Guwahati Gousala:
অসমৰ মাৰোৱাৰী সম্প্রদায়ে ধর্মীয় আৰু সামাজিক বিভিন্ন অনুষ্ঠানলৈ পূৰ্বৰে পৰাই মুক্তহস্তে দান-বৰঙণি দি আহিছে। ধুবুৰীৰ পৰা শদিয়ালৈ ৰাজ্যৰ বিভিন্ন নগৰ-চহৰৰ ৰাজহুৱা অনুষ্ঠানত তাৰ স্বাক্ষৰ সততে দৃষ্টিগোচৰ হয়। গুৱাহাটীকে ধৰি কে’বাখনো চহৰত থকা গৌশালাসমূহো এই মাৰোৱাৰী সম্প্রদায়েই দান-
বৰঙণিৰে গঢ়ি তুলিছে; অথচ এই গুৱাহাটী (গৌহাটী) গৌশালাকে এতিয়া ব্যক্তিগত সম্পত্তিত পৰিণত কৰিবলৈ নিকৃষ্ট ষড়যন্ত্রত লিপ্ত হৈছে ফাঁচী বজাৰৰ বহু বিতর্কিত ব্যৱসায়ী অশোক ধানুকা।
ঝাৰখণ্ডৰ বিধায়ক কিনা-বেচাৰ ঘটনাত নাম সাঙোৰ খাই পৰা এইজন অশোক ধানুকাই গুৱাহাটী গৌশালাক সম্পূৰ্ণৰূপে কুক্ষিগত কৰিবলৈ বিভিন্ন অন্যায়-অনৈতিক কার্যত লিপ্ত হৈছে। ইয়াকে লৈ গুৱাহাটী মাৰোৱাৰী সম্প্ৰদায়ৰ মাজত তীব্র ক্ষোভ আৰু প্ৰতিক্ৰিয়াৰ সৃষ্টি হৈছে। সততে মুখ্যমন্ত্রী হিমন্ত বিশ্ব শৰ্মা আৰু তেওঁৰ পৰিয়ালৰ ঘনিষ্ঠৰূপে দাবী কৰি বিভিন্নজনক ভয়-ভাবুকি প্রদান কৰি অহা ধানুকাৰ বিৰুদ্ধে ৰাজহুৱা অভিযোগৰ অন্ত নাই। এইজন বহু বিতর্কিত ব্যৱসায়ীয়ে মাৰোৱাৰী সম্প্ৰদায়ৰ অতি শ্রদ্ধা আৰু আদৰৰ অনুষ্ঠান গৌহাটী গৌশালাত ন্যস্তস্বার্থ পূৰণৰ বাবে একপ্ৰকাৰ তাণ্ডৱ চলাই অহা বুলি অভিযোগ উত্থাপিত হৈ আহিছে।
এনে চক্ৰান্তৰ জৰিয়তে বহু বিতর্কিত ধানুকা সম্প্রতি গৌশালা ন্যাসৰ শশ কোটি টকাৰ সা-সম্পত্তিৰ স্বয়ম্ভূ মালিক হৈ পৰিছে। সবাতোকৈ বিপজ্জনক কথাটো হৈছে মুখ্যমন্ত্ৰীৰে ঘনিষ্ঠতাৰ নাম লৈয়ে কোনো ধৰণৰ চৰকাৰী সংস্থাৰ অনুমতি অবিহনেই কোটি কোটি টকাৰ অবৈধ নির্মাণ কাৰ্য অব্যাহত ৰাখিছে। তাৰ বাবে তেওঁ পূৰ্বৰ দাতাসকলে আগবঢ়োৱা ভৱনসমূহ জধে-মধে ভাঙি সেইসকলক অপমানিত কৰাৰ লগতে উত্তৰসুৰিসকলক মানসিক আঘাত দিয়াৰ অভিযোগ উত্থাপিত হৈছে। সম্পূৰ্ণৰূপে নিজৰ খেয়াল-খুচি অনুসৰি কোটি কোটি টকাৰ নিৰ্মাণ কাৰ্য সম্পন্ন সম্ম কৰাৰ লগতে এই ক্ষেত্রত আর্থিক অনিয়ম সংঘটিত কৰা বুলিও চৰ্চিত হৈছে। ব্যক্তিগত ব্যৱসায় অক্ষুণ্ণ ৰাখিবলৈ তেওঁ আনকি গৌশালাৰ বৃন্দাৱন গার্ডেনৰ সদ্ব্যৱহাৰত কৌশলেৰে বাধাদান কৰি আহিছে।
