Kherani Situation:
পাহাৰীয়া ৰাজ্য পশ্চিম কাৰ্বি আংলঙৰ খেৰণিত সংঘটিত হোৱা হিংসাত্মক ঘটনা আজি ক্ৰমাৎ শান্ত হোৱাৰ দিশে অগ্ৰসৰ হৈছে ৷ দুয়োখন জিলাত ইতিমধ্যে কৰ্তন কৰা হৈছে ইন্টাৰনেট সেৱা। আনহাতে আজি পুৱা ৮ বজাৰ পৰা সেনাৰ ফ্লেগমাৰ্চ আৰম্ভ হোৱাৰ সমান্তৰালভাৱে ৮ টা অসম আৰক্ষী বেটেলিয়ন আৰু ৫ টা অতিৰিক্ত চিআৰপিএফ কোম্পানী মোতায়ন কৰা হৈছে।
আনহাতে আজি কোনো পক্ষই আৰম্ভ কৰা নাই প্ৰতিবাদ ৷ ইতিমধ্যে প্ৰশাসনৰ আমন্ত্ৰণক্ৰমে ২৬ ডিচেম্বৰত ত্রিপাক্ষীক আলোচনাত প্ৰতিবাদকাৰী মিলিত হোৱাৰ সম্ভাৱনা আছে ৷ চৰকাৰ,প্ৰতিবাদকাৰী আৰু কাৰ্বি আংলং স্বায়ত্ত্বশাসিত পৰিষদৰ মাজতে ত্রিপাক্ষীক আলোচনা হ’ব I
উল্লেখ্য যে আংলং জিলাৰ খেৰণিকে ধৰি বৃহত্তৰ অঞ্চলত সোমবাৰৰ পৰা সৃষ্টি হোৱা হিংসাত্মক পৰিস্থিতি নিয়ন্ত্রণত সম্পূর্ণৰূপে বিফল হৈছে অসম চৰকাৰ। আনকি সোমবাৰৰ সন্ধিয়াৰে পৰা পৰিস্থিতি নিয়ন্ত্ৰণৰ বাবে কাৰ্বি আংলঙত বাহৰ পাতি থকা আৰক্ষী সঞ্চালক প্রধান হৰমিত সিঙৰ সম্মুখতে দোকান-ঘৰ লণ্ডভণ্ড কৰি অগ্নিসংযোগৰ ঘটনা সংঘটিত হয়। খেৰণিত পিজিআৰ আৰু ভিজিআৰ ভূমি বেদখলমুক্ত কৰাৰ দাবীত অব্যাহত থকা আন্দোলনৰ প্ৰতি গুৰুত্ব আৰোপ নকৰাৰ
পৰিণতিত সোমবাৰে কাৰ্বি স্বায়ত্তশাসিত পৰিষদৰ মুখ্য কার্যবাহী সদস্য (চিইএম) তুলিৰাম ৰংহাঙৰ ডংকামোকামৰ ঘৰ ক্ষুব্ধ ৰাইজে জ্বলাই দিয়াৰ পাছত মঙলবাৰে পুনৰ যুদ্ধ সদৃশ পৰিস্থিতিৰ সৃষ্টি হয় আৰক্ষীৰ গুলিচালনাত এজন লোক নিহত, কমেও তিনিজন আহত হোৱাৰ উপৰি আন এক ঘটনাত এজন যুৱক জীবন্তে অগ্নিদগ্ধ হোৱাৰ লগতে বহু সংখ্যক আৰক্ষী উত্তেজিত ৰাইজৰ আক্ৰমণত আহত হয়। আৰক্ষীৰ গুলিত আহত কার্বি লোকজন হৈছে লিনুছ ফাংচ’। আনহাতে অগ্নিদগ্ধ হৈ নিহত হোৱা যুৱকজন সৰোজ দে বুলি তেওঁৰ খুৰাক বকুল দেই সদৰী কৰে।
