iPhoneEMI : দৈনিক অগ্ৰদূত ডিজিটেল ডেস্ক : দুদিন পূৰ্বে মহাৰাষ্ট্ৰৰ ছম্ভাজিনগৰত এটা আইফোনৰ বাবেই এটা তিনিজনীয়া পৰিয়াল নিঃশেষ হোৱাৰ পাছত অনুৰূপ শিহৰণকাৰী ঘটনা সংঘটিত হ’ল দিল্লীত।
বিলাসী আইফোনৰ মাহিলি কিস্তি (ইএমআই) পৰিশোধত ব্যৰ্থ হৈ এজন দুই সন্তানৰ পিতৃয়ে যমুনা নৈত জাঁপ দি আত্মহত্যাৰ চেষ্টা চলায়। সৌভাগ্যবশতঃ লোকজনক আৰক্ষীয়ে জীৱিত অৱস্থাত উদ্ধাৰ কৰে।
আৰক্ষী সূত্ৰই জনোৱা মতে, দক্ষিণ-পূব দিল্লীৰ ওখলাৰ নিৱাসী দীপক কুমাৰে কিছুদিন পূর্বে এটা দামী আইফোন ক্রয় কৰে। ইয়াৰ বাবদ তেওঁ মাহিলি কিস্তি পৰিশোধ কৰিবলগীয়া হয়। নাচ শিকায় আৰু ফুলৰ বাগিচাত মালিৰ কাম কৰি জীৱিকা অৰ্জন কৰা দীপকৰ আয় যোৱা মাহৰ পৰা হ্রাস পাবলৈ ধৰে।
ফলত তেওঁ আইফোনৰ ইএমআই পৰিশোধ কৰাত অসমর্থ হয়। ইয়ে তেওঁৰ ওপৰত মানসিক চাপ বৃদ্ধি কৰে। অৱশেষত আত্মহত্যাৰ উদ্দেশ্যে যমুনা নৈত জাঁপ দিয়ে দীপক বিবাহিত হোৱাৰ উপৰি দুই সন্তানৰ পিতৃও।
উল্লেখ্য যে যোৱা ২১ আগষ্টত মহাৰাষ্ট্ৰৰ ছন্তাজিনগৰত এজন ১৮ বছৰীয়া যুৱকে পিতৃয়ে আইফোন ক্ৰয় কৰি নিদিয়াৰ ক্ষোভত এখন পাহাৰৰ ওপৰৰ পৰা উলিয়াই আত্মহত্যা কৰে। তেওঁক বচাবলৈ গৈ তেওঁৰ পিতৃৰো পাহাৰৰ ওপৰৰ পৰা পৰি মৃত্যু হয়।
এই দৃশ্য প্রত্যক্ষ কৰি থকা যুৱকজনৰ মাতৃয়েও পাহাৰৰ ওপৰৰ পৰা জঁপিয়াই আত্মহত্যা কৰে। এই শিহৰণকাৰী ঘটনা আজিও দেশত চর্চিত হৈ আছে। এনে অৱস্থাতে দিল্লীৰ ঘটনাটো সংঘটিত হয়।
