Team India in Women’s World Cup final:
জেমাইমা ৰড্রিগেজৰ অবিস্মৰণীয় শতৰাণৰ সহায়ত মহিলা বিশ্বকাপ ক্ৰিকেটৰ ফাইনেলত প্ৰৱেশ কৰিলে ভাৰতে। বৃহস্পতিবাৰৰ ছেমি ফাইনেলত শক্তিশালী অষ্ট্ৰেলিয়াক ভাৰতে পাঁচ উইকেটত পৰাজিত কৰে। দলৰ জয়ত প্রধান ভূমিকা পালন কৰি জেমাইমাই ১২৭ ৰাণত অপৰাজিত হৈ ৰয়।
খেলৰ আগলৈকে প্রতিযোগিতাত অবিজিত হৈ ৰোৱা সাতবাৰৰ চেম্পিয়ন অস্ট্রেলিয়াই কালি ত্ৰিশতাধিক ৰাণ কৰিও শেষ হাঁহি মাৰিব নোৱাৰিলে। জয়ৰ বাবে প্রয়োজনীয় ৩৩৯ ৰাণ ভাৰতে নটা বল বাকী থকা অৱস্থাতে সংগ্ৰহ কৰে। ইয়াৰ দ্বাৰা মহিলাৰ এদিনীয়া বিশ্বকাপত সর্বাধিক ৰাণ অনুসৰণ কৰি সফল হোৱা দলত পৰিণত হ’ল ভাৰত।
প্রথমে বেটিং কৰি অস্ট্রেলিয়াই ৩৩৮ ৰাণত ইনিংছ সামৰে। অপেনাৰ ফিবি লিচফিল্ডে ৯৩টা বলত ১১৯ ৰাণ কৰাৰ উপৰি এলিছে পেৰীয়ে ৭৭ আৰু এছলে গার্ডনাৰে ৬৩ ৰাণৰ বৰঙণি যোগায়। অৱশ্যে অন্তিম সময়ত ভাৰতীয় বলাৰে উপর্যুপৰি উইকেট দখল কৰি দলটোক অধিক ৰাণ কৰাত বাধা দিয়ে। দুৰম্ভ ফৰ্মত থকা স্মৃতি মন্ধানা (২৪) আৰু শেফালী বার্মা (১০) সোনকালে আউট হ’লেও জেমাইমাই অধিনায়ক হৰমনপ্রীত কৌৰ (৮৯)ৰ স’তে ১৬৪ ৰাণৰ যুটি গঢ়ি জয়ৰ ভেটি স্থাপন কৰে। পাছত দীপ্তি শর্মা (২৪) ৰিচা ঘোষ (২৬) আৰু অমনজ্যোৎ কৌৰ (১৫ অপঃ) ক লগত লৈ জেমাইমাই প্রায় অসাধ্য সাধন কৰে। তেওঁ ১৩৪টা বলত ১৪টা বাউণ্ডেৰী মাৰে।