মঙলবাৰে পুৱাৰে পৰা খেৰণিৰ কপিলী নৈৰ দুয়োপাৰে দুটা পক্ষই যুদ্ধংদেহি ৰূপ লৈ অৱস্থান কৰে। এক যুদ্ধসদৃশ পৰিস্থিতিত হাতে হাতে লাঠি আদি লৈ এটা পক্ষই আন এটা পক্ষক ফেপেৰি পাতি ধৰাৰ দৰে পৰিৱেশ সৃষ্টি হোৱাই নহয়, আৰক্ষীৰ স’তেও একপ্ৰকাৰ সমুখ সমৰত লিপ্ত হয় ৰাইজ। পূব পাৰৰ মূলতঃ হিন্দী ভাষী শ শ লোকে হাতে হাতে লাঠি লৈ যোৱা নিশা বজাৰৰ দোকানসমূহ জ্বলাই দিয়াৰ প্ৰতিবাদ জনাই তীব্র উত্তপ্ত পৰিস্থিতিৰ সৃষ্টি কৰে। নৈৰ আনটো পাৰে খিলঞ্জীয়া কাৰ্বি লোকসকলে লাঠি, জোং লৈ ৰণচণ্ডী মূর্তি ধাৰণ কৰে। জ্বলাই দিয়া দোকান পুনৰ নিৰ্মাণৰ দাবীৰ লগতে আৰক্ষীৰ বিৰুদ্ধে নিৰাপত্তা প্রদানত ব্যৰ্থতাৰ অভিযোগ কৰে হিন্দী ভাষী লোকসকলে। এনে ক্ষুব্ধ মহিলাই কয়, ‘তেওঁলোকে প্রতিবাৰে বিহাৰীক লক্ষ্য কৰি লয়। আমি কাজিয়া-পেচাল নিবিচাৰো। পিজিআৰ-ভিজিআৰ যদি হয় কাগজ দেখুৱাওক। আহি ভাঙি দিয়ক ঘৰ-দুৱাৰ।’ আন এজন যুৱক তথা মহিলাই কয়, ‘কালি তেওঁলোকে আমাক গালি-গালাজ কৰাৰ উপৰি আমাৰ ঘৰ জ্বলাই দিছে। থানাৰ সম্মুখতে আমাৰ ঘৰ জ্বলাই দিছে। এনে আৰক্ষী প্রশাসন আমাক নালাগে। এগৰাকী মহিলাই মুখ্যমন্ত্রী হিমন্ত বিশ্ব শৰ্মাৰ নাম উচ্চাৰণ কৰি কয় যে পিজিআৰ-ভিজিআৰ যদি তেওঁলোকে দখল কৰি আছে তেন্তে মুখ্যমন্ত্রীয়ে আহি ভাঙি দিব পাৰে। আৰক্ষীয়ে দুয়ো পক্ষক নিয়ন্ত্ৰণৰ চেষ্টা চলায় যদিও পৰিস্থিতি অধিক জটিলতাৰ দিশলৈ গতি কৰে। আৰক্ষীয়ে দুয়োপক্ষক সমুখ সমৰত লিপ্ত হোৱাৰ পৰা আঁতৰাই ৰাখিবলৈ চেষ্টা চলায়। ইপিনে, পৰিস্থিতি অধিক সংকটজনক হৈ পৰাত বৃহত্তৰ অঞ্চলত প্রশাসনে ইণ্টাৰনেট সেৱা কৰ্তন কৰে।
আৰক্ষীৰ গুলিচালনাত নিহত হয় আর্থিক টিমুং নামৰ যুৱকজন। আনহাতে টিমথি টিমুং নামৰ এজন যুৱকসহ আন এজন যুৱক গুৰুতৰভাৱে আহত হয়। দুয়ো হাস্পতালত চিকিৎসাধীন হৈ আছে। মঙলবাৰেআৰক্ষী প্ৰশাসনৰ নিষেধাজ্ঞা উপেক্ষা কৰি দুয়োপক্ষই যুদ্ধ সদৃশ পৰিস্থিতিৰ সৃষ্টি কৰি এটা পক্ষই আনটো পক্ষক শিল, ইটা আদি দলিয়ায়। আনহাতে একাংশই আৰক্ষীক আক্ৰমণ কৰে। আৰক্ষীৰ লাঠিচালনা, কন্দুৱা গেছ নিক্ষেপেও ক্ষুব্ধ ৰাইজক ক্ষান্ত কৰিব পৰা নাছিল।
