পুনৰ নিৰ্ধাৰিত বিধানসভা আৰু লোকসভা সমষ্টিত নির্বাচনত বিজয়ী হ’ব পৰাকৈ নিৰ্ণায়ক ভূমিকা লোৱা সম্প্রদায়-গোষ্ঠীৰ হিচাপ উলিওৱাৰ লগতে জনগাঁথনিৰ ৰেহৰূপ, সমষ্টি পুনৰ নিৰ্ধাৰণৰ ক্ষেত্ৰত চৰকাৰে গ্ৰহণ কৰা কৌশল আদিকে ধৰি সকলো দিশ পৰ্যালোচনাৰ সিদ্ধান্ত গ্রহণ কৰিছে কংগ্ৰেছে। অহা ২০২৬ৰ বিধানসভা নিৰ্বাচনৰ প্রতি লক্ষ্য ৰাখি আজি ইয়াৰ বাবে এখন ছজনীয়া সমিতি গঠন কৰে প্ৰদেশ কংগ্ৰেছে।
নির্বাচনলৈ প্রায় ডেৰ বছৰ বাকী থাকিলেও কংগ্ৰেছে এইবাৰ পূৰ্বতকৈ আগতীয়াকৈ প্রক্রিয়া আৰম্ভ কৰাৰ ৰণকৌশল গ্রহণ কৰিছে। তাৰে অংশৰূপে অসম প্রদেশ কংগ্ৰেছ কমিটীৰ প্রাক্তন সভাপতি ৰিপুন বৰাক অধ্যক্ষ আৰু গৱেষণা বিভাগৰ অধ্যক্ষ ড° নেত্ৰ ৰঞ্জনক আহ্বায়ক ৰূপে লৈ গঠন কৰা সমিতিখনৰ সদস্য কেইজন হ’ল জ্যেষ্ঠ অধিবক্তা হাফিজ ৰছিদ আহমেদ চৌধুৰী, প্রাক্তন বিধায়ক দুর্গা ভূমিজ, প্রদেশ কংগ্ৰেছৰ সেৱা দলৰ অধ্যক্ষ দীপ বায়ন আৰু হাৰুণ ইউছুফ।
এআইচিচিৰ সাধাৰণ সম্পাদক তথা অসমৰ ভাৰপ্ৰাপ্ত জিতেন্দ্র নাথ সিঙে স্বাক্ষৰ কৰা এই সম্পর্কীয় নির্দেশনাটোত উল্লেখ কৰা হৈছে যে এই সমিতিয়ে বিগত ২০০২ৰ পূৰ্বে সমষ্টি পুনৰ নিৰ্ধাৰণ আয়োগৰ অধীনত কোনবোৰ বিষয়ক ভিত্তি কৰি সমষ্টি পুনৰ গঠনৰ প্রক্রিয়া চলাইছিল। ইয়াৰ লগতে ভাৰতৰ নিৰ্বাচন আয়োগৰ অধীনত ২০২৩ত অসমত যি সমষ্টি পুনৰ নিৰ্ধাৰণ কৰা হয়, তাৰ বাবে কোনবোৰ বিষয়ক আধাৰ হিচাপে লোৱা হয়, সেয়াও বিশ্লেষণ কৰিব।
এই সমিতিয়ে প্রতিটো বিধানসভা সমষ্টিৰ জাতি-সম্প্রদায় আৰু ধৰ্মৰ ভিত্তিত ২০২১ৰ আগৰ পৰিৱেশ আৰু সমষ্টি পুনৰ নিৰ্ধাৰণৰ পাছৰ পৰিৱেশৰ জনগাঁথনি ভিত্তিক তুলনামূলক অধ্যয়নো কৰিব লাগিব। এই সংক্রান্ততে বিধানসভা আৰু লোকসভা সমষ্টিবোৰৰ কোনটোত কোন সম্প্রদায়ে নির্বাচনত জয়লাভৰ ক্ষেত্ৰত নিৰ্ণায়ক ভূমিকা গ্রহণ কৰিব, সেয়াও সমিতিখনে নির্ধাৰণ কৰিব লাগিব। তাৰ সমান্তৰালভাৱে সমষ্টি পুনৰ নিৰ্ধাৰণৰ পূৰ্বৰ আৰু পাছৰ পৰিৱেশতো নির্ণায়ক ভূমিকা লোৱা সম্প্ৰদায়ৰ বিশ্লেষণ আগবঢ়াব লাগিব এই সমিতিয়ে।