এই বৃহৎ অনুষ্ঠানটো হস্তগত কৰাৰ চক্ৰান্ত সফল কৰিবলৈ ধানুকাই গুৱাহাটী গৌশালাৰ স’তে সুদীর্ঘকাল ধৰি জড়িত হৈ অহা ন্যাসৰক্ষী সকলক বিভিন্ন ধৰণে হেঁচা প্রয়োগৰ জৰিয়তে অপমানিত কৰি অপসাৰণ কৰাতে ক্ষান্ত নাথাকি তেওঁৰ একাংশ নিকটাত্মীয় আৰু এচাম চাতুকাৰক সেই স্থানত নিয়োজিত কৰিছে। ইতিমধ্যে গৌশালা ন্যাসৰ ১৫জন ন্যাসৰক্ষীৰ ১১জনেই ধানুকাৰ চামচাৰূপে পৰিচিত। গৌশালাৰ কাৰ্যবাহী সদস্য নোহোৱা ব্যক্তিকো প্রত্যক্ষভাৱে ইয়াৰ ন্যাসৰক্ষীৰূপে নিযুক্তি প্রদান কৰাত গৌশালাৰ শুভাকাংক্ষীসকলৰ মাজত ক্ষোভৰ সৃষ্টি হৈছে।
অতি দুর্ভাগ্যজনকভাবে গৌশালাক ব্যক্তিগত নিয়ন্ত্ৰণত ৰখাৰ উদ্দেশ্যেই ইয়াৰ স’তে জড়িত হৈ সুদীর্ঘ ৩০-৪০ বছৰ ধৰি বিভিন্ন ধৰণে সেৱা আগবঢ়াই অহা ব্যক্তিসকলক ধানুকাই আওকাণ কৰিছে। অকল সেয়ে নহয়, একেবাৰে নৱাগত ব্যক্তিক এনে এটি গুৰুত্বপূৰ্ণ বৃহৎ সংস্থাৰ সাধাৰণ সম্পাদকৰূপে নিয়োজিত কৰা হৈছে। ফলস্বৰূপে এইসকল দায়িত্ববাহীৰ কার্যকলাপত গৌশালাত খেলিমেলিৰ আশংকাৰ সৃষ্টি হৈছে। আনকি ধানুকাৰ অনৈতিক কার্যকলাপত চকু মুদি হয়ভৰ নিদিয়া হেতুকে ৪৫ বছৰ ধৰি সেৱা আগবঢ়াই অহা প্ৰৱন্ধক সন্তোষ শৰ্মাক পদৰ পৰা অব্যাহতি দি ভ্রষ্টাচাৰী কৰ্মচাৰীৰূপে চিহ্নিত মদন লালক উক্ত পদত দায়িত্ব অর্পণ কৰা হৈছে।
গৌশালা ন্যাসৰ কমেও দুশ কোটি টকা মূল্যৰ ভূমি ন্যাসৰ সিদ্ধান্তৰ বিৰুদ্ধে গৈ অবৈধভাৱে মাৰোৱাৰী হাস্পতালক আবণ্টন দিয়া কার্যক লৈও তীব্র অসন্তুষ্টিৰ সৃষ্টি হৈছে। ন্যস্তস্বার্থ পূৰণৰ লক্ষ্যৰেই গৌশালাৰ সমীপৰ কৱৰস্থানৰ সন্মুখত নির্মাণ হ’বলগীয়া মার্কেট কমপ্লেক্সৰ কাম বন্ধ ৰাখি কোটি কোটি টকাৰ আয়ৰ পথ বন্ধ ৰাখিছে ধানুকাই। ইয়াৰ উপৰি গো-ধনৰ সংৰক্ষণ তথা সেৱাৰ গৌশালাৰ মূল উদ্দেশ্য আৰু সিদ্ধান্তক উলংঘা কৰি ইয়াক ইতিমধ্যে এক ব্যৱসায়িক ডায়েৰী ফাৰ্মত পৰিণত কৰি তোলা কাৰ্যই এই বিতর্কিত ব্যৱসায়ীজনৰ অসৎ উদ্দেশ্য ফাদিল কৰিছে।
ধানুকাৰ এনে মইমতালি আৰু দুষ্কাৰ্যৰ সম্পৰ্কত ইতিমধ্যে ৰাজহুৱা অভিযোগ পত্ৰও প্ৰচাৰিত হৈছে যদিও বিতর্কিত ব্যৱসায়ীজনে ইয়াৰ সদুত্তৰ দিয়াৰ পৰা বিৰত আছে। বৰঞ্চ মুখ্যমন্ত্ৰীৰ তথাকথিত ঘনিষ্ঠতাৰ প্ৰসংগ উত্থাপন কৰি তেওঁৰ অনিয়মৰ বিৰুদ্ধে অভিযোগ উত্থাপন কৰাসকলক ভাবুকি প্ৰদানৰহে অপচেষ্টা চলাইছে।
এইজন ধানুকাৰ কৱলৰ পৰা গুৱাহাটী গৌশালাক উদ্ধাৰ কৰিবলৈ গুৱাহাটীৰ মাৰোৱাৰী সম্প্রদায় ঐক্যৱদ্ধ হ’ব লাগে বুলি ইতিমধ্যে ৰাজহুৱা দাবী উত্থাপিত হৈছে। ব্যৱসায়ীজনৰ অনৈতিক কার্যকলাপৰ এয়া সামান্য অংশহে। পৰৱৰ্তী পৰ্যায়ত ইয়াৰ বিস্তৃত তথ্য উদঙাই দিয়া হ’ব।