সোমবাৰৰ দোকান আৰু ঘৰত অগ্নিসংযোগ কৰা হিন্দী ভাষী লোকসকলৰ পুৰুষ-মহিলা, কন্যা সমন্বিতে কালিৰ হিংসাত্মক ঘটনাৰ তীব্র প্রতিবাদ কৰে। একেদৰে উচ্ছেদৰ দাবীত আন্দোলন অব্যাহত ৰখা কাৰ্বি ৰাইজে খেৰণি বজাৰ অঞ্চলত সমৱেত হয়। দুয়োপক্ষই চৰম উত্তেজনাৰ পৰিস্থিতিৰ সৃষ্টি কৰে, আৰক্ষীলৈ শিল, ইটা আদি নিক্ষেপ কৰে। এই ঘটনাতে বহু লোক আহত হয়।
পৰিস্থিতি নিয়ন্ত্ৰণ কৰা বুলি আৰক্ষীয়ে দাবী কৰিলেও পশ্চিম কার্বি আংলঙৰ খেৰণিত এতিয়াও অব্যাহত থকা চেপা উত্তেজনাত ৰাইজ আতংকিত হৈ আছে। ঘটনাৰ বিৱৰণি অনুসৰি খেৰণিৰ দৈনিক বজাৰত অচিনাক্ত একাংশ পথ অৱৰোধকাৰীয়ে ব্যৱসায় প্ৰতিষ্ঠান ভাঙি লণ্ডভণ্ড কৰাৰ লগতে প্ৰতিষ্ঠানৰ ভিতৰৰ পৰা সা-সামগ্ৰীসমূহ ৰাস্তালৈ দলিয়াই জ্বলাই দিয়ে। কাপোৰ, ম’বাইল, গেলামালৰ দোকানকে ধৰি এফালৰ পৰা দোকান-পোহাৰ ধ্বংস কৰে একাংশই। একাংশই দোকানৰ বয়-বস্তু লুটপাট কৰা বুলিও অভিযোগ উঠিছে।
উল্লেখ্য যে মঙলবাৰে পুৱতি নিশা খেৰণিৰ ফেলাংপিৰ প্ৰতিবাদস্থলীৰ পৰা আৰক্ষীয়ে লৈ যোৱা সাতজন প্রতিবাদকাৰীক যোৱা নিশা প্রায় এক বজাত পুনৰ প্রতিবাদস্থলীত থৈ যায় আৰক্ষীয়ে। ইয়াৰ পাছত দিনৰ ভাগত প্ৰতিবাদকাৰী আৰু ৰাইজৰ স’তে মন্ত্ৰী ৰণোজ পেগু, জিলা উপায়ুক্ত, কার্বি স্বায়ত্তশাসিত পৰিষদৰ প্ৰতিনিধি দলে আলোচনাত মিলিত হয়। চলিত মাহতে এক ত্রিপাক্ষিক বৈঠক অনুষ্ঠিত কৰা হ’ব বুলি আলোচনাত কোৱা হয়। মন্ত্ৰী ৰণোজ পেগুৱে ৰাইজক এক ইতিবাচক ফলাফলৰ আশ্বাস দিয়ে। সমান্তৰালভাৱে খেৰণিত উদ্ভৱ হোৱা হিংসাত্মক পৰিস্থিতি নিয়ন্ত্ৰণৰ বাবে অঞ্চলটোত উপস্থিত থাকে আৰক্ষীৰ সঞ্চালক প্রধান হৰমিত সিং। আলোচনাৰ অন্তত দিনৰ ভাগত প্ৰতিবাদকাৰীসকলে অনশন কাৰ্যসূচী প্ৰত্যাহাৰ কৰা বুলিও প্রকাশ কৰে। অৱশ্যে আলোচনাস্থলীৰ পৰা মন্ত্ৰী পেগুৰ প্ৰস্থানৰ পাছতে কপিলী নৈৰ সিপাৰত অৰ্থাৎ পূব দিশৰ পিজিআৰ-ভিজিআৰ ভূমি সম্বলিত থকা খেৰণি ঘাটত বৃহৎ সংখ্যক লোকে হাতে হাতে লাঠি আৰু ৰ[‘ড লৈ তীব্র উত্তেজনা আৰু সৃষ্টি কৰে।
তেওঁলোকে ন্যায়ৰ দাবী উত্থাপন কৰে আৰু প্ৰশ্ন উত্থাপন কৰে যে কিহৰ বাবে তেওঁলোকৰ ওপৰত অত্যাচাৰ চলোৱা হৈছে। কালি কিহৰ বাবে তেওঁলোকৰ দোকান-পোহাৰ জ্বলাই দিয়া হ’ল বুলিও মূলতঃ হিন্দী ভাষী এই লোকসকলে প্রশ্ন উত্থাপন কৰি আৰক্ষীৰ বিৰুদ্ধেও তীব্র ক্ষোভ প্রকাশ কৰে।