নির্দেশনাটোত সমষ্টি পুনৰ নিৰ্ধাৰণত যদি কোনো অনিয়ম হৈছিল, তাৰো নির্দিষ্ট ৰূপত উল্লেখ কৰাৰ লগতে সেই সন্দৰ্ভত কংগ্ৰেছৰ কৰণীয় কি হ’ব তাৰো পৰামৰ্শ দিয়াৰ কথা উল্লেখ কৰা হৈছে। জনগাঁথনি সলনি হোৱা বিধানসভা সমষ্টিবোৰত বিভিন্ন জাতি-সম্প্রদায় আৰু ধৰ্মৰ লোকৰ স্বাৰ্থ ৰক্ষাৰ বাবে ২০২৬ৰ নিৰ্বাচনত কংগ্ৰেছে কি ধৰণৰ পৰামৰ্শ লোৱা উচিত, সেই পৰামৰ্শও সমিতিক দিবলৈ কোৱা হৈছে। আজিৰ পৰা ৩০ দিনৰ ভিতৰত সমিতিখনক এআইচিচিৰ সাধাৰণ সম্পাদক তথা অসমৰ ভাৰপ্ৰাপ্ত সিঙৰ হাতত প্রতিবেদন দাখিলৰো সময়সীমা ধার্য কৰি দিয়া হৈছে।
# মুখ্যমন্ত্ৰীৰ সম্পত্তিৰ ছেটেলাইট মানচিত্র সাজু কংগ্ৰেছৰ
ইপিনে, ৰাজীৱ ভৱনত দলীয় এক অনুষ্ঠানৰ পাছত সভাপতি ভূপেন বৰাই দাবী কৰে যে ২০২৬ত অসমত তেওঁলোকে চৰকাৰ গঠন কৰিবই। চৰকাৰ গঠনৰ পাছতে মুখ্যমন্ত্রী হিমন্ত বিশ্ব শৰ্মাৰ কেলেংকাৰি উদ্ঘাটনৰ বাবে বিশেষ তদন্তকাৰী গোট (এছআইটি) গঠন কৰিব। বৰাই কয়, ‘এটা পৰিয়ালৰ ইমান সম্পত্তি বৃদ্ধি হৈ আছে ! অসমত ৰিজ’ৰ্ট, বাগান, স্কুল এইবোৰ কাৰ? আমাৰ হাতত প্রতিটো সম্পত্তিৰ ছেটেলাইট মেপ আছে। ২০২৬ত আমি চৰকাৰ কৰিম আৰু এছআইটিৰ দ্বাৰা ইয়াৰ তদন্ত হ’ব। আমি তালিকা সাজু কৰি আছে।
প্রতিটো নয়া পইচাৰ হিচাপ এছআইটিৰ আগত দিব লাগিব।’ অৱশ্যে বৰাই পৰিয়ালটোৰ নাম উল্লেখ নকৰিলেও পূর্বে কৈ অহাৰ দৰে ইয়াৰ দ্বাৰা মুখ্যমন্ত্ৰী আৰু তেওঁৰ পৰিয়ালকে ইংগিত কৰিছে, সেয়া স্পষ্ট। তদুপৰি বৰাই কয় যে অসমত ৩২ লাখ নিবনুৱা আছে। ইয়াৰে কিমানক হিমন্ত বিশ্ব শর্মাই সংস্থাপন দিব ? চালকৰ চাকৰি কিমান দিব বুলিও প্রশ্ন কৰে। ইয়াৰ লগতে তেওঁ কয়, ‘অসমৰ ৰাইজৰ মৌলিক সমস্যা তল পেলাবলৈ বিজেপি চৰকাৰে সদায় চেষ্টা কৰি আছে।
তাৰ বাবে বিজেপিয়ে জাতিটোক শ্রুতলিপিও দিব বিচাৰে। বিজেপিৰ শ্রুতলিপিত আমি কোনেও চলিব নালাগে। আমাৰ ওপৰত মনস্তাত্ত্বিক চাপ সৃষ্টিৰ চেষ্টা কৰিছে। আমি সেই চাপত নপৰো। চুপাৰি-কয়লা ছিণ্ডিকেটৰ নামত কেৱল লুটিছে। এটা পৰিয়ালৰ ইমান সম্পত্তি কেনেকৈ বৃদ্ধি হৈ আছে? ইয়াৰ তদন্ত হ’বই লাগিব।’
