KazirangaNationalPark : দৈনিক অগ্ৰদূত ডিজিটেল ডেস্ক : কাজিৰঙা ৰাষ্ট্ৰীয় উদ্যানৰ পৰিৱেশ সংবেদনশীল মণ্ডল সংকোচনৰ প্ৰস্তাৱৰ বিৰুদ্ধে এইবাৰ সৰৱ হৈ উঠিছে ইলোৰা বিজ্ঞান মঞ্চ। ইতিমধ্যে বহু দল-সংগঠনে এই চৰকাৰী প্ৰস্তাৱৰ বিৰোধিতা কৰাৰ পাছত সম্প্ৰতি অগ্রণী বিজ্ঞান সংস্থাটোৱেও চৰকাৰী প্ৰস্তাৱটোৰ বিৰোধিতা কৰিছে।
এক বিবৃতিত ইলোৰা বিজ্ঞান মঞ্চৰ সভাপতি ডাঃ মনোৰঞ্জন শৰ্মা আৰু সাধাৰণ সম্পাদক মনোজ ৰয়ে কয়, ‘উচ্চতম ন্যায়ালয়েও কাজিৰঙা-কাৰ্বি আংলং অঞ্চলৰ পৰিৱেশগত গুৰুত্ব স্বীকাৰ কৰি কাৰ্বি আংলঙৰ পাহাৰৰ পৰা কাজিৰঙালৈ বৈ অহা নৈ-নিজৰা আৰু অন্যান্য জলাধাৰসমূহে পানী সংগ্ৰহ কৰা সমগ্র অঞ্চলত খনন কাৰ্যৰ ওপৰত নিষেধাজ্ঞা আৰু চিহ্নিত বন্যপ্রাণী পথত নতুন নির্মাণ কার্যত নিয়ন্ত্রণ আৰোপ কৰিছে। ইয়াৰ পৰিপ্ৰেক্ষিতত বর্তমানে কাজিৰঙাৰ ক্ষেত্ৰত চূড়ান্ত পৰিৱেশ সংবেদনশীল মণ্ডল নির্ধাৰণ নোহোৱালৈকে বৰ্তমানৰ ১০ কিলোমিটাৰৰ সুৰক্ষা বিধানৰ ঠাইত এক-তিনি কিলোমিটাৰলৈ স্থান ভিত্তিক পৰিৱেশ সংবেদনশীল মণ্ডল সংকুচিত কৰিবলৈ বিচৰা অসম চৰকাৰৰ প্ৰস্তাৱৰ পুনৰ বিবেচনা কৰা উচিত। সর্বনিম্ন আইনী মান এক কিলোমিটাৰ হ’লেও কাজিৰঙাৰ দৰে অন্যান্য পৰিৱেশ-পাৰিপাৰ্শ্বিকতাৰ বাবে সেয়াই পর্যাপ্ত বুলি বিজ্ঞানসন্মতভাবে গ্রহণযোগ্য নহয়।’
বিবৃতিটোত মঞ্চৰ বিষয়ববীয়াদ্বয়ে লগতে কয়, ‘ইলোৰা বিজ্ঞান মঞ্চই স্থানীয় বাসিন্দাসকলৰ বৈধ জীৱিকা আৰু উন্নয়নৰ প্ৰয়োজনীয়তাক সন্মান কৰে। কিন্তু সেই প্রয়োজনীয়তাক বৃহৎ পৰিসৰৰ বাণিজ্যিক উন্নয়নৰ স’তে একে দৃষ্টিৰে চাব নোৱাৰি। কাজিৰঙা আৰু ইয়াৰ চৌপাশে প্ৰস্তাৱিত পঞ্চতাৰকা হোটেল, বিলাসী পর্যটন কেন্দ্ৰ আৰু উচ্চমানৰ চাহ-পৰ্যটন প্রকল্পসমূহে বন্যপ্রাণী, জলসম্পদ, ভূমিৰ ব্যৱহাৰ আৰু সামগ্রিকভাবে পৰিৱেশ-পাৰিপাৰ্শ্বিকতাৰ ওপৰত পেলাব পৰা বিৰূপ প্ৰভাৱো সতৰ্কতাৰে পৰীক্ষা কৰা প্ৰয়োজন। বৰ্তমান পৰিৱেশ সংৰক্ষণ আৰু উন্নয়নৰ মাজত ভাৰসাম্য ৰক্ষা কৰাটো অপৰিহাৰ্য হৈ পৰিছে।