বাৰে বাৰে বিহাৰী লোকক আক্ৰমণৰ লক্ষ্য কৰি লোৱা বুলি ক্ষুব্ধ মহিলাই অভিযোগ কৰি ৰণচণ্ডী ৰূপ ধাৰণ কৰে। প্ৰকৃতাৰ্থত যদি পিজিআৰ-ভিজিআৰ ভূমিত হয় তেন্তে উচ্ছেদ কৰিবলৈ প্ৰত্যাহ্বান জনায় ক্ষুব্ধ লোকসকলে। পিজিআৰ ভূমিত বসবাস কৰা এই লোকসকলে তেওঁলোকক আতিশয্য চলোৱা হৈছে বুলি উল্লেখ কৰি পৰিস্থিতি উত্তপ্ত কৰি তোলে। উল্লেখ্য যে এই বৃহৎ অঞ্চলটোত মাত্র এখনেই কার্বি গাঁও আছে আৰু গাঁওখনৰ বাসিন্দাসকলে উদ্ভৱ হোৱা পৰিস্থিতিত আতংকিত হৈ ঘৰৰ বাহিৰলৈ ওলাই অহা নাছিল বুলিও তথ্য প্রকাশ হৈছে। এই গাঁওখনৰ নাম হৈছে দিখৰেখ। হিন্দীভাষী লোকসকলে অধিক উত্তেজিত হৈ পৰিস্থিতি ক্রমশঃ উত্তপ্ত কৰি তোলে। আৰক্ষীয়ে বুজনি দিবলৈ চেষ্টা চলায় যদিও এটা সময়ত পৰিস্থিতি নিয়ন্ত্ৰণৰ বাহিৰলৈ যায়।
উত্তেজিত লোকসকলে আৰক্ষীক আক্রমণ কৰে, শিল দলিয়ায়। তীব্র উত্তেজনা পৰিস্থিতিত আৰক্ষীয়ে লাঠিচালনা কৰে, কন্দুৱা গেছ প্রয়োগ কৰে আৰু শূন্যলৈ গুলিচালনা কৰে। এই ঘটনাত প্রতিবাদকাৰীসকলে ছত্রভংগ দিয়াত পৰিস্থিতি কিছু শাম কাটে যদিও ইয়াৰ প্ৰায় ডেৰ-দুই ঘণ্টাৰ পাছতে কপিলী নৈৰ পশ্চিম দিশত অৰ্থাৎ খেৰণি বজাৰৰ দিশত কার্বি অধ্যুষিত অঞ্চলত উত্তপ্ত পৰিস্থিতিৰ সৃষ্টি হ’বলৈ ধৰে। সকলোৰে হাতে হাতে আছিল এই স্থানতো লাঠি, জোং, ৰড আদি। উত্তেজিত লোকসকলে একগোট হৈ এফালৰ পৰা দোকান-পোহাৰ ভাঙি লণ্ডভণ্ড কৰে। দিনৰ প্ৰায় আঢ়ৈ বজাৰ পৰা এই উত্তপ্ত পৰিস্থিতিৰ আৰম্ভণি হয় আৰু সন্ধিয়ালৈ চৰম উত্তেজনা বিয়পে। খেৰণিৰ দৈনিক বজাৰত এখনৰ পাছত আনখন দোকান ভাঙি লণ্ডভণ্ড কৰে উত্তেজিত লোকসকলে। দোকানৰ সা-সামগ্ৰী বাহিৰলৈ দলিয়াই পেলায়।
