Nitin Nabin:
নতুন দিল্লীৰ বিজেপিৰ সদৰ কাৰ্যালয়লত আনুষ্ঠানিকভাৱে ঘোষণা হ’ল বিজেপিৰ নতুন ৰাষ্ট্ৰীয় সভাপতিৰ নাম ৷ জে পি নাড্ডাৰ উত্তৰসূৰী হ’ল নীতিন নবীন ৷ প্ৰধানমন্ত্ৰী নৰেন্দ্ৰ মোদীৰ উপস্থিতিত সভাপতিৰ দায়িত্ব আনুষ্ঠানিকভাৱে গ্রহণ কৰে বিহাৰ চৰকাৰৰ কেবিনেট মন্ত্ৰী ৪৬ বছৰীয়া নীতিন নবীনে ৷ বিজেপিৰ ইতিহাসত সর্বকনিষ্ঠ সভাপতি হিচাপে পৰিগণিত হ’ল নীতিন নবীন ৷ নবীনৰ সভাপতি দায়িত্ব গ্ৰহণৰ অনুষ্ঠানত উপস্থিত থাকে গৃহমন্ত্রী অমিত শ্বাহ, প্ৰতিৰক্ষা মন্ত্ৰী ৰাজনাথ সিঙ,স্বাস্থ্যমন্ত্ৰী তথা বিদায়ী সভাপতি জে পি নাড্ডা সহ কে’বাজনো কেন্দ্ৰীয় মন্ত্ৰী সহ শীৰ্ষ বিজেপি নেতা ৷
উল্লেখ্য যে বিজেপিৰ কার্যকৰী সভাপতিৰ দায়িত্ব লাভ কৰা যুৱ নেতা নীতিন নবীনে পক্ষত সোমবাৰে মনোনয়ন দাখিলৰ অন্তিম দিনটোত ৩৭খন মনোনয়নপত্র দাখিল হোৱাত তেওঁৰ দলীয় শীর্ষ আসনৰ অধিকাৰী হোৱাৰ পথ প্রশস্ত হয়। ইয়াৰে ৩৬খন মনোনয়নপত্র বিভিন্ন ৰাজ্য সমিতিসমূহে দাখিল কৰাৰ বিপৰীতে এখন দাখিল কৰিছে বিজেপিৰ ৰাষ্ট্ৰীয় পৰিষদ আৰু সংসদীয় দলে য’ত প্রধানমন্ত্রী নৰেন্দ্ৰ মোদী, কেন্দ্রীয় গৃহমন্ত্রী অমিত শ্বাহ, প্রতিৰক্ষা মন্ত্রী ৰাজনাথ সিং, বিদায়ী সভাপতি জে পি নড্ডা আৰু অন্যান্য ২০জন জ্যেষ্ঠ নেতা প্রস্তাৱক হিচাপে আছে। প্রতিখন মনোনয়নপত্রত ২০জন প্রস্তাৱকে স্বাক্ষৰ কৰিছে।
মনকৰিবলগীয়া যে দলৰ সভাপতিৰ নিৰ্বাচন বিজেপিৰ বৃহৎ পৰিসৰৰ সাংগঠনিক কুচকাৱাজ। সংগঠন পর্ব ২০২৪ৰ অধীনত দলীয় সংবিধান অনুসৰি এই আভ্যন্তৰীণ নির্বাচনী প্রক্রিয়া তৃণমূল পর্যায়ৰ পৰা আৰম্ভ হৈ ৰাষ্ট্ৰীয় পৰ্যায়ত উপনীত হৈছে। দেশজুৰি ১০,৭০,৪৮২টা ভোট কেন্দ্রব ভিতৰত ৭,৮৮,১৯৭জন বুথ সভাপতি নির্বাচিত হৈছে। ইয়াৰ উপৰি তৃণমূল পর্যায়ত ৭৪ শতাংশ প্রক্রিয়া সম্পন্ন কৰি ৮৯,৪৭,৮৪৫জন বুথ কমিটীৰ সদস্য নির্বাচিত হৈছে।
ৰাষ্ট্ৰজুৰি ১৭,৭৪৩টা মণ্ডলৰ ভিতৰত নিৰ্বাচন প্রক্রিয়া সম্পন্ন কৰি ১৬,৪৬৯জন মণ্ডল সভাপতি নির্বাচিত হৈছে। তৰুণ প্ৰজন্মক উৎসাহিত কৰিবলৈ এইবাৰ ৪৫ বছৰৰ তলৰ বয়স সীমা নির্ধাৰণ কৰি দিয়া হয় আৰু সম্পূর্ণ প্রক্রিয়া সম্পন্ন হোৱাৰ হাৰ হৈছে ৯৩ শতাংশ। একেদৰে জিলা পৰ্যায়তো তথ্য অনুসৰি ১০৩৬খন জিলাৰ ভিতৰত ৯৭৮জন জিলা সভাপতি নির্বাচিত হৈছে। জিলা পর্যায়ত প্রক্রিয়া সম্পূৰ্ণৰ হাৰ হৈছে ৯৪ শতাংশ।
তদুপৰি ৩৭খন সাংগঠনিক ৰাজ্যৰ ভিতৰত ৩০খনৰ ৰাজ্য সভাপতি নিৰ্বাচনৰ প্রক্রিয়া সম্পন্ন কৰা হয়। আনহাতে, এই পর্যন্ত মুঠ ৬,৩৮৪জন ৰাষ্ট্ৰীয় পৰিষদৰ সদস্যৰ ভিতৰত ৪,৯৩২জন সদস্য নির্বাচিত কৰা হৈছে। ৰাষ্ট্ৰীয় পৰ্যায়ত ৮১৫খন আসনৰ ভিতৰত ৰাষ্ট্ৰীয় পৰিষদৰ সদস্য ৭৪১খন আসনৰ বাবে নিৰ্বাচিত হৈছে।
মঙলবাৰে দিনৰ ১১ বজাত দিল্লীৰ বিজেপিৰ মুখ্য কাৰ্যালয়ত প্রায় সাতশজন প্রতিনিধি সমবেত হয়। এই সভাত উপস্থিত থাকে প্রধানমন্ত্রী নৰেন্দ্ৰ মোদী সহ দলৰ শীৰ্ষ নেতা ৷ প্ৰধানমন্ত্ৰী মোদী দলৰ সাংগাঠনিক উদ্থানৰ বাবে তৰুণ প্ৰজন্মৰ প্ৰতিনিধি হিচাপে নিতীন নবীনে বিশেষ উৎসাহেৰে কাম কৰি দলক আগুৱাই লৈ যাব বুলি উল্লেখ কৰে।
