দৈনিক অগ্ৰদূতৰ সাংবাদিকৰ বাতৰি আৰু তথ্যৰ ভিত্তিত চিৰাং আৰক্ষীৰ তৎপৰতা 

চিৰাঙৰ এগৰাকী বৃদ্ধাৰ কৰুণ অৱস্থা । ধুমুহা-বৰষুণকো সহ্য কৰি  বিভিন্ন জনে দিয়া খাদ‍্য খাই উৰণীয়া সেতুৰ তলত জীৱন নিৰ্বাহ কৰি আহিছে বৃদ্ধাগৰাকীয়ে । যোৱা ২৫ এপ্ৰিল এই বাতৰি প্ৰকাশ হোৱাৰ পিচতে চিৰাং জিলা আৰক্ষী অধীক্ষকে গুৰুত্ব সহকাৰে লৈ বৃদ্ধাগৰাকীৰ চিকিৎসাৰ অন্তত আজি বৃদ্ধাশ্ৰমলৈ প্ৰেৰণ কৰে। উৰণীয়া সেতুৰ তলত জীৱন নিৰ্বাহ কৰা  চিৰাঙৰ ষাঠীৰ উৰ্দ্ধৰ বৃদ্ধাগৰাকীৰ নাম মামনি সাহায় । লগতে নিজকে কোকৰাঝাৰ জিলাৰ গোসাইগাওৰ বাসিন্দা বুলি পৰিচয় দিয়ে যদিও নিজৰ বুলি কোনো আত্মীয় স্বজন নাই বুলিও জনায় বৃদ্ধাগৰাকীয়ে। অতি দৰিদ্ৰ পৰিয়ালত জন্ম গ্ৰহণ কৰা বাবে সৰুতে কোনো লোকে চিৰাং জিলাৰ ঢালিগাঁওৰ বৰতালোৱাত আনি চাহৰ দোকানত থৈছিল। তেতিয়াৰ পৰাই এইখন বজাৰতে থাকি চাহৰ দোকানত কাম কৰিয়ে জীৱন অতিবাহিত কৰিলে । সংসাৰীক জীৱনৰ পৰা আঁতৰি থকাৰ পাছত এতিয়া বয়সে ৬০ ৰ দেওনা পাৰ কৰিলে ।

এতিয়া অচল অৱস্থাৰে কামো কৰিব নোৱাৰে। সেয়ে এতিয়া জিলাখনৰ ঢালিগাঁওৰ বৰতালোৱা বজাৰত ভিক্ষা কৰি যি পায় তাকেই খায় আৰু  নিশাটো ধুমুহা বৰষুণ নেওচি ৩১ (চি) ৰাষ্ট্ৰীয় ঘাই পথৰ উৰণীয়া সেতুৰ তলতে পাৰ কৰে নিশা। এক দুৰ্বিসহ জীৱনৰ শেষ বয়সত দুৰ্ভগীয়া বৃদ্ধা গৰাকীয়ে  এইদৰেই জীৱন কটোৱাৰ পাছতো কোনো দল-সংগঠন, বেচৰকাৰী সংস্থা বা চৰকাৰৰ দৃষ্টিগোচৰ হোৱা নাই । বৃদ্ধা গৰাকীয়ে এতিয়া তলাবন্ধৰ সময়ত বজাৰসমূহ বন্ধ হোৱাত খাদ‍্যৰ ক্ষেত্ৰত অসুবিধাৰ সন্মূখীন হৈছে  । ইপিনে, তলাবন্ধৰ ফলত এই সময়ত কোনো বৃদ্ধাশ্ৰমত লোৱাৰো উপায় নাই । সেয়ে কোনো সদাশয় লোক নতুবা বেচৰকাৰী সংস্থা বা চৰকাৰী ভাৱে ব‍্যৱস্থা গ্ৰহণৰ আহ্বান জনাইছে স্থানীয় লোকে । যাতে বৃদ্ধাগৰাকীয়ে থকা আৰু খোৱাৰ নিম্নতম সুবিধা খিনি লাভ কৰে এই শেষ বয়সত । এই আবেদনেৰে বৃদ্ধাৰ বাতৰি প্ৰকাশ হোৱাৰ পিচত  চিৰাং জিলা আৰক্ষীৰ দৃষ্টিগোচৰ হয়।

তাৰ পিচতে  জিলা আৰক্ষী অধীক্ষক সুধাকৰ সিঙৰ নিৰ্দেশত বৃদ্ধাগৰাকীৰ ওচৰত উপস্থিত হয় জিলা সদৰ উপ-আৰক্ষী অধীক্ষক প্ৰতাপ দাস আৰু ঢালিগাঁও থানাৰ ভাৰপ্ৰাপ্ত বিষয়া বিজিত দাধৰা। আৰক্ষীয়ে বৃদ্ধাগৰাকীৰ থকা-খোৱা তথা বিভিন্ন দিশৰ তথ্য সংগ্ৰহৰ অন্তত  বৃদ্ধাগৰাকীক উদ্ধাৰ কৰি চিকিৎসা কৰাৰ লগতে চিৰাঙৰ চাপাগুৰীৰ বেচৰকাৰী সংস্থা মিচনাৰীছ অৱ চেৰিটিৰ সহযোগত গোৱালপাৰাত থকা তেওঁলোকৰ বৃদ্ধাশ্ৰমলৈ আজি আনুষ্ঠানিক ভাৱে প্ৰেৰণ কৰে। জিলা আৰক্ষী অধীক্ষক সুধাকৰ সিঙে এই ক্ষেত্ৰত কয় যে এই ধৰণৰ মানৱীয় সংকটৰ যিকোনো দিশত তথ্য পোৱাৰ লগে লগে সেয়া সমাধানৰ চেষ্টা কৰে আৰক্ষীয়ে । যিদৰে আজিৰ ঘটনাও জিলা প্ৰশাসনৰ সহযোগত সমাধান কৰিবলৈ সক্ষম হয় । সংবাদ মাধ্যমৰ সহযোগত চিৰাং জিলা আৰক্ষীৰ তৎপৰতাৰে বৃদ্ধাগৰাকীৰ সু-ব‍্যৱস্থা কৰাত বিভিন্ন জনে আৰক্ষীৰ লগতে সংবাদ মাধ‍্যমৰ শলাগ লয়। লগতে চিৰাং জিলা আৰক্ষী অধীক্ষক সুধাকৰ সিঙ আৰু স্থানীয় লোক যি সকলে প্ৰত্যেক দিনাই বৃদ্ধা গৰাকীক প্ৰত‍্যক্ষ কৰিছিল তেওঁলোক সকলোৱে সংবাদ মাধ‍্যমৰ শলাগ লয়।