এই স্থানত ডিজিপি হৰমিত সিঙে নিজে উপস্থিত থাকি পৰিস্থিতি নিয়ন্ত্ৰণৰ চেষ্টা চলায়। তেওঁ উত্তেজিত লোকসকলক বুজনি দিবলৈও চেষ্টা কৰে যদিও প্ৰতিবাদকাৰীসকল নিজ স্থিতিত অটল থাকে। আৰক্ষীৰ বাধাই সামান্যও লৰচৰ কৰিব পৰা নাছিল ক্ষুব্ধ কাৰ্বি ৰাইজক। ইয়াৰ পাছতে উত্তেজিত লোকসকলে দোকান-পোহাৰত অগ্নিসংযোগ কৰিবলৈ আৰম্ভ কৰে। দৈনিক বজাৰৰ প্ৰথমতে ২০ খনৰো অধিক দোকান লণ্ডভণ্ড কৰা হয় আৰু অগ্নিসংযোগৰ ঘটনাই তীব্র ৰূপ লোৱাত যিসমূহ দোকানৰ লগতে পৰিয়ালেও বাস কৰিছিল সেইসকলে প্ৰাণৰ ভয়ত যেনিয়ে তেনিয়ে পলায়ন কৰে। আৰক্ষী সঞ্চালক প্রধানৰ চকুৰ সম্মুখতে প্রকাণ্ড জুয়ে অঞ্চল ঘেৰি ধৰে।
উল্লেখ্য যে বজাৰত কমেও ৬০-৭০ খন দোকান থকা বুলি স্থানীয় ৰাইজে তথ্য প্ৰকাশ কৰাৰ লগতে কয় যে পৰিয়ালসহ দোকানৰ পাছফালে বসবাস কৰা পৰিয়ালৰ সংখ্যা ১০ৰ পৰা ২০ ঘৰ হ’ব। এই পৰিস্থিতিত আৰক্ষীয়ে দিনটোৰ ভিতৰত দ্বিতীয়বাৰৰ বাবে লাঠিচালনা কৰে, কন্দুৱা গেছ প্রয়োগ কৰে আৰু গুলিচালনা কৰে। এই সময়তে আৰক্ষীৰ গুলিত নিহত হয় ফাংচ’ নামৰ যুৱকজন। এই ঘটনাত টিমথি টিমুং নামৰ আন এজন যুৱক গুৰুতৰভাৱে আহত হোৱাৰ লগতে সামান্যভাৱে আহত হোৱা তৃতীয়জন যুৱকৰ নাম অৱশ্যে নিশা পর্যন্ত উদ্ধাৰ হোৱা নাই। একাংশ স্থানীয় ৰাইজে কয় যে আৰক্ষীৰ গুলিচালনা, উত্তপ্ত পৰিস্থিতিৰ মাজতে দুষ্কৃতিকাৰীয়ে আহি সন্ধিয়াৰ সময়ত দোকান-পোহাৰ আৰু পৰিয়ালসহ বাস কৰা দোকানসমূহত অগ্নিসংযোগ কৰে। এই ঘটনাত সম্পূৰ্ণৰূপে ভস্মীভূত হয় ২০ খনতকৈ অধিক দোকান আৰু কাষতে লাগি থকা ঘৰ-দুৱাৰো অগ্নিদগ্ধ হয়।
আৰক্ষীয়ে পৰিস্থিতি নিয়ন্ত্রণত ব্যর্থ হোৱা বুলি অভিযোগ উঠিছে। ডিজিপিৰ সন্মুখতে প্ৰতিবাদকাৰীয়ে খেৰণি বজাৰ জ্বলাই দিয়াক লৈ তীব্র প্রতিক্ৰিয়াৰ সৃষ্টি হৈছে। ঘটনাস্থলীত উপস্থিত থকা হৰমিত সিঙে প্ৰতিবাদকাৰীসকলক বিপথে পৰিচালিত নকৰিবলৈ আহ্বান জনায়। তেওঁ কয় যে এনে ঘটনাই পৰিস্থিতি সমাধান কৰিব নোৱাৰিলে। ঘটনাত কমেও ৩৮ জন আৰক্ষী নিহত হোৱা বুলি তেওঁ সদৰী কৰি কয় যে এই পৰিস্থিতি অব্যাহত থাকিলে আৰক্ষীয়ে কঠোৰ ব্যৱস্থা ল’বলৈ বাধ্য হ’ব। আইন হাতত তুলি নল’বলৈ তেওঁ ৰাইজক আহ্বান জনায়। ইপিনে, কাৰ্বি আংলঙৰ এএছপি ফাইজ উদ্দিন বৰভূঁঞাক বদলি কৰা হয় ৷
