ন্ত্রিত টেলিভিছন চেনেলে মন্তব্য কৰিছে। এই চেনেলৰ সূত্ৰধাৰ (এংকৰ) জনে মার্কিন প্রশাসনক উদ্দেশি দিয়া এই হুংকাৰ সম্বলিত এটা ভিডিঅ’ সামাজিক মাধ্যমত ভাইৰেল হৈছে। ভিডিঅ’টোত টেলিভিছন এংকৰজনে কয়, ‘আমেৰিকা যুক্তৰাষ্ট্ৰই ইৰানৰ আকাশমাৰ্গত প্রবেশ কৰি ইৰানৰ বিৰুদ্ধে এটা অপৰাধ সংঘটিত কৰিলে। পশ্চিম এছিয়াৰ এই দেশ কোনো স্থান নাই।
আমেৰিকা যুক্তৰাষ্ট্ৰৰ ৰাষ্ট্ৰপতি, আপুনি এই যুদ্ধৰ আৰম্ভ কৰিলে আৰু আমি শেষ কৰিম।’ এংকৰজনে এই সকীয়নি দিয়াৰ সময়ত পশ্চিম এছিয়াস্থিত মার্কিন সামৰিক ঘাটিসমূহৰ এক চিত্রও প্রদর্শন কৰে। উল্লেখ্য যে কাটাৰ, বাহৰেইন, ইৰাক, দক্ষিণ ছিৰিয়া, কুৱেইট, সংযুক্ত আৰব আমিৰশ্বাহি আদিত মার্কিন সামৰিক বাহিনীৰ ১৯ টা মূল ঘাটি আছে। কমেও ৫০ হেজাৰ মার্কিন সেনা এই ঘাটিসমূহত নিয়োজিত হৈ আছে। সম্প্রতি ইৰানে হুংকাৰ দিছে যে এই সামৰিক ঘাটিসমূহৰ পৰা মার্কিন বাহিনীয়ে পলায়নৰ সুযোগ নাপাব।
# পৰমাণু ক্ষেত্ৰৰ ওচৰৰ বাসিন্দাসকলক আশ্বস্ত কৰিলে ইৰানে
মার্কিন বাহিনীৰ আক্রমণত ইৰানৰ তিনি পৰমাণু ক্ষেত্ৰৰ ক্ষয়-ক্ষতি হোৱা নাই বুলি দাবী কৰি দেশখনৰ চৰকাৰে এই পৰমাণু ক্ষেত্ৰ তিনিখনৰ ওচৰে-পাঁজৰে বাস কৰা এই লোকসকলক আশ্বস্ত কৰিছে। এই আক্ৰমণৰ ফলত পৰমাণু ক্ষেত্র তিনিখনৰ পৰা কোনো ধৰণৰ তেজস্ক্রিয় বিকিৰণ ঘটা নাই বুলি সদৰী কৰিছে ইৰানৰ ৰাষ্ট্ৰীয় নিউক্লীয় সুৰক্ষা ব্যৱস্থা কেন্দ্ৰই। গতিকে এই পৰমাণু কেন্দ্ৰসমূহৰ ওচৰে-পাঁজৰে বাস কৰা লোকসকলৰ জীৱনৰ প্ৰতি কোনো শংকা নাই বুলি উক্ত নিউক্লিয়াৰ সুৰক্ষা কেন্দ্রই প্রকাশ কৰিছে।
উক্ত কেন্দ্ৰৰ এই সম্পর্কীয় এক বিবৃতিত কোৱা হয়, ‘উক্ত পৰমাণু ক্ষেত্ৰসমূহৰ ওচৰে-পাঁজৰে বাস কৰা লোকসকলৰ প্ৰতি কোনো বিপদ সৃষ্টি হোৱা নাই।’ অৱশ্যে দেশখনৰ আন এক পৰমাণু ক্ষেত্র বুশেহৰ পৰমাণু ক্ষেত্ৰত আক্রমণ সংঘটিত হ’লে বিপর্যয় ঘটাৰ আশংকা কৰিছে একাংশ বিশেষজ্ঞই। যোৱা নিশাৰ মার্কিন আক্ৰমণৰ পৰা বুশেহৰ ইউৰেনিয়াম সমৃদ্ধিকৰণ পৰমাণু ক্ষেত্ৰ ৰক্ষা পৰে আনহাতে, ইৰানৰ পৰমাণু শক্তি সংস্থাই স্পষ্ট কৰি দিছে যে দেশখনত পৰমাণু উন্নয়নৰ কাম কাকো বন্ধ কৰিবলৈ দিয়া নহ’ব। পৰমাণু সমৃদ্ধিকৰণক দেশখনৰ ৰাষ্ট্ৰীয় উদ্যোগৰূপে গঢ়ি তোলা হ’ব বুলিও পৰমাণু শক্তি সংস্থাই হুংকাৰ দিছে।
# আমেৰিকাৰ বন্ধু দেশসমূহতো সতর্কতা
ইৰানৰ পৰমাণু ঘাটিত মার্কিন বাহিনীৰ আক্ৰমণৰ পাছত পশ্চিম এছিয়া তথা মধ্য প্রাচ্যৰ আমেৰিকা যুক্তৰাষ্ট্ৰৰ বন্ধু দেশসমূহেও সতর্কতা জাৰি কৰিছে। এই দেশসমূহত মার্কিন বাহিনীৰ মার্কিন সামৰিক ঘাটি আছে। এই দেশসমূহৰ অন্যতম বাহৰেইনে আজি সতৰ্কতা জাৰি কৰে। দেশখনত আমেৰিকা যুক্তৰাষ্ট্ৰৰ পঞ্চমখন যুদ্ধ জাহাজ আছে। তদুপৰি দেশখনত কমেও ৮,৩০০ মার্কিন সেনাও নিয়োজিত হৈ আছে। চৰকাৰে দেশখনৰ ৭০ শতাংশ চৰকাৰী কৰ্মচাৰীক ঘৰৰ পৰা দায়িত্ব পালন কৰিবলৈ নিৰ্দেশ জাৰি কৰে।
এই সম্পর্কত এক বিবৃতিত কোৱা হয়, ‘আঞ্চলিক পৰিস্থিতি আৰু সাম্প্ৰতিক কিছু ঘটনাৰ পৰিপ্ৰেক্ষিতত এই নির্দেশনা জাৰি কৰা হৈছে। প্রয়োজন অবিহনে সাধাৰণ লোকসকল ঘৰৰ বাহিৰ নহ’ব।’ দেশখনৰ সকলো চৰকাৰী আৰু বেচৰকাৰী শিক্ষানুষ্ঠানসমূহকো অনলাইনত ছাত্র-ছাত্রীক শিক্ষাদান কৰিবলৈও চৰকাৰে নির্দেশ দিছে।
